O Consello da Xerencia Municipal de Urbanismo, en sesión celebrada o día 21 de novembro de 1997, acordou aprobar inicialmente o proxecto de estatutos e bases de actuación da U.E. Canido-Praia, conforme a documentación presentada por Jerónimo Riera Besada en representación da comisión xestora.

Sométese a información pública polo prazo de vinte días, mediante inserción de anuncio no DOG.

Signifícase que o prazo de exposición ó público se entenderá aberto desde a data de publicación ata o remate dos vinte días contados desde a súa publicación no DOG. A documentación encóntrase na oficina de información da Xerencia Municipal de Urbanismo ó dispor do público, planta baixa da casa do concello.

O presente anuncio servirá de notificación nos termos dos artigos 59 da Lei de réxime xurídico das administracións públicas e do procedemento administrativo común para tódolos propietarios e interesados directamente afectados que, por resultaren descoñecidos ou ignorado o seu enderezo, non poden ser notificados persoalmente.

O proxecto de estatutos e bases de actuación aprobado é o seguinte:

Título I

Disposicións xerais

Artigo 1º.-Denominación.

1. Para a execución da unidade de execución Canido-Praia delimitada na emenda de deficiencias da adaptación do PXOU de 1988 á Lei 11/1985, do 22 de agosto, de adaptación do solo de Galicia, constitúese a que se denominará Xunta de Compensación como entidade urbanística colaboradora de natureza administrativa, personalidade xurídica propia e plena capacidade para o cumprimento dos seus fins, integrada polos propietarios de parcelas incluídas dentro do seu ámbito.

2. Poderán integrarse na Xunta de Compensación entidades públicas titulares de bens demaniais ou patrimoniais e que, se é o caso, polas empresas urbanizadoras que se incorporen de acordo co establecido nos presentes estatutos e nas bases de actuación. Por instancia da Xunta de Compensación instruiranse os expedientes necesarios para a expropiación dos predios exteriores ó ámbito, afectados polos sistemas xerais.

3. A Xunta de Compensación rexerase polo disposto nos presentes estatutos e, con carácter imperativo, polo disposto na Lei 1/1997, do 24 de marzo, sobre o solo de Galicia, o Real decreto lexislativo 1/1992, do 26 de xuño, polo que se aprobou o texto refundido da Lei 8/1990, do 25 de xullo, sobre

a reforma do réxime urbanístico e valoracións do solo; Real decreto 3288/1978, do 25 de agosto, polo que se aprobou o Regulamento de xestión urbanística; así como polas demais normas complementarias e concordantes coas citadas, supletoriamente pola Lei de sociedades anónimas.

Artigo 2º.-Ámbito.

Constitúe o ámbito da Xunta de Compensación a unidade de execución Canido-Praia, do vixente plan xeral de ordenación urbana de Vigo aprobado polo seu concello o día 3 de marzo de 1995.

Artigo 3º.-Domicilio.

A Xunta de Compensación terá o seu domicilio en Canido-Praia 191 de Vigo, en canto o Consello Rector non designe outro domicilio.

Artigo 4º.-Obxecto.

A entidade terá por obxecto a promoción e execución para a completa urbanización da unidade de execución Canido-Praia mediante o sistema de compensación, a través do reparto equitativo entre os propietarios afectados polos beneficios, custos e cargas da urbanización e da actuación compensatoria sobre os terreos comprendidos no seu ámbito.

Artigo 5º.-Fins.

A) Agrupa-los propietarios de predios incluídos dentro do ámbito da unidade de execución, coa finalidade de realizar en réxime de compensación, baixo o principio de reparto equitativo de beneficios e cargas, a urbanización e reparcelación da dita unidade.

B) Incoar expediente expropiatorio respecto ó solo exterior ocupado por sistemas xerais con fixación de xustoprezo.

C) Celebrar ou ratificar toda clase de contratos tendentes a xestionar, elaborar ou encargar ós técnicos competentes a redacción dos proxectos de compensación e urbanización ata a súa aprobación definitiva e plena validez xurídica, de execución da obra urbanizadora así como de edificación.

D) Repartir equitativamente os beneficios e cargas da unidade.

