A Lei de montes do 8 de xullo de 1957 e o seu regulamento aprobado por Decreto 485/1962, do 22 de febreiro, prevén a posibilidade de realización de proxectos de ordenación e plans técnicos de xestión en montes. Posteriormente, estes proxectos de ordenación e os plans técnicos de xestión foron obxecto de regulación nas ordes do 29 de decembro de 1970 e 29 de xullo de 1971 do Ministerio de Agricultura, aínda vixentes. A raíz da aprobación do Estatuto de autonomía para Galicia e en virtude do seu artigo 27.10º, é competencia exclusiva da Comunidade Autónoma o desenvolvemento normativo en materia de montes e aproveitamentos forestais.
A concorrencia de determinadas circunstancias como son a natureza dos proxectos de ordenación e dos plans técnicos de xestión como medios de planificación dos montes; a finalidade perseguida para unha óptima xestión forestal; o interese crecente demostrado polas comunidades de montes veciñais en man común á hora de elaboralos, e a vixente normativa fiscal en canto ás exencións de que son obxecto os propietarios dos montes con proxectos de ordenación e plans técnicos de xestión, aconsellan a creación dun Rexistro de Montes suxeitos a proxectos de ordenación e plans técnicos de xestión.
A súa creación permitiría por unha parte centraliza-la información sobre os montes que teñen proxectos de ordenación e plans técnicos de xestión, como medio para articular unha política axeitada e realista de xestión das propiedades forestais e un máis áxil e mellor servicio ós seus titulares e, por outra banda, facilita-la expedición das certificacións oportunas para acreditala aprobación dos ditos plans.
Na súa virtude, facendo uso das competencias que lle están atribuídas, esta consellería,
DISPÓN
Artigo 1º
Créase o Rexistro de Proxectos de Ordenación e Plans Técnicos de Xestión de Montes da Comunidade Autónoma de Galicia, que quedará adscrito á Dirección Xeral de Montes e Medio ambiente Natural da Consellería de Medio Ambiente.
Artigo 2º
Este rexistro terá por obxecto a inscrición de tódolos proxectos de ordenación e plans técnicos de xestión de montes aprobados pola Consellería de Medio Ambiente.
Artigo 3º
O rexistro será público e gratuito en canto se refira á inscrición e exame do seu contido.
Artigo 4º
O asentamento que se practique no rexistro deberá conte-los seguintes datos:
Nome do monte.
Situación xeográfica.
Superficie.
Titular.
Proxecto ou plan.
Data de aprobación e vixencia.
Outros datos relativos ó plan-especies incluídas e quendas.
Nº de expediente que estará integrado polos seguintes díxitos: código da provincia e número correlativo á súa data de presentación.
Artigo 5º
O prazo para practica-la inscrición non excederá dos 15 días seguintes á aprobación, mediante resolución da Dirección Xeral de Montes e Medio Ambiente Natural, do proxecto de ordenación ou plan técnico de xestión.
Artigo 6º
O acceso, para os efectos de expedición de certificacións polo rexistro, realizarase mediante instancia dirixida ó director xeral de Montes e Medio Ambiente Natural, ou ben directamente empregando os modelos normalizados que para tal efecto se faciliten no rexistro.
Artigo 7º
As certificacións serán emitidas polo responsable do rexistro e a súa expedición estará suxeita ás normas establecidas na Lei de taxas, prezos e exaccións reguladoras da Comunidade Autónoma.
Disposición transitoria
Os proxectos de ordenación e plans técnicos de xestión aprobados con anterioridade á presente orde poderán inscribirse no rexistro no prazo dun ano a partir da entrada en vigor desta.
Disposicións derradeiras
Primeira.-Facúltase a Dirección Xeral de Montes e Medio Ambiente Natural, para dictar cantas disposicións cumpran para a aplicación do disposto nesta orde.
Segunda.-A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 12 de xuño de 1998.
Carlos del Álamo Jiménez
Conselleiro de Medio Ambiente
5707