Ponse en coñecemento de tódolos interesados na concentración parcelaria da zona de Vilameá (A Pontenova-Lugo) que co obxecto de que tomen posesión delas, se poñen á disposición dos respectivos propietarios os predios de substitución, fixándose como data límite para a dita toma de posesión, a do 30 de setembro de 1998 e o 30 de xaneiro de 1999 para árbores madeireiras, por falta de acordo do seu propietario e o novo adxudicatario do predio en que se atopen.
Segundo establece o artigo 46 da Lei de concentración parcelaria para Galicia, do 14 de agosto de 1985, no prazo de 30 días hábiles, e contados desde o 1 de outubro de 1998, os interesados poderán reclamar, xuntando dictame pericial de todos e cada un dos predios, sobre diferencias superiores ó dous por cento, entre a cabida real dos novos predios e a que consta no expediente de concentración.
Conforme o artigo 45 da devandita lei, o propietario que non permita a toma de posesión dos predios será obxecto de compulsión directa, logo de apercibimento ou instrucción dun expediente incoado para o efecto.
Así mesmo, ponse en coñecemento de todos que a posesión dos predios de substitución outórgalles ós que no acordo de concentración figuren como adxudicatarios, os medios de defensa establecidos polas leis. Advírtese que todo aquel que non abandone a posesión na data antes fixada, poderá verse privado das colleitas, por falta de acordo do adxudicatario.
Lugo, 19 de maio de 1998.
Fernando López Gutiérrez
Xefe do Servicio de Desenvolvemento Rural
de Lugo
5161