Visto o expediente do convenio colectivo da entidade Cáritas Diocesana Santiago Interparroquial da Coruña que tivo entrada nesta delegación provincial o día 24-7-1998, subscrito en representación da parte económica polos representantes da entidade e da parte social polos traballadores o día 1-7-1998, de conformidade co disposto no artigo 90.2º e 3º da Lei 8/1980, do 10 de marzo, do Estatuto dos traballadores, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á Comunidade Autónoma de Galicia en materia de traballo, esta delegación provincial
ACORDA:
Primeiro.-Ordena-la súa inscrición no libro rexistro de convenios colectivos de traballo existente nesta delegación provincial, e notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Sección de Mediación, Arbitraxe e Conciliación.
Terceiro.-Dispoñe-la súa publicación no Diario Oficial de Galicia.
A Coruña, 4 de agosto de 1998.
Mª Reyes Carabel Pedreira
Delegada provincial da Coruña
Convenio colectivo de Cáritas Diocesana de Santiago de Compostela Interparroquial da Coruña
Capítulo I
Ámbito de aplicación
Artigo 1º.-Ámbito territorial.
O presente convenio afecta tódalas dependencias e servicios existentes na actualidade ou que se puidesen crear no futuro no ámbito territorial de Cáritas Interparroquial da Coruña.
Artigo 2º.-Ámbito funcional.
O presente convenio colectivo regula as relacións laborais entre Cáritas Interparroquial da Coruña e o persoal que presta os seus servicios nos centros de traballo dependentes do dito organismo.
Artigo 3º.-Ámbito persoal.
O presente convenio é de aplicación a tódolos traballadores, sexa cal sexa a súa modalidade de contratación e que realicen as súas funcións nos centros e servicios dependentes de Cáritas Interparroquial.
Artigo 4º.-Ámbito temporal.
O presente convenio entrará en vigor o 1 de xaneiro de 1997 e manterá a súa vixencia ata o 31 de decembro de 1998, retrotraéndose os seus efectos ó 1 de xaneiro de 1997 se a súa publicación fose posterior á dita data.
Artigo 5º.-Denuncia.
A denuncia do presente convenio efectuarase por escrito, que presentará a parte denunciante á outra parte, cunha antelación mínima de dous meses ó remate da súa vixencia.
No caso de non efectuarse a denuncia en tempo e forma, entenderase automaticamente prorrogado o convenio por prazos anuais. Neste caso, tódolos conceptos económicos serán incrementados tendo en conta o incremento do índice de prezos para o consumo previsto para o ano seguinte.
Artigo 6º.-Garantía ad personam.
Respectaranse as condicións económicas e sociais que sexan máis beneficiosas para os traballadores e que viñesen desfrutando á entrada en vigor deste convenio.
Artigo 7º.-Vinculación á totalidade.
As condicións aquí pactadas forman un todo orgánico e indivisible, e para efectos da súa aplicación práctica serán consideradas globalmente.
Capítulo II
Organización e réxime de traballo
Artigo 8º.-Norma xeral.
A organización técnica do traballo corresponde á comisión permanente da institución, que poderá establecer cantos sistemas de organización, racionalización e modernización considere oportunos, así como calquera estructuración das seccións, departamentos
e centros de traballo, podendo move-lo seu persoal dentro destes sempre que se realice de conformidade coas disposicións legais vixentes sobre a materia. O traballador está obrigado a realiza-lo traballo convido baixo a dirección da entidade ou persona na que esta delegue.
Capítulo III
Clasificación profesional
Artigo 9º.-Disposicións xerais.
As clasificacións de persoal consignadas neste convenio son simplemente enunciativas, e non supoñen a obriga de ter cubertas tódalas prazas relacionadas.
Así mesmo, os distintos cometidos asignados a cada categoría son simplemente informativos, pois todo traballador está obrigado a executar cantos traballos e operacións lle ordenen os superiores, dentro do xeral cometido propio da súa competencia profesional, ou cando por circunstancias excepcionais e de urxencia sexa necesaria a súa colaboración persoal.
Artigo 10º.-Clasificación profesional.
Todo o persoal laboral que preste os seus servicios nos centros pertencentes a Cáritas Interparroquial da Coruña clasificarase, en atención á capacitación para a función que desenvolvan, nos seguintes grupos profesionais:
a) Titulados superiores.
b) Titulados medios.
c) Persoal técnico administrativo.
d) Profesionais de oficio.
e) Persoal subalterno e persoal non cualificado.
Artigo 11º.-Traballos de superior e inferior categoría.
