O Decreto 92/1988, do 28 de abril, polo que se regulan os órganos de goberno dos centros públicos de ensino non universitario, modificado polo Decreto 279/1990, do 27 de abril, establece no seu artigo 29 que o procedemento de elección dos membros do consello escolar dos centros públicos se desenvolverá no primeiro trimestre do curso académico que corresponda e dentro do período lectivo, e que a data de celebración das eleccións será fixada, cun mes de antelación, pola Consellería de Educación e Ordenación Universitaria.

O Decreto 374/1996, do 17 de outubro, polo que se aproba o Regulamento orgánico das escolas de educación infantil e dos colexios de educación primaria, e o Decreto 324/1996, do 26 de xullo, polo que se aproba o Regulamento orgánico dos institutos de educación secundaria, establecen ámbolos dous nos seus artigos 49 que a elección do consello escolar e a súa constitución nos centros de nova creación se efectuará no mes de outubro, e que a primeira renovación do consello escolar se producirá ó cabo dun ano ou dous de maneira que coincida coa renovación do resto dos consellos escolares no ámbito da Comunidade Autónoma.

Por outra parte, a Orde do 21 de outubro de 1996 (DOG do 22), pola que se determinan aspectos para a elección dos membros do consello escolar nos centros docentes non universitarios sostidos con fondos públicos, establece o procedemento de integración no consello escolar dos profesores, dos alumnos e dos pais dos alumnos do primeiro ciclo da educación secundaria obrigatoria que cursen estudios nun centro de primaria, e determina a composición dos consellos escolares dos institutos de educación secundaria con menos de oito unidades.

Por corresponderlle no curso 1998-99 a renovación dos consellos escolares dos centros docentes non universitarios sostidos con fondos públicos, esta dirección xeral, en uso das atribucións expresadas no artigo 29 do Decreto 92/1988, do 28 de abril,

RESOLVE:

Artigo 1º

O obxecto desta disposición é fixa-las datas para a elección dos representantes dos distintos sectores da comunidade educativa no consello escolar dos centros docentes non universitarios sostidos con fondos públicos.

Artigo 2º

1. As eleccións dos representantes dos distintos sectores da comunidade educativa no consello escolar celebraranse entre os días 23 e 30 de novembro de 1998, ámbolos dous incluídos.

2. A xunta electoral regulada no artigo 30 do Decreto 92/1988, do 28 de abril, segundo a nova redacción dada polo Decreto 324/1996, do 26 de xullo, polo que se aproba o Regulamento orgánico dos institutos de ensino secundario, constituirase entre os días 3 e 7 de novembro de 1998.

3. De conformidade co establecido no artigo 31 b) do Decreto 92/1998, do 28 de abril, é competencia da xunta electoral concreta-lo calendario escolar. As xuntas electorais terán presente, en todo caso, que o prazo de admisión de candidatos non deberá ser inferior a sete días naturais.

Artigo 3º

Os centros que comezaron o seu funcionamento no curso 1997-98 levarán a cabo a primeira renovación do consello escolar prevista nos artigos 49 do Decreto 374/1996, e do Decreto 324/1996, de acordo co calendario xeral establecido no artigo 2º desta resolución.

Artigo 4º

As eleccións para a primeira constitución do consello escolar nos centros que iniciaron o seu funcionamento no curso 1998-99 celebraranse entre os días 15 e 31 de outubro de 1998:

a) Para os centros de educación infantil, primaria e secundaria, de acordo coa orde desta consellería do 21 de outubro de 1996 (DOG do 22 ).

b) Para centros públicos de ensino non universitario de características singulares, de educación especial e de educación de adultos, de acordo coa orde desta consellería do 29 de outubro de 1996 (DOG do 4 de novembro), corrección de erros DOG do 15 de novembro de 1996.

Artigo 5º

As eleccións para a constitución do consello escolar nos colexios públicos integrados celebraranse entre os días 9 e 19 de decembro de 1998, ámbolos dous inclusive.

Artigo 6º

Os centros en cada renovación parcial modificarán o número de membros do consello escolar en función do número de unidades que teñan nese momento.

Artigo 7º

Ós membros integrantes da xunta electoral, das mesas electorais e os electores que necesiten permiso laboral para o desempeño das súas obrigas seralles de aplicación o artigo 70.2º da Lei 4/1988, do 26 de maio (DOG do 1 de xuño), da función pública de Galicia. Non obstante, os días en que se celebren as eleccións de representantes dos distintos sectores da comunidade educativa non poderán ser declarados non lectivos.

Artigo 8º

Esta resolución entrará en vigor o mesmo día da súa publicación no Diario Oficial de Galicia.

Santiago de Compostela, 10 de setembro de 1998.

Severino Somoza Gómez

Director xeral de Centros e Inspección Educativa

8717