Dentro do plan de actividades da Escola Galega de Administración Pública para 1998 e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase un curso de verán sobre a nova Lei da xurisdicción contencioso-administrativa, que deberá desenvolverse conforme as seguintes bases:
1. Obxectivos.
Mellora-la formación dos asistentes sobre os aspectos máis esenciais da nova Lei da xurisdicción contencioso-administrativa.
2. Contido.
Trataranse, entre outros, estes temas:
-Consideracións xerais sobre a nova lei e a xustificación da reforma.
-Ámbito, órganos e competencias da nova orde xurisdiccional contencioso-administrativa.
-Obxecto do proceso contencioso-administrativo.
-O procedemento: procedemento en primeira ou única instancia.
-O procedemento: a execución das sentencias.
3. Destinatarios.
Persoal ó servicio de calquera das administracións públicas galegas e interesados en xeral.
4. Desenvolvemento.
-Horario: mañá e tarde.
-Lugar e datas: o curso convocado terá lugar no salón Noray do Hotel Sada Marina (en Sada-A Coruña), os días 27 e 28 de xullo.
5. Inscrición.
-Prazo: remata o xoves, día 23 de xullo de 1998.
-Tramitación de solicitudes: as solicitudes irán dirixidas ó director da Escola Galega de Administración Pública Polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 37.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando, a partir do día 20 de xullo, por teléfono de 10 a 14 horas, ós seguintes números: 981 54 62 39 ou 981 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento deste curso, así como a de cancelalo se o escaso número de solicitudes non xustificase a súa realización.
7. Certificación de asistencia.
Entregaráselles, ó remate deste curso, a aqueles asistentes que concorresen asiduamente a este, cando a súa inasistencia non sexa igual ou superior ó 15% das horas lectivas programadas e, expresarase neste documento, a natureza da actividade e as datas da súa realización.
Santiago de Compostela, 6 de xullo de 1998.
Domingo Bello Janeiro
Director da Escola Galega de Administración
Pública
6653