A crecente reducción dos recursos pesqueiros e a preocupación pola deterioración dos ecosistemas mariños, provoca políticas proteccionistas que comportan reducción das flotas e da actividade pesqueira, con grande incidencia naquelas comunidades onde a pesca é a única fonte de ingresos económicos. Esta reducción non só afecta polo que ten de diminución da actividade económica, senón polo que supón de abandono dunha cultura e un saber facer que se acumulou ó longo de anos de experiencia. Evitar esta perda ou, alomenos, minimizala, precisa que se xeren novas actividades vinculadas ó mar que axuden a soster estas comunidades e, polo tanto, a manter unha masa crítica suficiente de poboación portadora da cultura mariñeira. Estas deben, ademais, xerarse fóra da pesca extractiva e ligarse á diversificación das actividades económicas na comunidade, desenvolvendo recursos endóxenos.

Dentro destas premisas, as actividades dirixidas ó lecer e ó turismo parecen aquelas con maiores posibilidades de desenvolvemento, tendo en conta as características do noso litoral, onde se encontran moi pouco desenvolvidas, máis aínda se temos en conta o amplo pulo que nos últimos anos tivo o turismo rural.

A Iniciativa Comunitaria Pesca recolle entre as súas propostas o apoio ás iniciativas que teñan como fin o uso do mar como soporte de actividades turísticas para o que prevé entre as súas medidas as accións dirixidas á creación de infraestructuras para o turismo no mar.

No programa presentado pola Consellería de Pesca, Marisqueo e Acuicultura á dita iniciativa, inclúese unha liña de apoio ás empresas para a creación no litoral de infraestructuras para actividades de tipo turistico, cultural e de lecer vinculadas ó mar.

Parece logo conveniente incentivar estas actividades mediante o apoio á creación, nos portos e no litoral, das infraestructuras permanentes que faciliten o seu desenvolvemento. Polo exposto,

DISPOÑO:

Artigo 1º.-Obxecto.

Convocar axudas a empresas para a creación de infraestructuras permanentes no litoral para o desenvolvemento de actividades de tipo turístico, cultural e de lecer, vinculadas ó mar, conforme as normas contidas na presente orde, garantindo os preceptos legais de igualdade, concorrencia e publicidade.

As axudas concederanse con cargo á partida orzamentaria 12.04.770.0 do programa 752.A. do orzamento da Comunidade Autónoma de Galicia para 1999 por un importe máximo de 16.000.000 de ptas.

Artigo 2º.-Fins.

As actuacións que poderán acollerse a estas axudas serán aquelas que teñan por finalidade:

1º A creación de novas instalacións fixas e permanentes, tanto en terra como desde embarcación, para a realización de actividades de tipo turístico, cultural ou de lecer ligadas ó mar.

2º O equipamento destas instalacións para o cumprimento das súas funcions.

Artigo 3º.-Beneficiarios.

Poderán ser beneficiarios das axudas as persoas físicas ou xurídicas legalmente constituídas como empresas que teñan como fin o desenvolvemento de actividades que cumpran os requisitos da presente orde.

Tódolos beneficiarios deberán te-lo seu enderezo social, no caso das entidades, ou particular, no caso de persoas físicas, no ámbito territorial da Comunidade Autónoma de Galicia ou alomenos delegacións abertas que realicen actividades con continuidade.

Artigo 4º.-Contía e límites de axuda.

As axudas concederanse nas contías que permitan as dispoñibilidades orzamentarias e co límite máximo do 60% do importe financiable, segundo o proxecto presentado para a solicitude da axuda.

Artigo 5º.-Compatibilidade da axuda.

A percepción desta axuda poderá ser compatible con calquera outra que concedan as diversas administracións públicas para a mesma finalidade, sempre que o conxunto das mesmas non supere a limitación establecida na disposición cuarta desta orde. No caso de que foran superadas estas limitacións, a Consellería de Pesca, Marisqueo e Acuicultura minorará o importe da axuda concedida ata alcanza-lo máximo porcentual permitido.

Artigo 6º.-Presentación das solicitudes.

As solicitudes axustaranse ó modelo que figura como anexo á presente orde, debendo ser presentada nos rexistros das delegacións territoriais da Consellería de Pesca, Marisqueo e Acuicultura ou por calquera dos medios establecidos no artigo 34.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Artigo 7º.-Prazo de presentación de solicitudes.

O prazo de presentación de solicitudes será de 30 días naturais contados a partir do seguinte ó da publicación desta orde no Diario Oficial de Galicia.

Artigo 8º.-Documentación.