Cando un traballador realice tarefas correspondentes a unha categoría superior, pero non proceda legal ou convencionalmente o ascenso, o traballador terá dereito a percibi-la diferencia retributiva entre a categoría asignada e a función que efectivamente realice.
Cando o traballador de inferior categoría realice funcións de categorías superiores ás que lle corresponden, de forma permanente e estable, e por un período superior a seis meses durante un ano ou oito meses durante dous anos, pode reclamar perante a dirección da entidade ou organismo competente a categoría profesional adecuada.
A realización de traballos de categoría superior e inferior responderá a necesidades excepcionais e perentorias e durará o tempo mínimo imprescindible.
O traballador só poderá realizar traballos de categoría inmediatamente inferior á súa durante un período non superior a 30 días consecutivos. Transcorrido o período citado, o traballador non poderá volver ocupar un posto de categoría inferior ata que transcorra un ano.
Capítulo IV
Tempo de traballo
Artigo 12º.-Xornada de traballo.
Establécese unha xornada laboral de 2.085 horas anuais, tanto en xornada continuada como partida, distribuídas de luns a domingo segundo as peculiaridades propias de cada servicio, e cos descansos que regulamentariamente se establezan no calendario laboral, respectando en todo caso a lexislación vixente.
As horas de traballo efectivo, unha vez descontados os días festivos e vacacións, quedan reducidas a 1.832 horas anuais para 1997 e a 1.816 horas anuais en 1998.
Artigo 13º.-Horarios e quendas.
A empresa, dentro das súas facultades organizativas e respectando sempre o número de horas laborables do ano, encargarase de establece-los horarios de inicio e fin da xornada de cada persoa, así como a organización das distintas quendas de traballo nos casos en que se realice a tarefa baixo a modalidade de traballo a quendas.
A empresa poderá establecer un sistema de control de asistencia, sen que o tempo reflectido no rexistro de asistencia signifique, por si só, horas efectivas de traballo.
Na modalidade de traballo a quendas, ningún traballador poderá abandona-lo seu posto de traballo unha vez rematada a súa xornada laboral, ata que non chegue o relevo correspondente.
O calendario laboral será establecido anualmente pola entidade, comunicándollo ós representantes dos traballadores, e deberá estar exposto o correspondente a cada centro de traballo á vista de tódolos seus traballadores, co fin de que cada un coñeza a súa xornada laboral, que só poderá ser modificada por causas de forza maior.
Artigo 14º.-Vacacións.
1. Duración.
As vacacións anuais serán de 30 días naturais desfrutados de forma continuada equivalentes, durante a vixencia deste convenio, a 21 días laborables do calendario de traballo de cada posto, desfrutadas entre os meses de xaneiro a decembro.
Non se terá dereito ó desfrute das vacacións ata que non se completasen seis meses de traballo efectivo na institución.
2. Organización e calendario.
O calendario de vacacións debe quedar elaborado antes do 28 de febreiro de cada ano, seguíndose na elección da quenda de vacacións un sistema rotativo, tendo preferencia de elección, o primeiro ano, entre os traballadores que compoñan cada grupo segundo a súa antigüidade na empresa.
3. Obrigatoriedade e retribución.
As vacacións deben desfrutarse durante o ano natural, non sendo posible acumulalas a anos seguintes nin poden ser compensables economicamente agás nos
casos de liquidación por finiquito. Por iso, calquera que fose a causa, non desfrutalas durante o ano natural supón a perda delas ou da fracción pendente de desfrute.
A retribución deste período será o importe resultante de acha-la media dos meses transcorridos do ano natural e ata un máximo de seis meses, tomándose para o dito cómputo o salario base, a antigüidade e o complemento por penosidade.
4. Enfermidade.
Se durante o desfrute das vacacións o traballador se encontrase en situación de IT, estas non se interrompen nin son conmutables por novos períodos. O traballador, non obstante, neste caso terá dereito ás súas percepcións salariais a razón da totalidade dos seus haberes durante a duración das vacacións.
Artigo 15º.-Permisos e licencias.
