A situación das actividades primarias existentes no noso espacio rural, cunhas grandes fluctuacións debido á forte dependencia que estas economías teñen, basicamente, da natureza y do clima, provoca que non se poidan manter comunidades economicamente eficientes, e isto determina un continuo éxodo da poboación que leva consigo, consecuentemente, o abandono de vellas casas e construccións perfectamente integradas no medio e na paisaxe. Para corrixi-las citadas fluctuacións económicas e, se é o caso evitalas, é conveniente poñer en práctica unha estratexia definida por unha política de diversificación da economía local e para isto é preciso fomentar alternativas de investimento que determinen a creación de novos postos de traballo así como un incremento das rendas familiares, feitos que deben de redundar na mellora da calidade de vida das comunidades rurais, así como na creación das circunstancias axeitadas que permitan voltar á súa terra ás xentes que o desexen.

A actividade turística é uno dos vieiros para acada-los obxectivos sinalados, xa que as actuais tendencias da demanda turística van cara ó consumo de novos productos que se caracterizan polo seu poder desestacionalizador e descentralizador e a capacidade para promover un turismo sostible, circusntancia que obriga á busca dun desenvolvemento turístico efectivo no rural.

Galicia posúe os elementos precisos para este tipo de actividade ó existiren unha serie de construccións cun grande valor cultural como son os pazos, mosteiros, castelos, casas grandes e incluso antigas casas rectorais, elementos que debidamente acondicionados poden ser destinados para un uso turístico dentro do denominado turismo rural pero, ante todo, deben de significar un importante aporte á calidade da oferta e, consecuentemente ó desenvolvemento económico da zona. Por isto o acondicionamento destas construccións ten que realizarse a través de proxectos que afonden no coñecemento da historia e do lugar, que permitan resultados axeitados ó medio e ó mesmo tempo, respectuosos coas estructuras das edificacións, garantindo a autenticidade e a calidade nas intervencións e procurando un equilibrio entre o inmoble, o lugar e o seu novo uso, fuxindo do mesmo xeito tanto do folclorismo coma do intervencionismo.

Por todo isto e con cargo ós créditos ormanentarios da Consellería de Cultura, Comunicación Social e Turismo asignados para esta finalidade no proxecto de Lei de orzamentos da Comunidade Autónoma de Galicia para 1998, aprobado polo Consello da Xunta de Galicia na súa reunión do 22-1-1998, seguindo os criterios básicos sobre o réxime de incentivos

ó investimento productivo en Galicia sinalados no Decreto 309/1995, do 23 de novembro, sobre incentivos para o desenvolvemento económico e fomento da actividade empresarial da Comunidade Autónoma de Galicia, así como ó establecido sobre medidas de fomento no artigo 73 da Lei 9/97, do 21 de agosto, de ordenación e promoción do turismo en Galicia en concordancia co sinalado no artigo 74 da dita lei e considerando as determinacións da orde da Consellería de Economía e Facenda do 11 de febreiro de 1998, sobre tramitación anticipada de expedientes de gasto, convócanse axudas destinadas a fomenta-lo turismo rural e, polo tanto,

DISPOÑO:

Artigo 1º.-Destinatarios.

A Dirección Xeral de Turismo poderá conceder subvencións con cargo á aplicación 10.05.751A.770.0 dos seus créditos orzamentarios para 1998, ás persoas físicas e xurídicas propietarias das construccións nas que se poidan realiza-los investimentos obxecto de subvención, segundo o sinalado no artigo 2º desta orde.

As ditas concesións estarán limitadas polos créditos dispoñibles para este fin así como as determinacións da orde da Consellería de Economía e Facenda do 11 de febreiro de 1998, sobre tramitación anticipada de expedientes de gasto e así mesmo, cando as subvencións concedidas teñan carácter plurianual, aplicarase o que dispón o artigo 36.dous.B).2.e) do proxecto de Lei de orzamentos xerais da Comunidade Autónoma de Galicia para 1998, para os efectos do pagamento correspondente á anualidade do exercicio de 1998 e, se é o caso a de 1999.

Artigo 2º.-Obxecto.

