A Lei 13/1991, do 9 de decembro, de taxas, prezos e exaccións reguladoras da Comunidade Autónoma de Galicia establece a posibilidade de obtención de recursos por parte dos órganos da Administración, entes ou organismos autónomos.
O artigo 5, da citada lei sinala que «son prezos privados as contraprestacións que obteñan os órganos da Administración, entes e organismos autónomos como consecuencia da cesión ou alleamento de bens ou da prestación de servicios sempre que exista oferta privada con corrente».
Así mesmo, a Lei 8/1998, do 19 de xullo, de estatística de Galicia, establece, no seu artigo 42.5º, como un dos medios económicos cos que contará o IGE para o cumprimento dos seus fins, os ingresos obtidos polas súas actividades de xestión e explotación, así como os dos servicios que poidan realizar.
Na súa virtude, vista a proposta formulada polo Instituto Galego de Estatística, esta consellería
DISPÓN:
Artigo 1º
A presente orde ten por obxecto o establecemento das normas de xestión do prezo 36.30.00 «reproducción parcial mediante fotocopia de publicacións e outros documentos elaborados polo IGE» para aplicar pola prestación do dito servicio.
Artigo 2º
O pagamento des servicios poderá efectuarse ben mediante ingreso a nome do IGE -de acordo coa normativa vixente de prezos privados-, ou ben directamente na súa sede mediante a adquisición da tarxeta correspondente.
Artigo 3º
As tarifas que deberán aboa-los usuarios son as seguintes:
-Tarifas reproduccións:
*Fotocopia simple:
DIN A4: 10 pesetas/copia.
DIN A3: 25 pesetas/copia.
*Fotocopias remitidas por correo:
1ª páxina: 50 pesetas/copia.
2ª páxina e seguintes: 25 pesetas/copia.
*Fotocopias enviadas por fax:
1ª folla que inclúe cabeceira da mensaxe: 150 pesetas.
2ª folla e seguintes: 75 pesetas.
Artigo 4º
As tarifas incluídas na presente orde entenderase, se é o caso, co IVE incluído.
Artigo 5º
Os ingresos xerados pola prestación do servicio aplicaranse ó orzamento do IGE.
Artigo 6º
Os prezos aprobados pola presente orde non serán de aplicación ós profesores que impartan as actividades organizadas polo IGE, ós beneficiarios das súas bolsas e axudas mentres dure o seu período de desfrute, así como ós medios de comunicación social.
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 20 de agosto de 1998.
José A. Orza Fernández
Conselleiro de Economía e Facenda
8132