Os traballadores, logo de aviso e xustificación, poderán ausentarse do traballo con dereito a remuneración, por algún dos motivos e polo tempo seguinte:
a) 15 días naturais en caso de matrimonio.
b) 3 días naturais por falecemento de familiares ata segundo grao por consanguinidade ou afinidade; se nestes casos o traballador fose o que levase os trámites legais correspondentes ante a autoridade, por falta doutros parentes de grao máis proximo, e os días a que ten dereito fosen festivos, estes ampliaranse nun día laborable.
c) Os citados días de permiso por supostos de falecemento ampliaranse en dous días naturais máis no caso de que o traballador necesitase realizar un desprazamento superior a 300 quilómetros.
d) Polo nacemento dun fillo ou adopción, o traballador, cónxuxe ou convivente terá dereito a 3 días naturais de permiso, consecutivos ou non, dos que polo menos dous deben ser laborables, e abranguidos no período de 15 días a partir da data do nacemento ou chegada do adoptado ó fogar; cando o traballador necesite desprazarse fóra da localidade, o dito permiso ampliarase a 5 días naturais.
e) 3 días naturais en caso de enfermidade grave de parentes ata o 2º grao de consanguinidade ou afinidade.
f) Polo tempo necesario para que o traballador asista ou acompañe os seus fillos a consultas médicas, cando non fose posible acudir fóra das horas de traballo, e mediante a xustificación correspondente.
g) 1 día por traslado de domicilio habitual.
h) Polo tempo necesario para o cumprimento de deberes inescusables de carácter público e persoal, xustificándoo adecuadamente.
i) Polo tempo necesario para atende-los danos producidos por catástrofes nos bens inmobles que constitúan a vivenda habitual do traballador, con xustificación.
j) Para realizar funcións sindicais ou de representación de persoal, nos termos establecidos legalmente, e neste convenio.
k) Para realizar exames, cando curse con regularidade estudios para a consecución de títulos oficiais académicos ou profesionais, o traballador terá dereito ó correspondente permiso, que abranguerá un día por exame, que se ampliará un día máis se se precisa para traslados a outra poboación situada a máis de 300 km.
l) 1 día de permiso por voda dun familiar de primeiro grao.
m) 1 día de permiso en caso de separación ou divorcio.
n) Ata 5 días no ano, tomados dunha soa vez ou en dúas partes, sen retribuír, solicitándoo cunha antelación mínima de 48 horas, que serán concedidos sempre que as necesidades do servicio o permitan.
Artigo 16º.-Cursos de formación.
Os cursos de formación e promoción do persoal, organizados ou propostos pola institución realizaranse preferentemente durante o horario laboral, sempre e cando nos ditos horarios non se prexudique o labor que hai que realizar na xornada ordinaria de traballo. En todo caso, computarase a asistencia como horas traballadas.
Terán preferencia para a asistencia ós cursos, os traballadores que estean desempeñando labores directamente relacionados coa materia obxecto do curso, e dentro destes aqueles que participasen menor número de cursos. As decisións ó respecto adoptaranse por acordo entre a institución e os representantes designados polo comité de empresa.
Artigo 17º.-Excedencias.
A excedencia poderá ser voluntaria ou forzosa, nos termos contidos nos puntos seguintes:
1. Excedencia forzosa.
Serán causa dela:
a) A designación ou elección para un cargo público que imposibilite a asistencia ó traballo.
b) A prestación do servicio militar ou prestación social substitutoria, e polo tempo da súa duración.
c) O exercicio de funcións sindicais de ámbito provincial ou superior, e sempre que a central sindical á que pertenza o traballador teña no sector a representatividade que estipula a lei.
d) Calquera outra causa que legalmente se estableza.
O traballador que desfrute de excedencia forzosa ten dereito a reserva do posto de traballo e cómputo da antigüidade e durante todo o tempo que permaneza nesta situación.
Desaparecida a causa que motivou a excedencia, o traballador deberá solicita-la reincorporación á institución no prazo de 30 días naturais desde que se produza tal circunstancia, debendo reincorporarse á súa tarefa no prazo máximo de sete días contados desde a súa solicitude de reincorporación. De non facelo así perderá todo dereito á reserva do posto de traballo e demais circunstancias propias da excedencia forzosa.
2. Excedencia voluntaria.
Concederáselle ó traballador, logo de petición por escrito con 30 días de antelación, que teña polo menos un ano de antigüidade na institución, e que non lle fose concedida outra excedencia voluntaria durante os catro anos anteriores.
O permiso de excedencia voluntaria concederase por un mínimo dun ano con reserva do posto de traballo. Poderá ser prorrogable ata cinco anos, con preferencia ó reingreso, neste caso, no posto de traballo que desempeñase, sempre que este non fose cuberto por outro traballador, podendo en caso contrario optar entre o reingreso nun posto de traballo de igual categoría e funcións similares, se o houbese dispoñible, ou esperar a que se produza unha vacante no posto que desempeñaba con anterioridade a solicita-la excedencia.
Durante o tempo de excedencia voluntaria non se computará a antigüidade.