Xunto coa solicitude deberá presentarse a seguinte documentación:

1. Fotocopia compulsada do DNI do solicitante.

2. Fotocopia compulsada dos estatutos da sociedade e certificacion do órgano competente na que se especifique o acordo polo que se concede autorización para face-la solicitude ó asinante desta. Se actuase en virtude de atribucións fixadas nos estatutos, indicarase así na solicitude, citando a disposición que recolle a competencia e xuntando unha certificación do órgano competente na que se acredite o desempeño actual do cargo.

3. Fotocopia da tarxeta de identificación fiscal, ou NIF, segundo se trate de persoas xurídicas ou físicas.

4. Certificación bancaria onde conste o titular, o número de conta e as claves do banco e da sucursal, así como o enderezo desta, para efectos do pagamento da axuda.

5. Memoria descritiva do obxecto do investimento, onde conste a súa localización e características principais e a súa xustificación; relación das actividades que xa realiza ou proxecte realiza-la empresa, da función que dentro delas vai realiza-la nova infraestructura, relación con outras actividades propias ou da zona, impacto económico e social que representa, postos de traballo fixos e temporais que crea e outras que se considere de interese.

6. Proxecto técnico (se é necesario) de realización da infraestructura ou equipamento, indicando características físicas e xeométricas das distintas instalacións, plans e orzamento de execución, asinado por técnico competente segundo corresponda.

7. Memoria económica que recolla os seguintes aspectos:

a) Plan económico e estudio de viabilidade, indicando a parte que corresponde a recursos propios da entidade solicitante e cal a axudas percibidas ou solicitadas para o mesmo fin procedentes de calquera Administración estatal, autonómica, local ou institucional, resultados esperados, amortización do investimento, etc.

b) Calendario de investimentos e plan de financiamento por anos.

c) Declaración de calquera tipo de axuda xa solicitada ou concedida ou que se pretenda solicitar a calquera Administración pública, destinada a subvencionar en todo ou en parte o proxecto presentado para acollerse a esta orde.

8. Acreditación de que o solicitante está en posesión das autorizacións e permisos necesarios para a realización da actividade e o investimento. En calquera caso será necesaria a súa presentación para o pagamento da axuda.

9. Certificado de situación de realización do investimento para o que se solicita a axuda no momento da solicitude.

10. Acreditación dos datos rexistrais da empresa ou entidade (escrituras, poderes e imposto de actividades económicas ou equivalentes), se é o caso.

Artigo 9º.-Tramitación e resolución.

Unha vez recibidas as instancias e a documentación, serán examinadas polo Servicio de Extensión Pesqueira da Consellería de Pesca, Marisqueo e Acuicultura, que, se observa algunha deficiencia, lle concederá ó solicitante un prazo de 10 días para emendalas. Transcorrido o dito prazo sen se produci-la emenda, o expediente arquivarase sen máis trámite.

Efectuadas as comprobacións e estudios pertinentes, formularase a correspondente proposta de resolución, que conterá unha relación dos solicitantes para os que se propón a concesión das axudas e a contía, así como a daqueles para os que se propón a denegación da axuda solicitada.

A dita proposta elevaráselle ó director xeral de Formación Pesqueira e Investigación, quen dictará a pertinente resolución de concesión ou denegación da axuda, tendo en conta as prioridades e limitacións establecidas nesta orde, no prazo de 3 meses contados a partir do remate do prazo para presenta-las solicitudes. Transcorrido o dito prazo sen que haxa resolución expresa, as solicitudes entenderanse desestimadas.

Artigo 10º.-Criterios obxectivos de prioridade.

1. Para establece-las prioridades teranse en conta os seguintes criterios:

a) Terán preferencia as solicitudes presentadas para infraestructuras destinadas ó uso turístico sobre as demais e as presentadas por empresas de economía social sobre o resto de peticionarios.

b) Terán preferencia as solicitudes que xeren máis empregos por investimento realizado.

En caso de igualdade terase en conta a actividade inducida polo investimento.

No caso de igualdade de condicións valorarase a innovación da actividade obxecto da axuda e o interese para a zona onde se vaia realizar.

Artigo 11º.-Prazo de realización.

O prazo no que debe ser realizada a actividade axudada será fixado na resolución de concesión de axuda, sen que en ningún caso poida exceder do 31 de decembro do ano 1999.

Cando o beneficiario considere que non pode remata-lo proxecto dentro do prazo sinalado, antes de rematar este poderá solicitar unha prórroga, expoñendo as razóns polas que non pode cumprir co devandito prazo, e presentando unha pequena memoria onde se especifique o grao de realización da actividade axudada.

O director xeral dictará resolución pola que se aprobe ou denegue a prórroga solicitada; no caso de que sexa aprobada non poderá exceder de dous meses a partir do remate do prazo establecido na resolución de concesión da axuda. O incumprimento do prazo de execución dará lugar á revogación da concesión da axuda.

