Coa finalidade de que os estudiantes e recentemente titulados en especialidades agrarias adquiran maiores coñecementos prácticos nas materias propias dos seus estudios que lles permitan unha mellor preparación para o seu futuro profesional, esta consellería considera interesante establecer unha liña de axudas en forma de bolsas para prácticas.
En consecuencia, de acordo co disposto no artigo 30.I.1 e 3 do Estatuto de autonomía de Galicia, e en uso das facultades que me confire a Lei 1/1983, do 23 de febreiro, reguladora da Xunta e do seu presidente,
DISPOÑO:
Artigo 1º.-Obxecto.
Establécense axudas económicas, que no sucesivo denominaremos bolsas, para realizar prácticas en temas agrarios, conforme as bases contidas na presente orde.
Artigo 2º.-Finalidade.
As bolsas concederanse para o desenvolvemento de estudios e prácticas formativas en materia agraria. As prácticas realizaranse en empresas relacionadas co sector agrario, en industrias agroalimentarias e en unidades desta consellería, preferentemente nas axencias de extensión agraria e nos servicios de sanidade e producción animal.
Artigo 3º.-Carácter das bolsas.
As bolsas terán carácter formativo e non implican relación laboral nin administrativa entre os beneficiarios e as empresas e/ou a Consellería de Agricultura, Gandería e Política Agroalimentaria, aínda que si a necesaria dependencia administrativa en relación co horario, normas de réxime interno e disciplinas da empresa ou unidade administrativa onde se realicen as prácticas.
As bolsas tampouco darán lugar á súa inclusión na Seguridade Social. Nembargantes, suscribiráselles a tódolos bolseiros unha póliza colectiva de seguro de accidentes durante o tempo de duración das prácticas.
Artigo 4º.-Empresas interesadas.
As empresas relacionadas co sector agrario e as industrias agroalimentarias interesadas en acoller algún bolseiro das titulacións que se relacionan no artigo seguinte, durante un período de 2 meses e sen custo ningún para elas, solicitarano ante o conselleiro de Agricultura, Gandería e Política Agroalimentaria, antes do 15 de xuño do presente ano, tal e como se detalla no artigo 8º desta orde.
A solicitude presentarase segundo modelo E anexo debidamente cuberto, xunto coa seguinte documentación:
-Breve memoria, xustificando a petición e especificando a titulación do bolseiro que demandan, que se trataría de satisfacer na medida en que sexa posible.
-Fotocopia do CIF da empresa.
-Fotocopia do último TC2, para acredita-lo seu cadro de persoal.
Artigo 5º.-Destinatarios e número de bolsas.
Establécense 30 bolsas, que son destinadas ós estudiantes e titulados recentemente como enxeñeiros agrónomos, enxeñeiros técnicos agrícolas ou veterinarios.
Artigo 6º.-Duración e contía económica.
As bolsas terán unha duración de 2 meses, entre o 20 de xullo e o 19 de setembro do presente ano. Neste período o seu importe total será de 200.000 pesetas, a razón de 100.000 ptas./mes.
Artigo 7º.-Requisitos.
1. Poderán solicitar estas bolsas aquelas persoas que:
-Teñan a condición de galegos, ou que alomenos acrediten tres anos de residencia en Galicia.
-Obtivesen o título de enxeñeiro agrónomo, enxeñeiro técnico agrícola ou veterinario, con posterioridade ó 30 de xuño 1996, ou que estivesen matriculados nalgunha destas titulacións durante o curso 1997-98, nas derradeiras materias da súa carreira.
2. Unha mesma persoa poderá solicitar esta bolsa dúas veces, sempre que o faga unha vez como estudiante e a outra como titulado.
3. En calquera caso, estas bolsas son incompatibles co traballo remunerado de carácter fixo ou temporal durante o seu período de duración.
Artigo 8º.-Presentación de solicitudes e prazo.
As solicitudes irán dirixidas ó conselleiro de Agricultura, Gandería e Política Agroalimentaria, e presentaranse no rexistro xeral desta consellería, nas súas delegacións provinciais, ou do xeito previsto no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
O prazo de presentación de solicitudes de bolsas de prácticas remata o 15 de xuño do presente ano.
Artigo 9º.-Documentación.
A solicitude presentarase segundo modelo E anexo debidamente cuberto, xunto coa seguinte documentación:
-Fotocopia do DNI.
-Declaración do interesado, na que faga constar que cumpre os requisitos sinalados no artigo 7º desta convocatoria, e de que non incorre na incompatibilidade que se detalla nel.
-No caso dos titulados, copia compulsada do título ou xustificante de similar valía, expedido polo centro onde cursou os seus estudios.
-No caso dos estudiantes, copia compulsada da matrícula do curso 1997-1998, e xustificación expedida polo centro conforme son as derradeiras materias da súa carreira e non lle falta ningunha outra.