A reincorporación ó posto de traballo, unha vez rematado o período de excedencia e conforme o expresado no parágrafo 2º do presente artigo, deberá realizarse ó día seguinte do dito remate.
Se a concesión da excedencia voluntaria fose motivada polo desfrute dunha bolsa, viaxe de estudios ou participación en cursos de perfeccionamento propios da especialidade do traballador, e non excedese dun ano, computaráselle a antigüidade durante o dito período e terá dereito a reincorporarse ó posto de traballo no que estivese desempeñando o seu labor, ó que se deberá reintegrar no prazo máximo de 7 días desde o remate da causa que motivou a solicitude de excedencia. Para a concesión neste caso, e aplicación dos beneficios correspondentes, o traballador deberá xustificar previamente o motivo da súa solicitude, así como determina-lo período no que se vai encontrar en situación de excedencia.
3. Excedencia especial por maternidade.
Os traballadores terán dereito a un período de excedencia, non superior a tres anos, para atende-lo coidado de cada fillo, tanto cando o sexa a natureza como por adopción, e contado desde o momento do nacemento de cada un dos fillos ou da adopción legal, se é o caso.
O nacemento ou adopción de novos fillos xerará o dereito a futuras e sucesivas excedencias, que en todo caso porán fin á anterior que se estivese desfrutando.
O período no que o traballador permaneza en situación de excedencia conforme o aquí establecido, será computable para efectos de antigüidade, e o traballador terá dereito á asistencia a cursos de formación profesional á participación dos cales será convocado pola entidade, especialmente con ocasión da súa reincorporación.
O traballador terá dereito, durante o primeiro ano de permanencia en excedencia, á reserva do seu posto de traballo. Transcorrido o dito prazo, a reserva quedará referida a un posto de traballo do mesmo grupo profesional ou categoría equivalente.
Esta opción poderá ser exercida por un dos pais ou proxenitores no caso de que ámbolos dous traballen.
Artigo 18º.-Xubilación.
Establécese como data tope para acceder á xubilación o ano no que o traballador cumpra os 65 anos de idade, e sempre e cando cotizase o tempo mínimo requirido para ter dereito a percibi-las prestacións correspondentes, podendo en caso contrario permanecer en alta na entidade ata completa-lo dito período mínimo.
Como excepción ó parágrafo anterior, e como medida de fomento do emprego, acórdase que os traballadores con 64 anos de idade que desexen acollerse á xubilación anticipada co 100% da prestación, sempre que reúnan os requistos de carencia e cotización correspondentes, poderán facelo, estando neste caso a entidade obrigada a substituílos na forma e condicións que veñen reguladas polo Real decreto 1194/1985, do 17 de xullo.
Así mesmo, todo traballador que cumpra os requisitos da lexislación vixente poderá acollerse a unha xubilación anticipada.
No caso de xubilación anticipada, cada traballador terá dereito a percibir, en concepto de premio por vinculación, unha cantidade que será negociable en cada caso particular e que estará en función da súa antigüidade na institución.
Capítulo V
Réxime retributivo
Artigo 19º.-Disposicións xerais.
A retribución do persoal afectado polo presente convenio estará integrada polos seguintes conceptos:
a) Salario base.
b) Antigüidade.
c) Outros complementos.
d) Pagas extraordinarias.
Para o exercicio de 1998 incrementaranse tódolos conceptos salariais segundo o IPC, garantindo o IPC real.
Artigo 20º.-Salario base.
Constitúeo a retribución do traballador, que virá determinada polo grupo e a categoría profesional á que pertenza. Se a xornada realizada fose inferior á pactada no presente convenio, o salario base reducirase proporcionalmente.
Artigo 20º bis.-Garantía de mínimos.
Para o caso dos traballadores de axuda a domicilio, garantiráselles con efectos desde o 1 de maio de 1998, un salario mínimo equivalente a 30 horas de traballo semanais, con independencia de que as realizasen ou non, podendo percibir cada un dos traballadores e a título individual, un salario superior en función das horas efectivamente realizadas.
É competencia de Cáritas Interparroquial a distribución dos servicios, para poder garantir este salario
mínimo para tódolos traballadores de axuda a domicilio, de tal maneira que, se algún deles se negase a aceptar, polo motivo que fose, o ou os servicios asignados, perderá tamén a garantía de mínimos do presente artigo.
Artigo 21º.-Antigüidade.
O persoal afectado polo presente convenio terá dereito a percibir en concepto de antigüidade, por cada tres anos de traballo efectivo, o 5% do salario base da súa categoría profesional, computándose cada trienio a partir do día 1 do mes que corre ou do día 1 do mes seguinte, dependendo de que a data en que se cumpra o dito trienio pertenza á 1ª ou á 2ª quincena, e co límite máximo do 60%.
