Dentro do plan de actividades da EGAP para 1998, e conforme coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase un curso sobre licencias e protección da legalidade urbanística para funcionarios da Administración local, que deberá desenvolverse conforme as seguintes bases:
Primeira.-Obxectivos.
Análise dos aspectos da concesión das licencias urbanísticas e da protección da legalidade urbanística.
Segunda.-Destinatarios.
Persoal ó servicio das entidades locais, pertencentes ós grupos A/B ou asimilados que desenvolvan as súas tarefas na área do urbanismo.
Terceira.-Solicitudes.
1. As persoas que desexen participar no curso programado deberán solicitalo no modelo oficial de instancia que figura ó final da convocatoria e cubrila en tódolos epígrafes.
Cando solicite o curso máis dun interesado da mesma corporación, o responsable do persoal poderá especifica-la orde de preferencia. No caso de que non se especifique, a EGAP aplicarálle-los criterios de selección ós que se fai referencia na base sétima.
2. A falsidade ou a ocultación de datos esenciais para a selección será motivo de exclusión automática.
Cuarta.-Tramitación de solicitudes.
As solicitudes irán dirixidas ó director da Escola Galega de Administración Pública e presentaranse no rexistro da EGAP, polígono das Fontiñas 2-4, 15707 Santiago de Compostela, ou tramitaranse por calquera das outras formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Seguidamente efectuarase a selección dos participantes e esta notificaráselles directamente ós admitidos.
Quinta.-Prazo.
O prazo de presentación de instancias será de 15 días naturais, contados a partir da data de publicación da convocatoria.
Sexta.-Selección.
Os criterios de selección, dirixidos a concilia-las necesidades da organización na que prestan servicios os aspirantes e os intereses individuais destes, terán en conta a maior relación do posto de traballo desempeñado co contido do curso. Terán preferencia aqueles que non realizasen ningún curso de similares características ó convocado.
En calquera caso, os criterios de selección suxeitaranse ás directrices sinaladas na Resolución do 27 de xuño de 1994 (DOG nº 149, do 3 de agosto), pola que se fan públicos os criterios de participación nas actividades docentes da EGAP.
Sétima.-Modificacións.
A EGAP poderá modifica-lo desenvolvemento e mailo contido do curso anunciado para adaptalo ás necesidades da Administración e ás continxencias que poidan xurdir.
A EGAP reserva para si a facultade de anula-lo curso se o escaso número de solicitudes non xustificase a súa realización. Fíxase en 15 o número mínimo de asistentes.
Oitava.-Desenvolvemento.
1. Duración: 21 horas.
2. Lugar: Santiago de Compostela.
3. Datas: do 23 ó 27 de novembro.
4. Horario: das 16.30 ás 20.30 horas.
5. Prazas: 30.
Novena.-Certificado de asistencia.
Outorgaráselle-lo certificado de asistencia ós alumnos que participen con regularidade no curso, e é obrigatoria a asistencia a tódalas sesións. Toda inasistencia deberá ser xustificada convenientemente, sen que poida exceder en ningún caso do 15% das horas lectivas programadas.
Unha inasistencia superior ó 15% das horas lectivas programadas, aínda que sexa xustificada, impedirá a expedición do correspondente certificado.
Décima.-Contido.
A disciplina urbanística: concepto. Lexislación estatal e autonómica. Concepto de licencia. Actos suxeitos a licencia. Tipos de licencia. As licencias urbanísticas e outras licencias. Actuacións con licencia en contra do planeamento. Actuacións con licencia ilegal. Medios de protección da disciplina urbanística. A infracción urbanística. Procedemento sancionador. A caducidade dos expedientes. A prescrición das infraccións urbanísticas. As parcelacións urbanísticas. A obriga de conservación. A ruína urbanística.
Santiago de Compostela, 13 de outubro de 1998.
Domingo Bello Janeiro
Director da Escola Galega de Adminintración
Pública
9491