-Certificación das cualificacións da totalidade do expediente académico do solicitante, orixinal ou copia compulsada.
-Acreditación do coñecemento da lingua galega.
-Acreditación do coñecemento doutros idiomas e de informática.
Artigo 10º.-Selección das empresas.
Poderán seleccionarse ata 15 empresas titulares e 5 suplentes, para acolle-los titulados por un período de 2 meses, con bolsas da Consellería de Agricultura, Gandería e Política Agroalimentaria.
Terán preferencia aquelas empresas que:
-Teñan previsto amplia-lo seu cadro de persoal nos 6 meses seguintes ó da petición do bolseiro, sempre que o xustifiquen na memoria da solicitude.
-Ofrezan para o bolseiro un posto en prácticas adecuado á súa titulación.
Artigo 11º.-Selección dos beneficiarios
1. A selección dos bolseiros faraa unha comisión de valoración presidida polo director xeral de Industrias e Alimentación da Consellería de Agricultura, Gandería e Política Agroalimentaria, e da que tamén forman parte: como secretario un funcionario do Servicio de Fomento Asociativo, e como vocais o subdirector xeral de Industrias Agroalimentarias e o xefe do Servicio de Fomento Asociativo.
2. A selección realizarase tendo en conta o expediente académico completo de cada solicitante, segundo os tipos de bolsas e os méritos alegados.
3. O baremo que se vai aplicar será o seguinte:
-Valoración das cualificacións académicas:
* Matrícula de honor: 4 puntos.
* Sobresaliente: 3 puntos.
* Notable: 2 puntos.
* Aprobado: 1 punto.
* Suspenso ou non presentado: 0 puntos.
Estas puntuacións aplicaranse cando se obteñan en primeira convocatoria. Se non fose así, dividirase a nota acadada entre o número de convocatorias.
-Reducción ó mesmo número de asignaturas:
Suma de notas x 30
------------- = valor total do expediente académico.
Número de materias
-Outras valoracións:
Sempre que se acrediten documentalmente, tamén se poderán valorar:
* Coñecementos de galego: ata 4 puntos, (2 por iniciación e 2 por perfeccionamento).
* Coñecementos informáticos: ata 2 puntos.
* Coñecementos doutros idiomas: ata 2 puntos.
4. Na selección dos bolseiros teranse en conta as peticións das empresas no referente ás titulacións demandadas, sempre que sexa posible.
5. Seleccionaranse tantos candidatos a bolseiros como número de bolsas se convocan mediante a presente orde. Existirá unha lista de suplentes, coa finalidade de cubrir posibles baixas ou renuncias dos seleccionados.
6. A relación de seleccionados exporase nos taboleiros de anuncios da Consellería de Agricultura, Gandería e Política Agroalimentaria, tanto nos servicios centrais como nas delegacións provinciais.
Artigo 12º.-Adxudicación e pagamento.
1. As bolsas serán adxudicadas polo conselleiro de Agricultura, Gandería e Política Agroalimentaria, por proposta da comisión de valoración.
2. O pagamento farase por contías mensuais iguais, unha vez recibido o informe do xefe da unidade correspondente, ou do xerente da empresa, sobre o correcto desenvolvemento das prácticas.
3. O importe destas bolsas de prácticas sufragarase con cargo á aplicación orzamentaria 09.04.611A.481.0 Axudas a estudios e traballos sobre temas agrarios, dos orzamentos xerais da Comunidade Autónoma de Galicia para 1998, por un importe máximo de seis millóns cen mil pesetas, (6.100.000 ptas.).
Artigo 13º.-Perda da condición de bolseiro.
1. O bolseiro perderá a condición como tal cando:
-Deixe de asistir á unidade ou á empresa onde realiza as prácticas.
-O xefe da unidade ou o xerente da empresa onde realiza as prácticas emita informe negativo sobre a actitude do bolseiro no desempeño do labor encomendado.
2. Ó perde-la condición de bolseiro tamén deixará de percibi-lo importe correspondente, aplicándose esta condición con carácter retroactivo desde o primeiro día do mes que corre.
3. Os bolseiros que causen baixa serán substituídos, se é posible, por outros candidatos seleccionados na lista de suplentes.
Artigo 14º.- Seguro.
A Consellería de Agricultura, Gandería e Política Agroalimentaria destinará 100.000 pesetas para contratar unha póliza colectiva de seguro de accidentes para os 30 bolseiros durante o período de prácticas.
Disposicións derradeiras
Primeira.-Facúltase o director xeral de Industrias e Alimentación desta consellería para dicta-las normas necesarias para o correcto desenvolvemento da presente orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 19 de maio de 1998.
Cástor Gago Álvarez
Conselleiro de Agricultura, Gandería e Política Agroalimentaria
4827