Os traballadores que no momento da sinatura deste convenio estivesen percibindo unha cantidade superior á que resultase de aplica-lo parágrafo anterior, percibirán, ademais das cantidades que lles correspondesen por antigüidade segundo se dispón no presente artigo, a diferencia que resulte en concepto de complemento persoal.
Artigo 22º.-Complementos persoais.
Poderá establecerse entre cada traballador e a entidade, un complemento persoal na contía que se acordará en cada caso, e que se aboará nas doce pagas mensuais.
Así mesmo, establécese, con carácter único no momento da sinatura do presente convenio, a absorción dos complementos persoais actuais na nova táboa salarial.
Artigo 22º bis.-Complemento por posto de traballo.
Determinados postos de traballo que requiran unha especial dedicación ou responsabilidade gozarán deste complemento na contía dun 10% sobre o salario base.
Artigo 23º.-Complemento de transporte.
Os auxiliares de axuda a domicilio, que teñan que realizar desprazamentos intermedios nas súas asistencias, percibirán un complemento por transporte de 200 ptas. por cada desprazamento. A dita cantidade revisarase anualmente e de forma independente ó resto dos conceptos retributivos, en función do custo obxectivo do transporte.
Artigo 24º.-Complemento de penosidade na asistencia domiciliaria.
Os auxiliares de axuda a domicilio que realicen funcións que requiran un maior esforzo e/ou dificultade en función do grao de incapacidade da persoa asistida, ou da deterioración ambiental dos domicilios ós que acudan, percibirán este complemento nas contías e circunstancias que se especifican no anexo II.
Artigo 25º.-Complemento por traballo en festivo.
A entidade aboaralle ó traballador, mensualmente, un complemento polos días festivos do dito mes nos que o traballador realizase as súas tarefas normais.
O dito complemento equivalerá a un 20% sobre o salario base diario, multiplicado polo número de días festivos traballados.
Artigo 26º.-Pagas extraordinarias.
A entidade aboará, ademais das doce mensualidades, unha paga extraordinaria no mes de xullo e outra no mes de decembro, por un importe equivalente a 30 días de salario base, incluída a antigüidade, se é o caso. Estas pagas devengaranse por semestres naturais cada ano. O persoal que ingrese ou cese durante o ano percibirá estas pagas extraordinarias en proporción ó tempo traballado no semestre correspondente a cada paga.
O persoal que non traballe a xornada completa percibirá por este concepto a parte proporcional correspondente.
Artigo 27º.-Atrasos.
No caso de que a un traballador lle remate o contrato durante a vixencia do convenio, independentemente de que asine a liquidación, aboaránselle con efectos retroactivos os atrasos que lle puidesen corresponder, e de acordo co incremento do IPC.
Artigo 28º.-Aboamento de haberes.
Tanto as pagas mensuais como as extraordinarias se ingresarán mediante transferencia bancaria na conta corrente elixida polo traballador dentro do territorio nacional, o último día do mes no caso das nóminas mensuais, e os días 15 de xullo e 15 de decembro para as pagas extraordinarias de xuño e Nadal, respectivamente. Se fosen festivos aboaranse o día hábil inmediatamente anterior.
Artigo 29º.-Complemento por ILT.
Os traballadores en situación de incapacidade laboral transitoria, e durante un período de ata 12 meses, recibirán o complemento necesario ata completa-lo 100% da retribución mensual ordinaria que lles correspondería se puidesen desenvolve-las súas actividades laborais, e a teor do percibido no mes anterior á data de baixa.
Artigo 30º.-Horas extraordinarias.
Terán a consideración de horas extraordinarias aquelas que consideradas no seu conxunto diario, semanal ou anual, excedan da xornada pactada no presente convenio.
A realización das ditas horas extraordinarias será con ocasión de situacións excepcionais.
As horas extraordinarias aboaranse ó 175% sobre o valor do salario/hora ordinario.
As ditas horas non poderán superar en todo caso o tope máximo de 70 horas, debendo ser comunicadas ó comité de empresa.
Capítulo VI
Seguridade e hixiene
Artigo 31º.-Saúde laboral.
De conformidade co disposto na Lei de prevención de riscos laborais, os trabalaldores teñen dereito a unha protección eficaz en materia de seguridade e saúde no traballo. O citado dereito supón a existencia
dun correlativo deber de Cáritas Interparroquial na protección dos traballadores ó seu servicio fronte ós riscos laborais.
