Dentro do plan de actividades da Escola Galega de Administración Pública para 1998 e conforme as funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración co Instituto Galego de Consumo, unhas Xornadas sobre condicións xerais da contratación e da protección do consumidor, que deberán desenvolverse conforme as seguintes bases:
1. Obxectivos.
Procurar un coñecemento panorámico e completo da nova Lei estatal 7/1998, sobre condicións xerais da contratación, recentemente aprobada e promulgada en desenvolvemento da directiva europea sobre cláusulas abusivas. A nova lei, ademais, implica modificiacións de importancia sobre a lexislación xeral relativa á defensa e protección do consumidor.
2. Contido.
Trataranse, entre outros, estes temas:
A política europea de protección do consumidor e a Directiva 93/13/CEE.
As cláusulas abusivas nos contratos de adhesión.
A incorporación contractual das condicións xerais.
A ilicitude das cláusulas de submisión expresa.
Cláusulas de exoneración ou limitación da responsabilidade.
A impugnación xudicial das condicións xerais da contratación.
A nulidade parcial e a integración do contrato.
Aspectos rexistrais da Lei de condicións xerais da contratación.
3. Destinatarios.
Persoal ó servicio de calquera das administracións públicas galegas e interesados en xeral.
4. Desenvolvemento.
Horario: mañá e tarde.
Lugar e datas: as xornadas convocadas terán lugar no salón de actos da Escola Galega de Administración Pública (polígono das Fontiñas, Rúa de Madrid, 2-4, en Santiago de Compostela), os días 15, 16 e 17 de xuño.
5. Inscrición.
Prazo: remata o mércores, día 10 de xuño de 1998.
Tramitación de solicitudes: as solicitudes irán dirixidas ó director da Escola Galega de Administración Pública polígono das Fontiñas, Rúa de Madrid, 2-4, 15707, Santiago de Compostela), segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: (981) 54 63 37.
Número de prazas: limitado á capacidade do local.
Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, a partir do día 10 de xuño, por teléfono de 10 a 14.30 horas, ós seguintes números:(981) 54 62 39 ou (981) 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento das xornadas, así como a de cancelalas se o escaso número de solicitudes non xustificase a súa realización.
7. Certificación de asistencia.
Entregaráselles, ó remate destas xornadas, a aqueles asistentes que concorresen asiduamente a estas, cando a súa inasistencia non sexa igual ou superior ó 15% das horas lectivas programadas e, expresarase neste documento, a natureza da actividade e as datas da súa realización.
Santiago de Compostela, 18 de maio de 1998.
Domingo Bello Janeiro
Director da Escola Galega de Administración Pública
4790