E) Executa-los proxectos de urbanización ata a recepción das obras e terreos de cesión obrigatoria e gratuíta polo concello.

F) Aproba-las indemnizacións e xustosprezos.

G) Transmitirlle á Administración actuante, en pleno dominio, de modo gratuíto e libre de cargas, tódolos terreos de cesión obrigatoria e gratuíta.

H) Cederlle á Administración actuante o aproveitamento edificable que corresponda na actuación.

I) Solicitar da Administración actuante, a título de beneficiaria, o exercicio da potestade expropiatoria respecto ás parcelas os propietarios das cales non se incorporen no tempo establecido pola Xunta de Compensación ou incumpran as súas obrigas como membros integrantes dela ou en relación a predios exteriores afectados por accesos ou outros sistemas

xerais ou ben, e respecto só ós propietarios non incorporados e sempre á elección da Xunta de Compensación, ocupa-los ditos predios en favor dela co fin de posibilita-la execución das obras de urbanización previstas, recoñecéndolles ós seus titulares o dereito á adxudicación de terreos edificables en proporción á superficie achegada coa reducción adaptada para compensa-los gastos de urbanización correspondentes, de acordo co artigo 134 da L.S. Galicia.

J) Solicitar da Administración actuante o exercicio da vía de constrinximento para o cobro das cantidades debidas polos membros morosos da xunta.

K) Recibi-los terreos achegados polos membros da xunta, sen que iso supoña a transmisión da propiedade, senón a cesión, con carácter fiduciario, das facultades de disposición e administración para obte-lo obxecto proposto, quedando afectos os terreos ó cumprimento das obrigas urbanísticas, circunstancias que se farán constar no Rexistro da Propiedade por instancia da Xunta de Compensación.

L) Formalizar operacións de crédito ou emitir títulos para a urbanización coa garantía dos terreos obtidos por expropiación, mesmo gravándoos ou hipotecándoos.

LL) Posuí-la representación xudicial e extraxudicial necesaria para a xestión e defensa dos intereses comúns dos membros integrantes da Xunta de Compensación.

M) Exerce-lo dereito a esixirlles ás empresas que prestasen os servicios, agás na parte en que, segundo a súa regulamentación, deben contribuí-los usuarios, o reembolso dos gastos de instalación das redes de augas, enerxía eléctrica, telefónica ou doutras subministracións.

N) Adxudicar parcelas que resulten do proxecto de compensación entre os compoñentes da Xunta de Compensación e a ou as que correspondan á Administración actuante en virtude do aproveitamento que legalmente lle corresponda.

Ñ) Proceder, se é o caso, á edificación de todo ou parte dos terreos da unidade de execución, logo do acordo unánime da asemblea xeral, así como outorgar declaración de obra nova e división horizontal dos inmobles edificados.

O) Solicitar da Administración actuante a inscrición da Xunta de Compensación no Rexistro de Entidades Urbanísticas Colaboradoras da Consellería de Ordenación do Territorio e Urbanismo, así como no Rexistro Mercantil se emitisen obrigacións ou se se considerase conveniente.

P) Acollerse ós beneficios previstos nas disposicións legais, tanto fiscais como urbanísticos, así como ás que resultaren de novas diposicións que puidesen dictarse.

Q) Solicitar dos órganos urbanísticos correspondentes a aprobación dos proxectos de urbanización e compensación e a recepción das obras de urbanización.

R) En xeral, o exercicio de cantos dereitos, obrigacións, accións lle corresponda consonte a lexislación vixente, para a mellor realización do seu obxecto.

A entidade adquirirá personalidade xurídica plena unha vez inscrita no Rexistro de Entidades Urbanísticas Colaboradoras, logo de aprobación definitiva destes estatutos e bases de actuación.

Artigo 6º.-Duración.

A Xunta de Compensación constitúese por tempo indefinido, ata dar cumprimento íntegro ó seu obxecto e fins, agás que antes fose acordada a súa disolución de acordo co previsto no artigo 47º destes estatutos.

Título II

Asociados da Xunta de Compensación

Artigo 7º.-Membros da xunta.

