Mediante a orde da Consellería de Agricultura, Gandería e Política Agroalimentaria do 2 de febreiro de 1998, modificáronse as condicións do movemento de gando porcino, baseándose en que as circunstancias epizootiolóxicas eran desfavorables. Estas circunstancias esixían modifica-lo sistema de control no movemento dos animais desta especie, para evita-la posible aparición e difusión da peste porcina clásica.

Os controis e medidas de loita adoptados nas áreas afectadas evitaron a aparición desta enfermidade nos efectivos do gando porcino en Galicia e permitiron un silencio epidemiolóxico que fai posible restaura-lo documento de traslado de animais como medio de control do movemento de gando dentro do ámbito exclusivo da Comunidade Autónoma de Galicia.

En consecuencia, de acordo co disposto no artigo 30.1º.3 do Estatuto de autonomía de Galicia e no uso das facultades que me confire a Lei 1/1983, do 22 de febreiro, reguladora da Xunta e do seu presidente,

DISPOÑO:

Artigo 1º

Suprímese o disposto nos artigos 1º e 2º da orde da Consellería de Agricultura, Gandería e Política Agroalimentaria, do 2 de febreiro de 1998, no que se refire á utilización dos documentos de traslado de animais.

Artigo 2º

Os documentos de traslado de animais poderán ser utilizados nas condicións establecidas na orde da Consellería de Agricultura, Gandería e Política Agroalimentaria do 28 de agosto de 1995, especialmente no seu artigo 6º e unicamente para o movemento de animais da especie porcina que se realicen directamente desde a explotación ó centro de sacrificio.

Disposicións derradeiras

Primeira.-Facúltase o director xeral de Producción Agropecuaria para dicta-las disposicións necesarias para o desenvolvemento e cumprimento da presente orde.

Segunda.-A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 22 de xaneiro de 1999.

Cástor Gago Álvarez

Conselleiro de Agricultura, Gandería

e Política Agroalimentaria