Dentro do plan de actividades da EGAP para 1998, e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse cinco cursos sobre arquivos administrativos na Administración local, que deberán desenvolverse conforme as seguintes bases:
Primeira.-Obxectivos.
Estudio das técnicas arquivísticas aplicables ós arquivos administrativos e as relacións entre o arquivo central e os arquivos de xestión.
Segunda.-Destinatarios.
Persoal ó servicio das entidades locais, preferentemente C e D, que teñan ó seu cargo os arquivos municipais.
Terceira.-Solicitudes.
1. As persoas que desexen participar nos cursos programados deberán solicitalos no modelo oficial de instancia que figura ó final da convocatoria cuberta en tódolos epígrafes. Cando solicite o curso máis dun interesado da mesma corporación, o responsable do persoal poderá especifica-la orde de preferencia. No caso de que non se especifique, a EGAP aplicarálle-los criterios de selección ós que se fai referencia na base sétima.
2. A falsidade ou a ocultación de datos esenciais para a selección será motivo de exclusión automática.
Cuarta.-Tramitación de solicitudes.
As solicitudes irán dirixidas ó director da Escola Galega de Administración Pública e presentaranse no Rexistro da EGAP, polígono das Fontiñas 2-4, 15707 Santiago de Compostela, ou tramitaranse por calquera das outras formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Seguidamente efectuarase a selección dos participantes e esta notificaráselles directamente ós admitidos.
Quinta.-Prazo.
O prazo de presentación de instancias será de 15 días naturais, contados a partir da data de publicación da convocatoria.
Sexta.-Selección.
Os criterios de selección, dirixidos a concilia-las necesidades da organización na que prestan servi
cios os aspirantes e os intereses individuais destes, terán en conta a maior relación do posto de traballo desempeñado co contido do curso. Terán preferencia aqueles que non realizasen ningún curso de similares características ó convocado.
En calquera caso, os criterios de selección suxeitaranse ás directrices sinaladas na Resolución do 27 de xuño de 1994 (DOG nº 149 do 3-8-1994), pola que se fan públicos os criterios de participación nas actividades docentes da EGAP.
Sétima.-Modificacións.
A EGAP poderá modifica-lo desenvolvemento e mailo contido do curso anunciado para adaptalo ás necesidades da Administración e ás continxencias que poidan xurdir.
A EGAP reserva para si a facultade de anula-lo curso se o escaso número de solicitudes non xustificase a súa realización. Fíxase en 15 o número mínimo de asistentes.
Oitava.-Desenvolvemento.
8.1. Duración: 15 horas.
8.2. Lugares: Santiago de Compostela, A Coruña, Lugo, Ourense e Pontevedra
8.3. Datas: Pontevedra: 22, 23, 24, 28 e 29 de setembro.
Ourense: 21, 23, 24, 28 e 30 de setembro.
Santiago de Compostela: 28, 30 de setembro, 1, 5 e 7 de outubro.
Lugo: 5, 7, 8, 14 e 15 de outubro.
A Coruña: 19, 21, 22, 26 e 28 de outubro.
8.4. Horario: de 17 a 20 horas.
Novena.-Certificado de asistencia.
Outorgaráselle-lo certificado de asistencia ós alumnos que participen con regularidade no curso, e é obrigatoria a asistencia a tódalas sesións. Toda inasistencia deberá ser xustificada convenientemente, sen que poida exceder en ningún caso do 15% das horas lectivas programadas.
Unha inasistencia superior ó 15% das horas lectivas programadas, aínda que sexa xustificada, impedirá a expedición do correspondente certificado.
Décima.-Contido.
Os arquivos municipais: evolución histórica. Os arquivos de xestión: organización, métodos de ordenación, etc. O arquivo central: consulta e préstamo. As novas tecnoloxías nos arquivos municipais.
Santiago de Compostela, 20 de agosto de 1998.
Domingo Bello Janeiro
Director da Escola Galega de Administración Pública
7617