A Consellería de Cultura, Comunicación Social e Turismo, unha vez cumpridos os trámites administrativos correspondentes, resolveu anuncia-la licitación, mediante procedemento aberto por concurso e trámite de urxencia, dos seguintes contratos de consultoría e asistencia:
1. Redacción do proxecto básico e de execución e do estudio de seguridade e saúde da restauración de cuberta, supresión de humidades e limpeza e reparación de fábricas da Catedral de Mondoñedo (Lugo).
Orzamento de licitación: 3.621.464 pesetas (tres millóns seiscentas vinteúnha mil catrocentas sesenta e catro pesetas) IVE incluído.
Prazo de execución: un (1) mes.
Garantía provisional: non se esixe.
2. Redacción do proxecto básico e de execución e do estudio de seguridade e saúde de reposición das cubertas, impermeabilizacións, restauración de fábricas e vidreiras na Catedral de Lugo.
Orzamento de licitación: 4.692.033 pesetas (catro millóns seiscentas noventa e dúas mil trinta e tres pesetas) IVE incluído.
Prazo de execución: un (1) mes.
Garantía provisional: non se esixe.
3. Redacción do proxecto básico e de execución e do estudio de seguridade e saúde da intervención na Catedral de San Martiño, en Ourense.
Orzamento de licitación: 5.689.430 pesetas (cinco millóns seiscentas oitenta e nove mil catrocentas trinta pesetas) IVE incluído.
Prazo de execución: un (1) mes.
Garantía provisional: non se esixe.
Exposición da documentación: o prego de prescricións técnicas e o prego de cláusulas administrativas estarán de manifesto no Servicio de Obras e Contratación da Consellería de Cultura, Comunicación Social e Turismo, e nas delegacións provinciais durante o prazo de presentación de proposicións, das 10 ás 14 horas, e no teléfono 981 58 89 38.
Prazo de presentación de proposicións: será ata as 14 horas do décimo terceiro día natural, contado a partir do día seguinte ó da publicación da presente resolución no DOG.
Lugar de presentación de proposicións: no Rexistro xeral da consellería en sobres pechados e asinados polo licitador ou persoa que o represente. Se as proposicións se cursan por correo, haberá que aterse ó previsto na cláusula 7.2 do prego de cláusulas administrativas particulares.
Documentación que presentarán os licitadores: a establecida pola cláusula 7 do prego de cláusulas administrativas particulares. Os licitadores que se presenten a máis dunha contratación deberán presentar toda a documentación para cada un dos contratos.
Apertura de proposicións: será realizada pola mesa de contratación ás 11 horas do quinto día natural seguinte ó do remate do prazo de admisión de proposicións na sala de xuntas da Consellería de Cultura, Comunicación Social e Turismo.
Se coincidise en sábado ou festivo, terá lugar o inmediato día hábil seguinte á mesma hora.
O importe do anuncio do presente concurso será por conta dos adxudicatarios.
Santiago de Compostela, 14 de agosto de 1998.
P.D (Orde 15-12-1997)
Andrés González Murga
Secretario xeral da Consellería de Cultura,
Comunicación Social e Turismo
7780