En cumprimento do deber de protección, a entidade deberá garanti-la seguridade e a saúde dos traballadores ó seu servicio en tódolos aspectos relacionados co traballo. Igualmente, a entidade está obrigada a garantir unha formación práctica e adecuada nestas materias a tódolos traballadores.
Correspóndelle a cada traballador velar en e polo cumprimento das medidas de prevención que en cada caso sexan adoptadas.
Así mesmo, observarase o disposto nas demais normas sobre seguridade e hixiene no traballo vixentes en cada momento.
Crearase o comité de seguridade laboral, de forma paritaria e coas funcións e desenvolvemento establecidos na Lei de prevención de riscos laborais.
Artigo 32º.-Recoñecementos médicos.
O traballador ten dereito, e á vez obriga, de someterse ás revisións médicas, tanto previas ó ingreso ó posto de traballo como as periódicas que sexan aconselladas ou propostas tanto pola entidade como polos organismos oficiais competentes, así como a de someterse ós medios profilácticos ou de vacinación que sexan obrigatoriamente indicados por eles, coa salvagarda do seu dereito constitucional á intimidade.
Todo traballador será informado de maneira conveniente e confidencial dos resultados dos exames de saúde ós que fose sometido.
Artigo 33º.-Roupa de traballo.
Cáritas Interparroquial da Coruña facilitaralles ós seus traballadores a roupa de traballo adecuada e en cantidade suficiente para o desempeño dos seus cometidos específicos, contra o reintegro da deteriorada. O traballador estará obrigado a usar, durante a realización da súa tarefa, a roupa facilitada pola entidade, así como a coidala.
En caso de que a deterioración ou perda se produza por neglixencia do traballador, este deberá procurarse pola súa conta a roupa que sexa necesaria.
Queda prohibida a utilización desta roupa de traballo para tarefas persoais ou de calquera outra índole que non sexan as propias de Cáritas.
Artigo 34º
No caso de que calquera dos traballadores se vise afectado por calquera tipo de enfermidade sobrevida por contaxio ó desempeña-lo seu traballo, observarase o que dispoña a autoridade sanitaria.
Artigo 34º bis.-Prestación por morte ou invalidez.
Tódolos traballadores contarán cun seguro de accidentes, que contratará a entidade pola súa conta e cargo, e que cubrirá os accidentes ocorridos ós traballadores como consecuencia da realización do seu traballo ou nos seus desprazamentos cara a ou desde este, e dos que resulte morte, invalidez permanente ou total, absoluta ou gran invalidez, e a súa garantía será en tódolos casos de 3.000.000 de pesetas por cada traballador.
Capítulo VII
Dereitos sindicais
Artigo 35º.-Dereito de sindicación.
A entidade respectará o dereito de tódolos traballadores a se sindicaren libremente.
Non poderá condiciona-la ocupación dun traballador o feito de que estea ou non afiliado ou renuncie á súa afiliación sindical, e tampouco poderá incomodalo ou prexudicalo de ningunha outra forma a causa da súa afiliación ou actividade sindical.
Artigo 36º.-Dereito de participación.
Todo traballador ten dereito a participar de forma activa nos órganos de representación, na forma regulada polo Estatuto dos traballadores.
Así mesmo, poderanse celebrar reunións, recoller cotas e distribuír información sindical fóra das horas de traballo e sen perturba-la actividade normal.
Cando por traballarse en quendas, por insuficiencia dos locais, ou por calquera outra circunstancia, non poida reunirse simultaneamente todo o cadro de persoal sen prexuízo ou alteración no normal desenvolvemento da actividade, as diversas reunións parciais que teñan que celebrarse consideraranse como unha soa e datadas no día da primeira. En todo caso, manteranse uns servicios mínimos, cando así sexa necesario, establecidos de común acordo entre a entidade e os representantes dos traballadores, que garantan a cobertura e atención necesaria da actividade.
Artigo 37º.-Dereito de información.
A entidade facilitará taboleiros de anuncios para que, baixo a responsabilidade dos representantes sindicais na publicidade ou comunicacións asinadas polos sindicatos, se coloquen aqueles avisos e comunicacións que teñan que efectuar e se crean pertinentes. Os ditos taboleiros distribuiranse nos puntos e lugares visibles para permitir que a información lles chegue facilmente ós traballadores.
Artigo 38º.-Dereito supletorio.
En todo o non previsto no presente convenio en materia de dereitos de representación colectiva, reunión, liberdade sindical e participación, folga e conflictos colectivos, observarase o que se dispoña na lexislación vixente en cada momento.
Capítulo VIII
Infraccións laborais
Artigo 39º.-Disposicións xerais.