A) A xunta componse dos propietarios do solo incluídos na unidade de execución que subscriben estes estatutos, segundo relación anexa e todos aqueles que se unan ou adhiran a ela antes da súa constitución ou no prazo que marque a xunta.

B) Un representante da Administración actuante designado para o efecto por esta.

C) Os propietarios de terreos exteriores ocupados para sistemas xerais que deban facer efectivo o seu dereito na unidade de execución e se incorporen da forma legalmente prevista.

D) Tamén poderán formar parte da Xunta de Compensación as empresas urbanizadoras que acheguen total ou parcialmente fondos necesarios para urbaniza-la unidade de execución, coas condicións que se sinalan nestes estatutos e nas bases de actuación.

Artigo 8º.-Incorporación á xunta.

1. Os propietarios non promotores da actuación poderán incorporarse a ela, durante o período de información pública, unha vez outorgada a aprobación inicial dos estatutos e bases de actuación ou de conformidade co Art. 134 da Lei do solo de Galicia, no prazo dun mes a partir da notificación persoal da súa aprobación definitiva. Transcorrido o dito prazo, a incorporación só será posible se non se entorpece o desenvolvemento do proceso e o aproba a Xunta de Compensación.

2. A incorporación á xunta en calquera dos momentos sinalados no apartado anterior será solicitada polos propietarios mediante escrito que deberán presentar no Rexistro Xeral da Administración actuante, facendo constar expresamente a súa adhesión ós estatutos e ás bases de actuación, os seus datos persoais e, se é o caso, do seu representante, domicilio para efectos de notificacións, superficie e lindeiros do predio ou predios da súa propiedade, situacións xurídicas, cargas e gravames que afecten a súa propiedade, sinalando neste suposto a natureza, nome

e dirección dos titulares de dereitos reais ou de arrendamento, escrito que se acompañará do título xustificativo da súa propiedade. A falsidade nestas declaracións sinaladas dará lugar a responsabilidade polos danos e perdas que se causen.

3. Para que a incorporación produza os seus plenos efectos, o interesado, no prazo que se sinale para o efecto, deberá facer efectivas á Xunta de Compensación as cantidades correspondentes a gastos xa realizados e os previstos para futuras etapas, en función das cotas respectivas.

4. Unha vez transcorrido o prazo de incorporación á Xunta de Compensación, ou ben aqueles propietarios xa incorporados que non satisfagan as cantidades antes sinaladas e no prazo previsto para o efecto, os seus predios serán expropiados en beneficio da mencionada Xunta de Compensación, de conformidade cos presentes estatutos e bases e a lexislación urbanística aplicable.

Artigo 9º.-Constitución da Xunta de Compensación.

a) Para a constitución da Xunta de Compensación, os promotores convocarán, mediante carta certificada, con oito días hábiles de antelación contados desde a data de imposición da certificación do envío, na que figurará o día, a hora, o lugar de reunión e o asunto que haberá que tratar, os propietarios privados ou públicos incluídos na unidade de execución así como ás empresas urbanizadoras incorporadas a esta, que aceptasen o sistema de actuación.

b) A constitución formalizarase en escritura pública ou mediante acta que se protocolizará notarialmente, facendo consta-lo seguinte contido:

1º Relación de propietarios ou os seus representantes e, se é o caso, empresas urbanizadoras.

2º Relación de predios dos que sexan titulares.

3º Persoas físicas que fosen designadas para ocupa-los cargos do órgano rector.

4º Acordo de constitución.

5º Prazo de adhesión ós non incorporados, así como outras declaracións de interese para o obxecto da Xunta de Compensación.

c) Os propietarios que, manifestando a súa intención de incorporárense, non asistan ó acto de constitución da xunta, poderán consenti-la súa incorporación en escritura de adhesión dentro do prazo que para o efecto se sinale. A non adhesión no prazo fixado comportará a non incorporación á xunta.

