O Consello Regulador do Producto Galego de Calidade-Mexillón de Galicia, como entidade encargada de desenvolve-lo Plan integral de reestructuración do sector mexilloeiro galego, acollido á iniciativa comunitaria de pesca, fai unha convocatoria pública para o proceso de selección dos participantes no curso de capacitación directiva no sector mexilloeiro.
O obxectivo deste curso é o de forma-los alumnos naqueles aspectos estratéxicos e operativos básicos do sector mexilloeiro, para que poidan acada-la intregración nas asociacións, cooperativas e empresas con garantías de éxito.
Os labores formativos completaranse cunha bolsa de prácticas nas empresas e asociacións do sector cunha duración mínima de tres meses e máxima de cinco.
O programa terá un total de 120 horas lectivas e o número máximo de alumnos que se seleccionará será de 15.
Requisitos para poder participar:
-Estar en posesión do título de licenciado ou deplomado unversitario.
Procedemento de selección:
-Realizarase unha proba consistente nun test psicotécnico e unha entrevista persoal.
A comisión de selección estará composta polo presidente do consello, o xerente, dous membros da comisión de formación do consello, un representante da Dirección Xeral de Formación Pesqueira e Investigación, e un asesor da Escola de Negocios Caixavigo.
A comisión valorará:
-Expediente académico.
-Coñecemento de idiomas.
-Coñecemento ou experiencia no sector mexilloeiro.
Lugar e prazo de presentación de solicitudes:
As solicitudes, ademais dos documentos que os aspirantes consideren oportuno presentar, deberán ter como mínimo a seguinte información:
-Datos persoais e teléfono.
-Fotocopia compulsada do título de licenciado ou diplomado.
O prazo de presentación é de 15 días naturais, contados a partir do día seguinte ó da publicación deste anuncio, debendo presenta-la solicitude na sede social do consello: Niño do corvo, s/n, 36626 Illa de Arousa (Pontevedra). Tamén se poderá remitir por correo certificado ata a mesma data.
O xerente do Consello Regulador do Mexillón de Galicia. Producto Galego de Calidade.
Rubricado