Os traballadores poderán ser sancionados pola entidade, en virtude de incumprimentos laborais e de acordo coa graduación das faltas e sancións que se establecen nos seguintes artigos, sendo o Estatuto dos traballadores, o Código penal, a Lei 8/1988, do 7 de abril e o Real decreto 396/1996, do 1 de marzo, en materia de infracción e sancións, dereito supletorio nesta materia.
Como excepción ó contido nos artigos 40, 41 e 42 en materia de faltas de asistencia e puntualidade, no caso dos traballadores de axuda domiciliaria, terase un especial coidado nas sancións pola dificultade que supón a proba ou o desistimento na imputación da dita falta.
Artigo 40º.-Faltas leves.
Son faltas leves:
1. O atraso e a neglixencia no cumprimento das súas funcións, así como a indebida utilización dos locais, materiais, informacións ou documentos da empresa, agás que pola súa manifesta gravidade poida ser considerada como falta grave ou moi grave.
2. A non comunicación coa debida antelación da falta de asistencia ó traballo por causa xustificada, agás que se probe a imposibilidade de facelo.
3. As faltas repetidas de puntualidade sen causa xustificada, e en número de tres a cinco cometidas nun período dun mes.
4. Non comunicarlle á entidade os cambios persoais que poidan afectar ás prestacións coa Seguridade Social ou á relación coa Facenda pública.
5. A negativa rotunda a pasa-las revisións médicas recollidas no artigo 32º do presente convenio.
Artigo 41º.-Faltas graves.
Terán a consideración de faltas graves:
1. A falta de disciplina no traballo.
2. A falta de asistencia ó posto de traballo sen causa xustificada.
3. As faltas repetidas de puntualidade sen causa xustificada durante máis de cinco días ó mes e menos de dez.
4. O abandono inxustificado do posto de traballo.
5. A reincidencia na comisión dunha falta leve, aínda que sexa de diferente natureza e dentro dun mesmo trimestre, sempre que se produza sanción por ese motivo.
6. A ausencia de notificación, nun prazo de 24 horas, da situación de baixa por IT.
7. A neglixencia no traballo que afecte negativamente á súa marcha.
8. A simulación de enfermidade ou accidente.
9. As discusións públicas con compañeiros no centro de traballo.
Artigo 42º.-Faltas moi graves.
Serán cualificadas como faltas moi graves as seguintes:
1. Dar a coñecer procesos patolóxicos e datos íntimos dos usuarios.
2. A fraude, a deslealdade e o abuso de confianza nas xestións encomendadas, e calquera conducta constitutiva de delicto doloso.
3. A falta de asistencia ó traballo non xustificada e durante máis de tres días ó mes.
4. As faltas reiteradas e inxustificadas de puntualidade durante máis de dez días ó mes ou durante máis de trinta días no trimestre.
5. Os malos tratos de palabra ou obra, psíquicos ou morais, inflixidos ós usuarios, compañeiros de traballo de calquera categoría ou a familiares de calquera deles, así como os abusos de autoridade.
6. A obtención de beneficios económicos ou en especie dos usuarios.
7. Apropiarse de obxectos, documentos, material ou calquera outro efecto persoal dos usuarios ou dos traballadores.
8. A neglixencia na administración da medicación.
9. Facer públicos datos persoais e/ou teléfonos dos usuarios, familiares e compañeiros de traballo, a persoas alleas a eles.
10. Os actos ou conductas verbais ou físicas de natureza sexual ofensivas dirixidas cara a calquera traballador, sendo de máxima gravidade aquelas que sexan exercidas desde posicións de mando ou xerarquía, as realizadas cara a persoas con contrato non indefinido, ou as de represalia contra as persoas que as denunciasen.
11. O indisciplina ou desobediencia no traballo.
12. A diminución voluntaria e continuada do rendemento normal do traballo, cando supoña neglixencia por parte do traballador.
13. A embriaguez ou toxicomanía.
14. A reincidencia na comisión dunha falta grave, aínda que sexa de natureza distinta, sempre que se produza sanción por ese motivo.
Artigo 43º.-Sancións.
As sancións que poderán impoñerse, en función da cualificación das faltas, serán as seguintes:
A) Por faltas leves:
* Amoestación por escrito.
* Suspensión de emprego e soldo ata tres días.
* Desconto proporcional das retribucións que sexan correspondentes ó tempo real deixado de traballar por faltas de asistencia ou puntualidade non xustificadas.
B) Por faltas graves:
* Suspensión de emprego e soldo de tres días a un mes.
