Dentro do plan de actividades da Escola Galega de Administración Pública para 1999 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas xornadas sobre o dereito á intimidade e á privacidade e as administracións públicas, convocatoria que se desenvolverá conforme as seguintes bases:
1. Obxectivos.
Facer unha análise das nocións de intimidade e privacidade, co fin de deslindar ámbolos dous conceptos, e estudia-la súa regulamentación constitucional e legal, con especial insistencia nos problemas que a regulación actual e futura da protección dos datos de carácter persoal suscita no contexto propio da actividade das administracións públicas.
2. Contido.
Trataranse estes temas:
-Os dereitos da persoa no ámbito das tecnoloxías da información.
-A relación xurídica de disposición de datos de carácter persoal.
-A protección dos datos de carácter persoal no proxecto de lei orgánica de adaptación da L.O. 5/1992, do 29 de outubro, á Directiva 95/46/CE, do Parlamento Europeo e do Consello.
-A recollida e a utilización de datos de carácter persoal.
-A seguridade dos tratamentos automatizados de datos de carácter persoal e a xestión das administracións públicas.
-O tratamento dos datos médicos e xenéticos na Administración sanitaria.
-As estructuras administrativas de control da recollida e tratamento dos datos persoais automatizados.
3. Destinatarios.
Persoal ó servicio da Xunta de Galicia e da Administración local galega, e interesados en xeral.
4. Desenvolvemento.
-Horario: mañá e tarde.
-Lugar e datas: as xornadas convocadas terán lugar no salón de actos da Escola Galega de Administración Pública (rúa de Madrid 2-4, polígono das Fontiñas, Santiago de Compostela) os días 26 e 27 de abril de 1999.
5. Inscrición.
-Prazo: remata o xoves, día 22 de abril de 1999.
-Tramitación de solicitudes: as solicitudes irán dirixidas ó director da Escola Galega de Administración Pública, polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 37.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, a partir do día 23 de abril,
por teléfono, de 10 a 14.45 horas, ós seguintes números: 981 54 62 39 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ó 85% das horas lectivas programadas, e expresarase, neste documento, a natureza da actividade e as datas da súa realización.
Santiago de Compostela, 24 de marzo de 1999.
Domingo Bello Janeiro
Director da Escola Galega de Administración
Pública