Unha vez que o Consello da Xunta de Galicia, na súa reunión do día 18 de decembro de 1998, acordou declara-la incidencia supramunicipal do Plan de Xestión de Residuos Sólidos Urbanos de Galicia, así como a determinación da Consellería de Medio Ambiente como o órgano competente, por razón de materia, para a tramitación do expediente, procede somete-lo referido plan ó trámite de información pública en cumprimento do disposto no artigo 25.3º da Lei 10/1995, do 23 de novembro, de ordenación do territorio de Galicia, polo que
RESOLVO:
1. Someter a información pública o Plan de Xestión de Residuos Sólidos Urbanos de Galicia durante o prazo dun (1) mes, contado a partir do día seguinte ó da publicación desta resolución no Diario Oficial de Galicia, para que calquera persoa poida examinalo e presenta-las alegacións que considere oportunas dentro do citado prazo.
2. Un exemplar do referido Plan de Xestión de Residuos Sólidos Urbanos de Galicia estará á disposición dos cidadáns durante o horario de atención ó público, nas seguintes dependencias:
-Dirección Xeral de Calidade e Avaliación Ambiental, rúa dos Feáns, nº 7, portal C, de Santiago de Compostela (A Coruña).
-Delegacións provinciais da Consellería de Medio Ambiente na Coruña, Lugo, Ourense e Pontevedra.
Santiago de Compostela, 29 de xaneiro de 1999.
Francisco Pan-Montojo González
Director xeral de Calidade e Avaliación Ambiental