Coa implantación da nova estructura das ensinanzas primaria e secundaria, segundo o establecido na Lei orgánica de ordenación xeral do sistema educativo (LOXSE), faise necesaria unha adaptación normativa que permita a validación dos estudios de lingua galega feitos nos diferentes ciclos destas ensinanzas polos cursos de iniciación ou perfeccionamento, segundo corresponda, e que veña complementa-la lexislación anterior que non se adapta á actual estructura do ensino. En consecuencia,
DISPOÑO:
Artigo 1º
Validaráselle-lo curso de iniciación en lingua galega ós alumnos que teñan superado a área de lingua galega e literatura do primeiro ciclo da educación secundaria obrigatoria (ESO).
Artigo 2º
Validaráselle-lo curso de perfeccionamento:
a) Ós alumnos que teñan o título de graduado en educación secundaria obrigatoria coa área de lingua galega e literatura avaliada positivamente.
b) Ós alumnos que superasen as probas para a obtención do graduado en educación secundaria obrigatoria coa avaliación positiva da área de lingua galega e literatura.
c) Ós alumnos que superasen, polo menos, a materia de lingua galega e literatura dun curso do bacharelato.
Artigo 3º
Os correspondentes certificados de validación serán expedidos, logo da solicitude do/a interesado/a, polo secretario/a do centro onde o alumno cursou os seus estudios, co visto e prace do/a director/a, segundo o modelo que figura no anexo desta orde. No caso de alumnos que superen as probas para a obtención do graduado en educación secundaria obrigatoria, a correspondente validación expediraa a Inspección de Educación.
Disposición derradeira
Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 13 de outubro de 1998.
Celso Currás Fernández
Conselleiro de Educación e Ordenación
Universitaria
ANEXO
O/A secretario/a de ..., en virtude da Orde do 13 de outubro de 1998 (DOG nº... do ... de ... de 1998) que establece o procedemento para a validación de cursos de lingua galega, outorga a ... a validación do curso de (*)... de lingua galega, segundo a documentación arquivada nesta secretaría.
..., ... de ... de ...
Visto e Prace
O/A director/a
(*) Iniciación ou perfeccionamento.
10109