En virtude do Decreto 177/1998, do 11 de xuño, creouse a rede galega de vixilancia en saúde pública, coa finalidade de identificar e caracterizar problemas de saúde na poboación galega, para facilita-lo seu control, sexa con medidas individuais ou colectivas. A dita rede está constituída polo sistema básico e polo sistema específico de vixilancia.
O Rexistro Galego da SIDA forma parte do sistema específico de vixilancia e ten como obxectivo recoller e xestiona-la información precisa para describi-la incidencia, evolución e características da síndrome de inmunodeficiencia adquirida en Galicia.
Por todo isto, e facendo uso das facultades que me confiren os artigos 34 e 38 da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro,
DISPOÑO:
Artigo 1º
A vixilancia epidemiolóxica da SIDA farase en Galicia a través do Rexistro Galego da SIDA.
Artigo 2º
O Rexistro Galego da SIDA recollerá información sobre os casos da SIDA segundo a definición vixente de caso no momento do diagnóstico. En todo caso esta incluirá datos sobre cada un dos puntos que aparecen no anexo I.
Artigo 3º
O Rexistro Galego da SIDA estará adscrito á Dirección Xeral de Saúde Pública, como órgano encargado da súa xestión.
Artigo 4º
1. Tódolos médicos/as en exercicio no ámbito territorial da Comunidade galega, están obrigados a declara-los casos de SIDA ante a Consellería de Sanidade e Servicios Sociais.
2. Esta notificación farase, a máis tardar, antes do mércores da semana seguinte ó diagnóstico do caso. Para estes efectos, considérase que a semana é a unidade básica temporal para a declaración dos casos, e que comeza ás 0 horas do domingo e remata ás 24 horas do sábado seguinte.
3. A notificación remitirase ó Rexistro Galego da SIDA, adscrito á Dirección Xeral de Saúde Pública como órgano encargado da súa xestión.
Artigo 5º
Os sistemas a través dos que se efectuará a declaración serán os que estableza en cada momento a Dirección Xeral de Saúde Pública. En todo caso incluirán datos sobre os puntos que aparecen no anexo I.
Artigo 6º
O incumprimento do previsto nesta orde constitúe infracción administrativa de acordo co disposto no artigo 35 da Lei 14/1986, do 25 de abril, xeral de sanidade.
Artigo 7º
De acordo co especificado no artigo 7.2º do Decreto 177/1998, do 11 de xuño, polo que se crea a Rede Galega de Vixilancia en Saúde Pública, a información que recolla o Rexistro Galego da SIDA considerarase estrictamente confidencial e utilizarase só para fins exclusivamente sanitarios.
Disposicións derradeiras
Primeira.-Facúltase a directora xeral de Saúde Pública para adoptar cantas medidas sexan precisas en desenvolvemento e execución da presente orde.
Segunda.-A presente orde entrará en vigor ós vinte días seguintes ó da súa publicación no Diario Oficial de Galicia.
Santiago de Compostela, 4 de decembro de 1998.
José María Hernández Cochón
Conselleiro de Sanidade e Servicios Sociais
ANEXO
Información que debe figurar na declaración da SIDA:
-Datos sobre a identificación do caso.-Datos sociodemográficos.-Datos sobre os factores de risco.-Datos sobre a enfermidade indicativa da SIDA.-Datos de laboratorio.-Datos sobre o médico/a responsable do diagnóstico.
11591