A Orde do 14 de xullo de 1998, pola que se desenvolve o sistema básico da Rede Galega de Vixilancia en Saúde Pública, atopa a súa xustificación na necesidade de sintonizar cos avances na creación dunha rede europea de vixilancia epidemiolóxica e de control das enfermidades transmisibles, e de facer fronte á crecente importancia das enfermidades emerxentes e reemerxentes.
No marco da iniciativa europea de elimina-lo sarampelo o antes posible, a Consellería de Sanidade e Servicios Sociais vai poñer en marcha durante este ano un programa de eliminación do sarampelo en Galicia, para o que a Rexión Europea propón, entre outros, o seguinte obxectivo: «Fortalece-la vixilancia do sarampelo, que contará cun sistema de notificación obrigatoria, cunha definición estándar do caso, coa colaboración de laboratorios de microbioloxía e cun sistema de retroalimentación informativa dos datos sobre a enfermidade e a cobertura vacinal».
Isto significa que, a diferencia do que viña ocorrendo na etapa de reducción da incidencia, para acada-la eliminación do sarampelo vai ser necesario detectar rapidamente cada un dos casos nos que se teña sospeita, co fin de confirma-la súa orixe sarampelosa e recoller información sobre as circunstancias que aínda estean a permiti-la transmisión da infección.
Consecuentemente con todo o anterior, e en uso das facultades que me atribúen os artigos 34.6º e 38 da Lei 1/1983, do 22 de febreiro, reguladora da Xunta e do seu presidente, reforma da pola Lei 11/1988, do 20 de outubro,
DISPOÑO:
Artigo único.
Incluí-lo sarampelo na relación de enfermidades que requiren declaración obrigatoria urxente, recollida no anexo III da Orde do 14 de xullo de 1998, pola que se desenvolve o sistema básico da Rede Galega de Vixilancia en Saúde Pública.
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 24 de marzo de 1999.
José Mª Hernández Cochón
Conselleiro de Sanidade e Servicios Sociais