Poderán ser obxecto de subvención, de acordo co establecido nesta orde, os investimentos relativos á rehabilitación ou restauración de construccións situadas nos espacios rurais, sempre que polas súas características permitan a oferta de aloxamentos e outros servicios complementarios e estean encadradas, seguindo o sinalado nos artigos 2º e 3º da orde da Consellería da Presidencia e Administración Pública do 2 de xaneiro de 1995, pola que se establece a ordenación dos establecementos de turismo rural, modificada pola Orde do 7 de maio de 1996, na modalidade de hospedería dos grupos A ou B.

Considerarase investimento subvencionable tanto a execución material de obra como a redacción dos proxectos e a dirección de obra, no sendo subvencionable o mobiliario nin as taxas e impostos legalmente esixibles.

Artigo 3º.-Condicións particulares.

Ademais do establecido na antedita Orde de 2 de xaneiro de 1995, os investimentos que se subvencionen deberán cumpri-las seguintes condicións:

a) Os proxectos serán de rehabilitación ou restauración, non de construcción ex novo, mantendo e recuperando a memoria histórica do inmoble e

o seu contorno. Deberán ser respectuosos coa estructura da edificación nas súas relacións co lugar. Así mesmo, respectaranse os seus usos tradicionais e a sectorización segundo as plantas. Manteranse volumes e formas preexistentes e proporanse materiais e acabados propios da zona e das condicións do inmoble. Recuperaranse as estructuras tradicionais cos requirimentos técnicos esixibles. Terase especial coidado na resolución da cuberta, lucernarios e elementos auxiliares, así como o tratamento de fachadas. O proxecto deberá propoñer solucións en canto á potabilidade da auga, a evacuación dos residuos e o seu tratamento.

b) Os proxectos serán globais, é dicir, comprenderán tódalas obras e instalacións, non só as pertenecentes á propia edificación senón tamén, se é o caso, ás do contorno afecto á propiedade do predio, debéndose respecta-las características peculiares do medio rural galego.

c) A superficie pechada destinada a habitacións (e os seus baños), no poderá ser maior que a destinada a espacios comúns (salóns, comedor, biblioteca, cociña, etc.) sen contar espacios de circulación.

d) Os investimentos que sexan obxecto de subvención terán que empezar durante o año 1998 e estar rematados con tempo dabondo para xustifica-lo investimento subvencionado dentro dos prazos establecidos nesta orde, aínda que tamén poden ser subvencionados os proxectos iniciados con anterioridade, sempre e cando os solicitantes aporten certificación valorada das obras realizadas, asinada por técnico facultativo e visada polo correspondente colexio oficial.

e) Os titulares dos establecementos de turismo rural subvencionados adquiren os seguintes compromisos:

1. Solicita-la autorización de apertura diante da Administración turística nun prazo máximo de tres meses contados a partir da data da xustificación final do investimento.

2. Mante-la súa actividade durante un período mínimo de quince anos, contados desde a data de concesión de autorización de apertura expedida pola Administración turística.

3. Mante-lo establecemento aberto e en funcionamento durante 11 meses ó ano e adscribirse á central de reservas de Turgalicia.

4. Crea-los postos de traballo a que se compromete na declaración xurada incorporada á solicitude, nun prazo de 3 anos contados desde a data de autorización de apertura pola administración turística. Tamén se compromete a manter estes postos de traballo durante 3 anos, contados desde a súa creación.

5. Oferta-los seus servicios mediante prezos semellantes ós que operan no mercado desta Comunidade Autónoma para os establecementos análogos, sen prexuízo do disposto na lexislación vixente sobre prezos.

No caso de non cumprirse en tempo e forma, estes compromisos e consonte o sinalado no artigo 78.5.c) da Lei 11/1992, do 7 de outubro, de réxime finan

ceiro e presupostario de Galicia, os beneficiarios quedan obrigados a devolve-lo importe da subvención recibida cos correspondentes xuros de demora ó tipo que sinale a Lei de orzamentos xerais do Estado do exercicio correspondente.

f) A titularidade dos establecementos de turismo rural que se subvencionen terán que ostenta-la propiedade do inmoble obxecto de subvención así como o pleno uso e desfrute dela. Cando o titular sexa unha persoa física corresponderalle a esta a xestión do establecemento. Non obstante, nos casos de condena por sentencia xudicial firme ou enfermidade grave da persoa beneficiaria da subvención, poderase facer cargo desta xestión, de modo temporal, outra persoa que resida na vivenda subvencionada, ou con carácter definitivo nos casos de morte, xubilación ou incapacidade do sinalado beneficiario. En todo caso, calquera destas alteracións, precisará autorización previa da Administración turística.