Non obstante, as empresas urbanizadoras poderán incorporarse, aínda despois de constituída a Xunta de Compensación, nas condicións que acorde a asemblea xeral, co voto favorable do 60% das cotas, asumindo as garantías e compromisos que se esixan nela.

d) A copia autorizada da escritura e das adhesións, se é o caso, trasladarase ó órgano urbanístico actuante, que adoptará, se procede, acordo aprobatorio no prazo de trinta días. Aprobada a constitución, o órga

no actuante elevará o acordo xunto coa copia autorizada das escrituras á Administración competente para a súa inscrición no Rexistro das Entidades Urbanísticas Colaboradoras.

Artigo 10º.-Incorporación da Administración actuante.

A Administración actuante incorporarase, na proporción que lle corresponda, como un propietario máis, asumindo os dereitos e obrigacións que corresponden a aqueles e sen prexuízo do representante que lle outorga a lei como órgano de vixilancia e control.

Artigo 11º.-Cotitularidade.

No suposto de cotitularidade sobre un predio ou dereito, os cotitulares deberán designar, en documento fidedigno, unha soa persoa para o exercicio das súas facultades como membro da xunta, respondendo solidariamente fronte a ésta de cantas obrigacións dimanen da súa condición. Se non designan representante, será nomeado un propietario entre os cotitulares polo propio consello rector. O nomeado neste suposto cumprirá a súa representación ata que os cotitulares designen outro no seu lugar.

Artigo 12º.-Dereito limitativo de dominio.

No caso de que algún predio pertenza en núa propiedade a unha persoa determinada e outra calquera teña un dereito limitativo de dominio, a calidade de asociado corresponderá ó primeiro, sen prexuízo dos dereitos e obrigacións que posúan os segundos ou dos beneficios que puidesen obter da xestión da Xunta de Compensación durante a vixencia do seu dereito.

Artigo 13º.-Facultades fiduciarias da xunta.

A incorporación dos propietarios non presupón a transmisión á Xunta de Compensación da propiedade dos seus respectivos predios, pero a Xunta de Compensación actuará como fiduciaria con pleno poder de xestión, administración para acada-lo obxecto da actuación e de disposición para predios obtidos por expropiación.

Artigo 14º.-Procedemento expropiatorio.

Nos casos en que sexa necesario proceder á expropiación de predios ou dereitos, o procedemento expropiatorio será o establecido na vixente lexislación urbanística e, en canto á valoración, adecuarase ó sinalado nas bases de actuación. Unha vez aprobado o proxecto de compensación e coa finalidade de non paraliza-las obras de urbanización en terreos de destino público, estes poderán ser ocupados e as edificacións e construccións demolidas pola xunta, unha vez depositado o importe indemnizatorio taxado pola xunta, todo iso aínda cando a fase contradictoria do prezo xusto se encontre en trámite.

En tódolos casos de expropiación de bens ou dereitos, tanto pola non incorporación en prazo dos propietarios como por incumprimento das obrigacións que se establecen nas bases de actuación, será beneficiaria dela a Xunta de Compensación.

Artigo 15º.-Facultade de disposición da xunta.

A Xunta de Compensación ten facultade para ofrecer en garantía, gravar, hipotecar e allea-los terreos obtidos por expropiación polos asociados para facer fronte ós gastos de urbanización, para todo o cal precisará autorización expresa outorgada en asemblea xeral.

Artigo 16º.-Alleamento do terreo ou cotas.

Os asociados da xunta poderán allea-los terreos ou a súa participación nela, da seguinte maneira:

1º O transmitente notificaralle en forma fidedigna ó presidente da xunta, o nome, o domicilio e demais circunstancias do adquirente, así como as condicións da transmisión, para efectos da súa necesaria constancia.

2º O adquirente, por calquera clase de título, quedará subrogado en tódolos dereitos e cargas e en tódalas obrigacións pendentes por razón da participación alleada, facendo expresa mención no título de transmisión.

Título III

Dereitos e obrigacións dos membros da Xunta de Compensación

Artigo 17º.-Dereitos.

Son dereitos dos membros da Xunta de Compensación:

A) Participar con voz e voto, por si ou por medio de representante nas sesións da asemblea xeral, nos asuntos que se coñeza, proporcionalmente ó dereito que teña, podendo presentar proposicións e suxestións, agás suspensión deste dereito por non pagamento de cotas de urbanización.

