O Concello de Boiro (A Coruña), en sesión celebrada o día 22 de setembro de 1997, aprobou o proxecto de expropiación dos terreos para novos centros educativos, ampliación do parque da Cachada, piscina climatizada cuberta e pavillón polideportivo e na mesma sesión acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Urbanismo da Consellería de Política Territorial, Obras Públicas e Vivenda emitiu informe favorable.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque os terreos se precisan para poñelos á disposición da Consellería de Educación e Ordenación Universitaria co obxecto de construír un centro de ensino secundario obrigatorio e por outra banda amplia-lo actual parque da Cachada, garantindo deste xeito a existencia dunha zona verde como inmellorable contorno das instalacións.
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude e por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa reunión do día trinta de abril de mil novecentos noventa e oito,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Boiro (A Coruña), para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de expropiación dos terreos para novos centros educativos, ampliación do parque
da Cachada, piscina climatizada cuberta e pavillón polideportivo.
Santiago de Compostela, trinta de abril de mil novecentos noventa e oito.
Manuel Fraga Iribarne
Presidente
Jesús C. Palmou Lorenzo
Conselleiro de Xustiza, Interior e Relacións Laborais
4522