Artigo 12º.-Control das actividades obxecto das axudas.

A Consellería de Pesca, Marisqueo e Acuicultura, a través das súas delegacións territoriais, reserva para si a facultade de realiza-las comprobacións, inspeccións e controis que considere oportunos, verificando o cumprimento da finalidade da axuda. Para tal fin, o beneficiario deberá comunicar por escrito o inicio do investimento obxecto de axuda con prazo suficiente para poder efectua-las comprobacións que se consideren oportunas.

Os beneficiarios das axudas quedarán suxeitos, tanto ás actuacións de comprobación que acorde a Consellería de Pesca, Marisqueo e Acuicultura, como ás de control financeiro que lle correspondan á Consellería de Economía e Facenda e ás previstas na lexislación do Consello de Contas.

No suposto de que unha vez notificada a resolución de concesión houbera algunha variación no calendario, nos prazos de execución do investimento sinalados na memoria de solicitude, ou en calquera outro aspecto, seralle comunicada á Dirección Xeral de Formación Pesqueira e Investigación coa antelación suficiente para que poida realiza-las comprobacións que considere necesarias, para os efectos de aprobar ou denega-la devandita modificación.

A Dirección Xeral de Formación Pesqueira e Investigación establecerá as medidas necesarias, para efectos de face-la comprobación efectiva da realización das finalidades obxecto da axuda.

Artigo 13º.-Pagamento das axudas.

Finalizada a execución do proxecto no prazo sinalado, ou no que resultase como consecuencia da prórroga concedida, a entidade beneficiaria deberá presentar ó Servicio de Extensión Pesqueira, dentro do prazo dun mes, a seguinte documentación:

a) Facturas orixinais dos gastos realizados, xunto cunha relación delas cos importes agrupados polos conceptos que se describiron na memoria de solicitude.

b) Declaración responsable na que se expresen as axudas solicitadas, concedidas ou percibidas para o mesmo fin por calquera organismo estatal, autónomo, local ou institucional.

c) Memoria sinxela de realización do investimento onde se indiquen as incidencias habidas na súa execución.

d) Certificación xustificativa de que o beneficiario está ó día das obrigas fiscais e coa Seguridade Social.

e) Certificación que acredite que o beneficiario non ten contraída ningunha débeda, por ningún concepto, coa Xunta de Galicia.

A Dirección Xeral de Formación Pesqueira e Investigación certificará a execución completa do investimento obxecto da axuda despois de realiza-las comprobacións oportunas.

Artigo 14º.-Pagamentos con carácter de anticipo.

Os beneficiarios poderán solicitar pagamentos parciais, ata un máximo do 80% da axuda concedida. O seu aboamento farase logo de solicitude polo beneficiario e xustificación dos gastos realizados segundo o estipulado no artigo 13 e constitución dun aval bancario a favor da Xunta de Galicia, segundo o disposto na Lei 6/1998, do 29 de decembro, dos orzamentos xerais da Comunidade Autónoma de Galicia para 1999, pola cantidade que se debe aboar, principal máis xuros, do xuro legal, e ata o remate do investimento obxecto da axuda e a súa xustificación total.

O aval bancario ó que se fai referencia, deberá depositarse na Caixa de Depósitos da Subdirección do Tesouro ou na Tesourería das delegación territoriais da Consellería de Economía e Facenda da Comunidade Autónoma de Galicia.

O resto da axuda librarase unha vez rematado o investimento, segundo o disposto no artigo anterior. No caso de non ser finalizado o investimento, o beneficiario está obrigado a reintegra-las cantidades recibidas con carácter de anticipo.

Artigo 15º.-Outras condicións.

O beneficiario comprométese a manter aberta e en funcionamento a instalación obxecto da axuda por un período mínimo de tres (3) anos contados a partir da data de xustificación da finalización do investimento.

Artigo 16º.-Obrigas de información.

En toda a documentación pública relacionada co investimento obxecto da axuda farase constar que estas se realizarán cunha axuda da Consellería de Pesca, Marisqueo e Acuicultura e con financiamento da Unión Europea a traves da Iniciativa Comunitaria Pesca.

Disposicións derradeiras

Primeira.-Facúltase a Dirección Xeral de Formación Pesqueira e Investigación para dicta-las resolucións necesarias para o desenvolvemento desta disposición.

Segunda.-Esta orde entrará en vigor o día seguinte ó da súa publicación no Diario Oficial de Galicia.

Santiago de Compostela, 1 de marzo de 1999.

P.D. (Orde 17-12-1997, DOG nº 246, do 22)

Juan José Álvarez Pérez

Secretario xeral da Consellería de Pesca,

Marisqueo e Acuicultura