Dentro do plan de actividades da Escola Galega de Administración Pública para 1998 e conforme as funcións atribuídas pola Lei 4/1987, do 27 de maio, de creacion da escola, e pola Lei 10/1989, do 10 de xullo, de modificacion da anterior, convócase, en colaboración coa Escola Moscovita de Estudios Políticos, co Ministerio de Asuntos Exteriores e coa Axencia Española de Cooperación Internacional e Unión Europea, un seminario sobre política rexional nun estado democrático, que deberá desenvolverse conforme as seguintes bases:
1. Obxectivos.
Apoia-la formación e o desenvolvemento dunha política rexional dándolle a coñecer ós asistentes a realidade interadministrativa entre o Estado español e as súas comunidades autónomas, así como a visión das experiencias rusas acumuladas neste campo.
2. Contido.
Trataranse, entre outros, estes temas:
-Os sistemas do poder estatal e as federacións no ámbito administrativo: delimitacións competenciais.
-Unitario e federalismo: experiencias e a Constitución española.
-O papel desempeñado polas comunidades autónomas na política española.
-O punto de partida das autonomías e a súa extrapolación ó actual federalismo ruso.
-As relacións entre a federación e os seus suxeitos: o problema orzamentario.
-Vantaxes e desvantaxes do sistema autonómico e o federalismo.
-As relacións entre a federación e os entes municipais.
3. Destinatarios.
Persoal ó servicio de calquera das administracións públicas galegas e interesados en xeral.
4. Desenvolvemento.
-Horario: mañá e tarde.
-Lugar e datas: o seminario convocado terá lugar no salón de actos da Escola Galega de Administración Pública (polígono das Fontiñas, rúa de Madrid, 2-4, en Santiago de Compostela), os días 10, 11 e 12 de xuño.
5. Inscrición.
-Prazo: remata o venres, día 5 de xuño de 1998.
-Tramitacón de solicitudes: as solicitudes irán dirixidas ó director da Escola Galega de Administración Pública (polígono das Fontiñas, rúa de Madrid, 2-4, 15707, Santiago de Compostela),
segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: (981) 54 63 37.
-Número de prazas: limitado á capacidade do local.
-Inscrición forá de prazo: só se admitirán, de quedaren prazas baleiras, coa condicións de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, a partir do día 5 de xuño, por teléfono das 10 ás 14.30 horas, ós seguintes números: (981) 54 62 39 ou (981) 54 60 40.
6. Modificacións.
A EGAP reserva para si a facultade de interpretar e de resolve-las incidencias que puidesen xurdir no desenvolvemento do seminario, así como a de cancelalo se o escaso número de solicitudes non xustificase a súa realización.
7. Certificación de asistencia.
Entregaráselles, ó remate deste seminario, a aqueles asistentes que concorresen asiduamente a este, cando a súa inasistencia non sexa igual ou superior ó 15% das horas lectivas programadas e, expresarase neste documento, a natureza da actividade e as datas da súa realización.
Santiago de Compostela, 7 de maio de 1998.
Domingo Bello Janeiro
Director da Escola Galega de Administración Pública
3452