Se a titularidade do establecemento de turismo rural que se subvencione corresponde a unha persoa xurídica, deberá residir na vivenda alomenos unha persoa física con poder dabondo para representala e xestiona-lo establecemento. Este apoderamento, que deberá figurar inscrito no Rexistro Mercantil, presentarase verificado en canto a suficiencia pola Asesoría Xurídica da Xunta de Galicia, no momento de solicitude de apertura do establecemento.

g) Os proxectos que se subvencionen terán que anuncia-la colaboración da Consellería de Cultura, Comunicación Social e Turismo - Dirección Xeral de Turismo, tanto durante a realización das obras como posteriormente, mediante un cartel que se exhibirá en sitio ben visible. As características do dito cartel, así como a súa localización e contido serán indicados polos correspondentes servicios provinciais de Turismo da Consellería de Cultura, Comunicación Social e Turismo. Os custos correspondentes á dita publicidade serán por conta do beneficiario da subvención.

h) Os proxectos que se subvencionen terán que cumpri-lo disposto na Lei 8/97, do 20 de agosto, de accesibilidade e supresión de barreiras na Comunidade Autónoma de Galicia.

Artigo 4º.-Contía das subvencións.

Os proxectos que se recollen nesta orde como accións subvencionables poderán acadar un máximo de axuda de ata o 50% do orzamento do investimento subvencionable pero, en todo caso, a contía máxima da subvención calcularase mediante a adición dos seguintes parámetros:

1º Prazas ofertadas:

Grupo A: para os proxectos encadrados neste grupo, é dicir, pazos, castelos, mosteiros, casas grandes e casas rectorais, a subvención será un millón setecentas mil (1.700.000) pesetas por praza de aloxamento ofertada ó público.

Grupo B: para os proxectos encadrados neste grupo, é dicir, casa de aldea, un millón (1.000.000) de pesetas por praza de aloxamento ofertada ó público.

2º Por creación de restaurante:

Grupo A: para os proxectos encadrados neste grupo, cento cincuenta mil (150.000) pesetas por praza de aloxamento ofertada.

Grupo B: para os proxectos encadrados neste grupo, cen mil (100.000) pesetas por praza de aloxamento ofertada.

3º Por creación de emprego:

En ámbolos grupos, A ou B, a subvención será de cincocentas mil (500.000) ptas. por posto de traballo que se cree, segundo a declaración xurada que se incorpora ó expediente.

Artigo 5º.-Solicitudes e documentación.

1. As solicitudes, dirixidas ó director xeral de Turismo e a documentación que de seguido se especifica presentaranse, por duplicado exemplar, na delegación provincial da Consellería de Cultura, Comunicación Social e Turismo-Servicio Provincial de Turismo correspondente á localización do investimento, en calquera das formas previstas na Lei 30/1992, do 26 de novembro, de réxime xurídico das administracións públicas e do procedemento administrativo común no prazo dun mes, contado desde o día da publicación desta orde no Diario Oficial de Galicia:

a) Solicitude segundo o modelo do anexo I.

b) Declaración segundo o modelo do anexo II.

c) Fotocopia cotexada do DNI e do NIF do solicitante ou do CIF cando corresponda.

d) Informe urbanístico emitido polo concello onde especificamente se determine se a execución do proxecto para o que se solicita subvención é conforme coa legalidade urbanística vixente.

e) Proxecto básico asinado por arquitecto, facendo consta-lo seu número de colexiado, e que comprenda, obrigatoriamente:

-Memoria histórica do edificio, facendo referencia á súa catalogación ou inventariado.

-Fotografías do inmoble, exteriores, interiores e do contorno.

-Memoria explicativa do proxecto e xustificación das solucións adoptadas.

-Orzamento do investimento no que se incluirá, especificándose cada un deles, o importe da execución material, así como o custo da redacción do proxecto e da dirección de obra.

-Plano de localización do investimento.