* Desconto proporcional das retribucións que sexan correspondentes ó tempo real deixado de traballar por faltas de asistencia ou puntualidade non xustificadas.
C) Por faltas moi graves:
* Suspensión de emprego e soldo de un a tres meses.
* Despedimento.
Artigo 44º.-Tramitación.
As sancións comunicaránselle motivadamente e por escrito ó interesado para o seu coñecemento e efectos,
dándose notificación ó comité de empresa ou delegados de persoal.
Para a imposición de sancións por falta moi grave, será preceptiva a instrucción de expediente sumario. Este expediente incoarase logo do coñecemento da infracción, remitíndolle ó interesado prego de cargos con exposición breve dos feitos supostamente constitutivos de falta. Deste expediente darase traslado ó comité de empresa ou delegados de persoal para que, ámbalas partes e no prazo de cinco días, poidan manifestarlle á dirección o que consideren conveniente para o esclarecemento dos feitos. Transcorrido o dito prazo, e aínda que o comité, o traballador, ou ámbolos dous, non fixesen uso do dereito que se lles concede a formularen alegacións, procederase a impoñerlle ó traballador a sanción que se considere oportuna de acordo coa gravidade da falta cometida e o estipulado no presente convenio.
É absolutamente indispensable a tramitación de expediente contradictorio para a imposición das sancións, calquera que fose a súa gravidade, cando se trate de membros do comité de empresa ou delegados de persoal.
Artigo 45º.-Prescrición.
As faltas leves prescribirán ós trinta días, as graves ós sesenta días e as moi graves ós noventa días a partir da data na cal se tivese coñecemento, e en todo caso ós seis meses de se teren cometido.
Artigo 46º.-Infraccións da empresa.
Cualificaranse como infraccións laborais da empresa, as accións ou omisións contrarias ás disposicións legais en materia de traballo, ó presente convenio colectivo, e ás demais normas que sexan de aplicación vixentes en cada momento.
Sancionarase a obstaculización do exercicio das liberdades públicas e dos dereitos xudiciais.
As ditas infraccións tramitaranse de acordo coa normativa vixente.
Disposición adicional
Primeira.-Constitúese unha comisión paritaria que cumprirá as seguintes funcións:
-Interpretación das cláusulas deste convenio.
-Aplicación do pactado e vixilancia do seu cumprimento.
-Mediación, arbitraxe e conciliación no caso de conflicto colectivo, cando sexa solicitado por instancia dun dos seus órganos.
A comisión paritaria estará integrada por dous órganos, un en representación do sector social e outro en representación do sector empresa; cada un estará integrado por tres representantes, pertencentes á comisión negociadora. Ámbalas partes poderán ser asistidas por un asesor, con voz pero sen voto. Os acordos da comisión paritaria requirirán, validamente constituída, a asistencia á reunión de dous membros de cada unha das representacións.
ANEXO I
Táboas de salarios
mes/día Pto. traballo 5% festivo/día mes/día Pto.traballo 5% festivo/díaAno 1997 Ano 1998
Categoría profesional Salario base
Comple.
Trienios
Plus
Salario base
Complem.
Trienios
Plus
Titulados superiores Director centro 120.000 12.000 6.000 865 122.520 12.250 6.125 885 Médico 120.000 6.000 800 122.520 6.125 815 Outros titulados superiores 120.000 6.000 800 122.520 6.125 815
Titulados medios Coordinador centro 110.000 11.000 5.500 800 112.310 11.230 5.615 815 Asist. Soc./Diplom. Trab. Social 110.000 5.500 735 112.310 5.615 750 ATS/DUE 110.000 5.500 735 112.310 5.615 750
Persoal administrativo Administrativo 100.000 5.000 670 102.100 5.105 685 Auxiliar administrativo 75.000 3.750 500 76.575 3.830 510
Profesionais de oficio Encargado quenda 70.000 7.000 3.500 515 71.470 7.150 3.575 525 Cociñeira 80.000 4.000 535 81.680 4.085 545
Persoal subalterno Conserxe 85.000 4.250 570 86.785 4.340 580 Porteiro 75.000 3.750 500 76.575 3.835 510 Auxiliar servicios xerais 70.000 3.500 470 71.470 3.575 480 Auxiliar domicilio 410 20,5 420 21
ANEXO II
Complemento penosidade en asistencia domiciliaria
Ano 1997 Ano 1998
Nivel 0 0 ptas./hora Nivel 0 0 ptas./hora Nivel 1 90 ptas./hora Nivel 1 92 ptas./hora Nivel 2 180 ptas./hora Nivel 2 184 ptas./hora
7981
