Galego | Castellano

DOG - Xunta de Galicia -

Diario Oficial de Galicia
DOG Núm. 65 Mércores, 07 de abril de 1999 Páx. 3.835

I. DISPOSICIÓNS XERAIS

CONSELLERÍA DA PRESIDENCIA E ADMINISTRACIÓN PÚBLICA

DECRETO 72/1999, do 25 de marzo, de asunción das funcións e servicios da Seguridade Social, en materia de asistencia e servicios sociais, encomendados ó Instituto Social da Mariña (ISM), transferidos á Comunidade Autónoma de Galicia mediante o Real decreto 373/1999, do 5 de marzo, e a súa asignación á Consellería de Sanidade e Servicios Sociais.

Polo Real decreto 373/1999, do 5 de marzo, traspásanse as funcións e servicios da Administración do Estado á Comunidade Autónoma de Galicia en materia de asistencia e servicios sociais encomendados ó Instituto Social da Mariña (ISM).

Procede, en virtude do citado traspaso, asumir de forma expresa tales funcións e servicios nos termos e condicións especificadas no acordo da Comisión Mixta de Transferencias e asignárllelas ós órganos correspondentes da Administración autonómica galega.

Na súa virtude, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día vintecinco de marzo de mil novecentos noventa e nove,

DISPOÑO:

Artigo 1º

Quedan asumidas as funcións e servicios traspasados pola Administración do Estado á Comunidade Autónoma de Galicia en virtude do Real decreto 373/1999, do 5 de marzo, en materia de asistencia e servicios sociais encomendados ó Instituto Social da Mariña (ISM), nos termos e condicións especificados no acordo da Comisión Mixta de Transferencias publicado como anexo ó dito real decreto.

Artigo 2º

1. Asígnanselle á Consellería de Sanidade e Servicios Sociais as funcións e servicios asumidos de conformidade co disposto no artigo anterior.

2. Os órganos da Consellería de Sanidade e Servicios Sociais exercerán as atribucións que lles correspondan conforme as normas que regulan a súa estructura.

Disposicións derradeiras

Primeira.-Facúltase o conselleiro de Sanidade e Servicios Sociais para dictar cantas disposicións sexan necesarias para o desenvolvemento e execución deste decreto e para adopta-las medidas precisas para a plena efectividade e executividade práctica das provisións de medios traspasados.

Segunda.-Este decreto entrará en vigor o día seguinte ó da súa publicación no Diario Oficial de Galicia.

Pazo de Mariñán (Bergondo), vintecinco de marzo de mil novecentos noventa e nove.

Manuel Fraga Iribarne

Presidente

Jaime Pita Varela

Conselleiro da Presidencia e Administración Pública