-Planos do estado actual e do proxecto a escala mínima 1:50.

-Indicación dos materiais e acabados propostos.

-Indicación dos mobles e equipamentos que se van instalar.

-Prazo previsto para a execución.

f) Para os proxectos promovidos por personas xurídicas, achegarase escritura de constitución ou modi

ficación, se é o caso, debidamente inscrita no Rexistro Mercantil.

g) Declaración xurada doutras axudas solicitadas ou recibidas para o proxecto para o que se solicita a subvención.

h) Declaración xurada, se é o caso, dos postos de traballo que se creen coa execución do investimento proxectado.

2. Os interesados emendarán os defectos dos expedientes de solicitudes de subvención que o precisen, segundo o sinalado no artigo 71.1º da Lei 30/1992, do 26 de novembro, de réxime xurídico das administracións públicas e do procedemento administrativo común, procedéndose ó arquivo, sen máis trámite, daqueles que no se cubrisen en tempo e forma.

3. Os solicitantes de subvención serán requiridos para cubrir un cuestionario, para os efectos de valoración do expediente.

4. As compulsas que procedan para toda a documentación que se especifica nesta orde faranse nos correspondentes servicios centrais ou provinciais da Consellería de Cultura, Comunicación Social e Turismo. Todo iso de conformidade co establecido no Decreto lexislativo 1/1992, do 11 de abril, polo que se aproba o texto articulado das bases contidas no capítulo 3º do título II da Lei 13/1991, do 9 de decembro, de taxas, prezos e exaccións reguladoras da Comunidade Autónoma de Galicia (DOG nº 112 do 12 de xuño) e na orde da Consellería de Economía e Facenda do 30 de xuño de 1992, pola que se regulamenta a utilización de efectos timbrados para o pagamento das taxas por servicios administrativos de compulsa.

Artigo 6º.-Selección das solicitudes e resolución.

As solicitudes, ás que se lles achegará un informe emitido polo respectivo xefe do Servicio Provincial de Turismo, por cada expediente, e no que se deberá indica-la valoración desde un punto de vista turístico do proxecto presentado, serán estudiadas por unha comisión técnica constituída polo titular da Subdirección Xeral de Fomento e Cooperación, que a presidirá, actuando como vocais un representante de cada unha das delegacións provinciais da Consellería de Cultura, Comunicación Social e Turismo, os xefes dos servicios provinciais de Turismo, os xefes de servicio de fomento e promoción, de investimentos e supervisión técnico-turística e de ordenación do turismo da Dirección Xeral de Turismo e o xefe da área de turismo rural de Turgalicia. Exercerá as funcións de secretario da comisión o antedito xefe de servicio de fomento e promoción.

1. Para a valoración das solicitudes teranse en conta os seguintes criterios:

1º A localización do investimento atendendo á súa situación, accesos, infraestructuras básicas e oferta de servicios de utilización turística así como á oferta existente de turismo rural na contorna.

2º O estado actual e as características da construcción.

3º A creación de postos de traballo.

4º As características da rehabilitación.

5º A oferta de servicios proxectada para o establecemento.

6º O mobiliario e os equipamentos proxectados.

7º A relación entre a oferta de servicios e o investimento proxectado.

8º O número de prazas ofertadas ó público que superen as mínimas esixidas.

9º Que o solicitante sexa beneficiario do programa <> do Instituto Galego de Promoción Económica.

10º Non estar localizado o investimento nun municipio incluído nalgún outro programa de axuda que persiga os mesmos fins.

2. Esta comisión, á vista dos expedientes e dos informes emitidos polos servicios provinciais, analizarán e cualificarán os proxectos e, tendo en conta as dispoñibilidades orzamentarias elevará ó director xeral de Turismo, proposta de concesión ou denegación de subvención. Dos acordos adoptados pola sinalada comisión redactarase a correspondente acta.

3. O director xeral de Turismo, vista a proposta elevada pola comisión técnica, dictará as resolucións de concesión ou, se é o caso, de denegación de subvencións.

A resolución de concesión determinará o importe da subvención concedida, con cargo ás disposicións orzamentarias da Comunidade Autónoma de Galicia para 1998, 1999 e 2000, en función das disposicións orzamentarias e das dificultades de índole técnica de execución do investimento subvencionado.

