Por Resolución do 18 de marzo de 1999, da Dirección Xeral de Calidade e Avaliación Ambiental (DOG número 61, do 30 de marzo, páxina 3.608), pola que se somete a información pública o estudio de efectos ambientais do proxecto de segunda fase do selado do vertedoiro do Zondal, sito no concello de Vigo (Pontevedra) e promovido polo Concello de Vigo, resólvese que para os devanditos efectos informativos se porán á disposición dos administrados exemplares nas dependencias que nela se indican; e que as alegacións se formularán durante o prazo de vinte días, contados a partir do seguinte ó da súa publicación no Diario Oficial de Galicia.
Dado que os exemplares do devandito proxecto non estaban expostos ó público, na totalidade das dependencias indicadas na citada resolución, na data a partir da que se podían examinar e formular
alegacións, cómpre amplia-lo prazo de exposición ó público e para formular alegacións sinalado nela.
En consecuencia,
RESOLVO:
Amplia-lo prazo de exposición ó público e para formular alegacións ó estudio de efectos ambientais do proxecto de segunda fase do selado do vertedoiro do Zondal, sito no concello de Vigo (Pontevedra), sometido a información pública por Resolución do 18 de marzo de 1999 (DOG número 61, do 30 de marzo), por un período de vinte días, contados a partir da publicación da presente resolución no Diario Oficial de Galicia.
Santiago de Compostela, 6 de abril de 1999.
Francisco Pan-Montojo González
Director xeral de Calidade
e Avaliación Ambiental