O Decreto 77/1996, do 29 de febreiro, asigna á Consellería de Pesca, Marisqueo e Acuicultura as funcións e servicios transferidos de acordo co previsto no Decreto 89/1996, do 26 de xaneiro, sobre o traspaso á Comunidade Autónoma de Galicia das funcións e servicios en materia de ensinanzas náutico-deportivas, correspondéndolle o exercicio destas á dirección xeral de Formación Pesqueira e Investigación.
A Orde do 17 de xuño de 1997 do Ministerio de Fomento, establece a necesidade de realizar un exame teórico e un práctico ou, alternativamente a este, unhas prácticas obrigatorias. Para a realización tanto do exame práctico ou das prácticas é preciso ter aprobado con anterioridade o exame teórico.
Polo exposto, é preciso establece-lo calendario e condicións de inscrición nas probas teóricas das correspondentes titulacións; polo tanto, esta dirección, en uso das facultades que ten atribuídas en virtude do Decreto 206/1990, do 15 de marzo, polo que se establece a estructura orgánica e funcional da Consellería de Pesca, Marisqueo e Acuicultura,
RESOLVE:
Proceder á convocatoria de exame teórico ordinario en maio de 1998 para a obtención das seguintes titulacións:
a) Patrón para navegación básica.
b) Patrón de embarcacións de lecer.
b) Patrón de iate.
c) Capitán de iate.
con suxeición ás seguintes:
BASES DA CONVOCATORIA
Primeira
1. Celebraranse os exames no Instituto Politécnico Marítimo Pesqueiro do Atlántico de Vigo, na Escola Oficial Náutico-Pesqueira de Ribeira e na Escola Oficial Náutico-Pesqueira de Ferrol, polos tribunais constituídos para o efecto de acordo co previsto na base quinta da presente resolución, segundo a seguinte programación:
1. Instituto Politécnico Marítimo Pesqueiro do Atlántico de Vigo.
Patrón para navegación básica: día 5 de maio.
Patrón de embarcacións de lecer: día 6 de maio.
Patrón de iate: día 11 de maio.
Capitán de iate: día 12 de maio.
2. Escolas oficiais náutico-pesqueiras de Ribeira e Ferrol.
Patrón para navegación básica: día 5 de maio.
Patrón de embarcacións de lecer: día 6 de maio.
2. Os exames serán escritos e axustaranse no referente ós programas, forma e condicións mínimas para superalos, á Orde do 17 de xuño de 1997 do Ministerio de Fomento e resolución da Dirección Xeral da Mariña Mercante do 30 de decembro de 1997 e ás circulares da mesma dirección actualmente en vigor, que se exporán á vez cás listas de admitidos e excluídos nos taboleiros de anuncios dos centros realizadores dos exames.
Segunda.-As persoas que desexen presentarse a esta convocatoria deberán acreditar:
a) Ter cumpridos 18 anos, e no caso do patrón para navegación básica e do patrón de embarcacións de lecer, se se é menor non emancipado, ter cumpridos 16 anos e contar coa autorización dos pais ou titores.
b) Ter ingresados os correspondentes dereitos do exame.
Terceira
1. Os candidatos deberán solicita-la súa admisión ó exame mediante solicitude dirixida ó presidente do correspondente tribunal de exames para a obtención das titulacións de referencia, no modelo do anexo.
2. Xunto á solicitude, será preciso presenta-la seguinte documentación:
-Fotocopia do documento nacional de identidade.
-Unha fotografía recente de tamaño carné.
-Resgardo para a Administración do correspondente impreso de autoliquidación de taxas debidamente validado pola entidade bancaria onde se realice o ingreso.
-No caso de que os candidatos teñan superado unha parte do programa da titulación á que se presentan, deberán presenta-lo certificado do último exame.
-Título, tarxeta ou resgardo de trámite de patrón de embarcacións de lecer, para presentarse a patrón de iate.
-Título, tarxeta ou resgardo de trámite de patrón de iate, para presentarse a capitán de iate.
3. As solicitudes presentaranse, xunto á documentación mencionada no apartado anterior, indicando o lugar de realización do exame, antes do 20 de abril, prazo improrrogable para tódolos efectos.
4. As mencionadas solicitudes poderán presentarse en calquera das seguintes dependencias administrativas:
a) No rexistro da Consellería de Pesca, Marisqueo e Acuicultura ou de calquera das súas delegacións territoriais ou comarcais.
b) Na secretaría do Instituto Politécnico-Marítimo Pesqueiro do Atlántico en Vigo ou das escolas oficiais náutico-pesqueiras de Ribeira e Ferrol, segundo corresponda.
Cuarta.-Sen prexuízo do disposto na base primeira da presente convocatoria, os presidentes dos tribunais, á vista das instancias recibidas, farán públicos no taboleiro de anuncios de cada centro examinador as listas de admitidos e excluídos, así como o día
e a hora de realización das probas correspondentes a cada unha das titulacións.
Quinta.-Os tribunais que xulgarán as probas estarán formados por:
-O director do centro onde se realice o exame ou persoa en quen delegue, que actuará como presidente en tódalas probas.
-Un secretario, cargo que será ocupado polo secretario do centro.
-Os vocais necesarios, que serán designados para o efecto polo presidente, cun mínimo en función do tipo de exame de:
-Un, no caso do exame de patrón de navegación básica.
-Dous, no caso do exame de patrón de embarcacións de lecer.
-Tres, nos casos de exames de patrón de iate e de capitán de iate.
Os membros dos tribunais terán preferentemente titulación náutica superior.
Sexta.-Rematadas e corrixidas as probas, expoñeranse no taboleiro de anuncios das dependencias administrativas sinaladas na base terceira.5 da presente resolución as listas das cualificacións destas.
Os interesados poderán, se é o caso, formula-las reclamacións que coiden oportunas perante o presidente do tribunal, no prazo de 15 días contados desde a data na que sexan publicadas as listas.
Sétima.-Aqueles solicitantes que se encontren en posesión de titulacións que dan lugar á validación de parte dos programas, solicitarana diante do tribunal ó tempo que solicitan a inscrición para o exame, para o que xuntarán a documentación necesaria para acreditaren que están en posesión das titulacións que alegan para a validación. O tribunal resolveraas na lista pública de admitidos e excluídos.
Oitava.-Os solicitantes deberán reuni-las condicións físicas previstas na Resolución do 30 de decembro de 1997 da Dirección Xeral da Mariña Mercante.
Esta condición acreditarase mediante a presentación de certificado médico expedido de conformidade coa dita resolución, cando se solicite a tarxeta acreditativa.
Novena.-A presente convocatoria e cantos actos administrativos se deriven dela poderán impugnarse nos casos e na forma previstos na vixente Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 23 de marzo de 1998.
Joaquín Mariño Cadarso
Director xeral de Formación Pesqueira e Investigación
2732