4. De conformidade co establecido no Decreto 264/1994, do 29 de xullo, entenderanse desestimadas as solicitudes sobre as que no recaese resolución expresa no prazo de seis meses contados desde a data do rexistro de entrada da solicitude.

Artigo 7º.-Aceptación e renuncia das subvencións.

1. Unha vez recibidas as notificacións de concesión de subvención polos beneficiarios, estes, no prazo de quince días naturais, comunicaranlle á Dirección Xeral de Turismo a aceptación ou renuncia a elas segundo o modelo do anexo III. Se, transcorridos os sinalados quince días, non se fixese manifestación en ningún sentido, tal feito entenderase como renuncia á subvención e procederase, sen máis trámite, ó arquivo do expediente.

2. No prazo de dous meses, contados desde a presentación da aceptación da subvención, os beneficiarios remitirán á antedita dirección xeral, a seguinte documentación, por duplicado exemplar:

a) Proxecto definitivo da acción subvencionada visado polo correspondente colexio oficial, no que se incluirá programa de obras que determinará a previsión anual de execución do investimento, consonte a resolución de concesión.

O dito proxecto e programa, que teñen que ser conformes co determinado na resolución de concesión da subvención, e para os efectos da súa validez para incorporar ó expediente deberá ser informado favorablemente polo xefe do servicio de investimentos e supervisión técnico-turística da Dirección Xeral de Turismo.

b) Licencia urbanística de obras, expedida polo concello e con referencia explícita ó proxecto subvencionado, na que se indique que é para a rehabilitación ou restauración dunha edificación para establecemento de turismo rural. Excepcionalmente poderase apraza-la presentación deste documento.

c) Fotocopia compulsada de documento que acredite que o beneficiario da subvención é propietario do innmoble obxecto de rehabilitación. No caso de existir propiedade pro-indiviso, deberá aportarse poder notarial dos copropietarios, outorgándolle representación ó sinalado beneficiario, que deberá ser un deles, para actuar neste procedemento e asumi-los compromisos derivados do establecido nesta orde.

d) Documento acreditativo de alta no imposto de actividades económicas nun epígrafe que posibilite a explotación da vivenda obxecto de subvención como establecemento de turismo rural consonte as determinacións e obrigas que se sinalan nesta orde.

e) Certificación bancaria onde se debe aboa-la subvención.

Se, transcorridos os ditos dous meses, non se cumprise algunha das condicións anteriores, procederase, sen máis trámite, ó arquivo do expediente.

3. Se, por calquera motivo, e durante o exercicio económico, houbese máis crédito orzamentario para a concesión de subvencións obxecto desta orde vista a proposta que se formule a comisión técnica, o director xeral de Turismo poderá conceder subvencións ós expedientes que non a recibisen e teñan cualificación dabondo, segundo os acordos da sinalada comisión.

Artigo 8º.-Xustificacón e pagamento das subvencións.

1. Os beneficiarios de subvencións concedidas en virtude da presente orde e cando o importe seu se atribuíu en dúas ou máis anualidades terán como data límite, para a presentación de xustificación do investimento executado, que se deberá realizar de conformidade co programa de obras, as seguintes:

Fase de 1998: 15 de novembro de 1998.

Fase de 1999: 30 de xuño de 1999, se o importe da subvención se imputou a dúas anualidades. No caso de terse imputado a tres, 15 de novembro de 1999.

Fase do 2000: 30 de xuño de 2000.

Se a subvención se imputou só ó exercicio de 1998, a data límite de presentación será o 15 de novembro de 1998.

En todo caso, os beneficiarios de subvencións, unha vez executado o investimento, deberán xus

tificalo o antes posible e nunca con posterioridade ás datas indicadas, datas que son límite de presentación da xustificación.

2. O proxecto xustificado deberá coincidir coa resolución de concesión da subvención ou coas modificacións autorizadas. Se o investimento xustificado fose menor, e sempre mantendo os fins para os que se concedeu a subvención, esta reducirase proporcionalmente ó investimento non xustificado.

3. Para percibi-la subvención os beneficiarios remitirán á Dirección Xeral de Turismo, por triplicado exemplar, a seguinte documentación:

3.1. Solicitude de cobro segundo o modelo do anexo IV.

3.2. Facturas e certificación por conceptos, asinada polo técnico director de obra e visada polo correspondente colexio oficial, relativa á obra executada coa súa valoración e, no caso de obra rematada, tamén se achegará certificado de fin de obra, visado polo colexio oficial.

Nas facturas o interesado deberá especificar, a que concepto do investimento que serviu de base á concesión de subvención corresponde cada unha delas.

3.3. Certificados de estar ó día nas súas obrigas tributarias coas facendas do Estado e da Comunidade Autónoma e nas obrigas coa Seguridade Social, así como de estar ó día no imposto sobre actividades económicas.

3.4. Licencia urbanística de obras, no caso de que non se achegara con anterioridade por causas excepcionalmente autorizadas.

3.5. Certificación de residencia do titular, emitida polo concello da localización do investimento subvencionado, se o solicitante é persoa física; e certificación, expedida polo Rexistro Mercantil, do domicilio social da empresa no municipio de localización do investimento subvencionado, se o beneficiario é persoa xurídica. Esta certificación, en calquera de ámbolos casos, será obrigatorio presentala coa última solicitude de pagamento e potestativo nos demais casos.

3.6. Acta de manifestacións, en escritura pública, onde se recollan os compromisos ós que se fan referencia no artigo 3º.e) da presente orde. Este documento será obrigatorio presentalo coa última solicitude de pagamento e potestativo nos demais casos.

Por outra banda, no caso de ser beneficiario dunha subvención plurianual e cando se solicite o pagamento da anualidade de 1998 se é o caso, de 1999, ademais da documentación indicada no apartado 3 do presente artigo, tamén se deberá remiti-la documentación á que se fai referencia no artigo 36.Dous.B).2 do proxecto de Lei de orzamentos xerais da Comunidade Autónoma de Galicia para 1998.

4. Para o non previsto anteriormente, haberá que aterse ó disposto nesta materia nos artigos 78 e 79 da Lei 11/1992, do 7 de outubro, de réxime financeiro e presupostario de Galicia.

Disposición transitoria

Tódolos actos de trámite dictados nos expedientes de gasto realizados ó abeiro desta orde entenderanse condicionados a que ó se dicta-lo acordo de compromiso de gasto subsistan as mesmas circunstancias de feito e de dereito existentes no momento no que foron producidos aqueles actos.

Disposicións adicionais

Primeira.-As modalidades de contratos aceptados na presente orde, para efectos de creación de emprego, son:

-Autoemprego.

-Indefinidos, a xornada completa ou a tempo parcial.

-De duración determinada, de carácter formativo (en prácticas ou de aprendizaxe) ou de lanzamento de nova actividade.

Todo isto con independencia de se a cotización á Seguridade Social se fai a través do réxime xeral ou especial de traballadores por conta allea ou polo de traballadores autónomos.

Se é o caso, e para o cálculo da equivalencia ó ano, procederase a dividi-la suma de horas traballadas, pola xornada anual de actividade, e este resultado determinará o número de postos creados.

O cumprimento das condicións relativas á creación de emprego acreditarase mediante o oportuno certificado do organismo laboral competente.

Segunda.-No caso de concesión de subvención trala resolución dun recurso administrativo, as datas para a presentación da documentación a que fai referencia o artigo 7º.2 desta orde, así como os prazos establecidos no artigo 8º.1 teranse que determinar no acto que resolva o dito recurso. As ditas datas e prazos no poderán ser, en ningún caso, posteriores ó 30 de xuño do 2000. Será tamén de aplicación o disposto neste parágrafo cando se concedese unha subvención consonte o sinalado no artigo 7º.3 desta orde.

Disposicións derradeiras

Primeira.-As unidades administrativas que actúen en calquera das fases do procedemento determinado na presente orde, poderán solicitar ó administrado a documentación que consideren precisa para un mellor estudio do expediente.

Segunda.-Facúltase o director xeral de Turismo para dicta-las resolucións e instruccións oportunas para o desenvolvemento e interpretación desta orde.

Santiago de Compostela, 18 de marzo de 1998.

Jesús Pérez Varela

Conselleiro de Cultura, Comunicación Social

e Turismo

2753