B) Elixi-los membros dos órganos de goberno e ser elixido para o desempeño dos cargos.

C) Allear, gravar ou realizar calquera acto de disposición sobre os terreos ou cotas en propiedade, nos termos e condicións sinalados nestes estatutos.

D) Recibir individualmente ou en copropiedade predios resultantes que lles sexan adxudicados en proporción ás cotas de participación.

E) Participar, se é o caso, nos beneficios resultantes da xestión común ó tempo da súa liquidación que puidese corresponderlle e en proporción ás súas cotas.

F) Obter información da actuación da xunta e os seus órganos rectores.

G) Recorrer contra os acordos e resolucións dos órganos de goberno e da xunta que consideren lesivos ou non conformes a dereito, nos prazos e cos requisitos establecidos nos presentes estatutos e normas legais de aplicación.

H) Os demais dereitos que se lles atribúan de acordo co disposto nos estatutos e bases de actuación e a normativa legal aplicable.

Artigo 18º.-Obrigacións.

Son obrigacións dos membros da Xunta de Compensación, ademais das derivadas da normativa e planeamento urbanístico aplicable como dos acordos validamente adoptados polos órganos de goberno da xunta, as seguintes:

A) Entregarlle á Xunta de Compensación, no momento da súa incorporación a ela, os documentos acreditativos da súa titularidade que sexan válidos fronte a terceiros, xustificando fidedignamente os excesos da superficie computable se difire da escriturada.

Así mesmo, no momento da incorporación, deberanse indica-los nomes e domicilios dos titulares de dereitos reais ou persoais, con expresión da natureza e contía das cargas e gravames.

B) Rexistrar na secretaría da xunta o seu domicilio para efectos de notificacións no momento da súa incorporación, considerándose ben practicada calquera notificación que ó citado domicilio se dirixa. Se non existise domicilio fixado, consideraranse ben efectuadas as notificacións dirixidas a calquera dos que conste nos documentos e datos que figuran na xunta.

C) Contribuír coas cantidades que lle corresponda nos gastos que ocasione o funcionamento da xunta, nos gastos de urbanización, de conformidade co Art. 132 da Lei 1/1997, do solo de Galicia, Art. 155 da Lei do solo e Art. 59 e concordantes co Regulamento de xestión e, en xeral, tódolos que ocasione o cumprimento dos seus fins, mediante o pagamento das cotas ordinarias e extraordinarias nos prazos sinalados para o efecto.

E) Outorga-los documentos necesarios para formaliza-las cesións obrigatorias e gratuítas derivadas da lexislación e do planeamento urbanístico, así como regulariza-la titularidade dominical e a situación rexistral dos terreos achegados, dentro dos prazos sinalados pola xunta.

F) Permiti-la ocupación dos seus predios na parte que sexa obxecto de cesión con destino a uso público ou servicios da unidade de execución segundo o planeamento, así como o seu voo e subsolo, para a execución das obras de urbanización, depósito de materiais e instalacións complementarias, unha vez que fose aprobado o proxecto de compensación.

G) Comunicarlle á xunta cun mes de antelación a decisión de proceder ó alleamento parcial ou total dos terreos da súa propiedade ou da cota que lle fose asignada, notificando a dita transmisión na forma prevista no Art. 16 destes estatutos.

H) Realiza-la edificación conxuntamente no caso de que unha mesma parcela resultante da actuación se adxudique en pro indiviso a varios cotitulares.

Título IV

Órganos de goberno

Artigo 19º.-Enumeración.

1. Os órganos de goberno da Xunta de Compensación están constituídos por: a asemblea xeral, o consello rector, o presidente, o secretario e o tesoureiro, formando parte, ademais, un representante designado pola Administración actuante.

2. Poderá designarse un xerente, se se estima conveniente, co quórum que establece o Art. 27.2º e coas facultades que se determinen.

Capítulo I

Asemblea xeral

Artigo 20º.-Composición.

A asemblea xeral, constituída de conformidade con estes estatutos, é o órgano supremo da Xunta de Compensación, tanto no seu carácter deliberatorio como decisorio no ámbito da súa competencia, e formarán parte dela tódolos membros da Xunta de Compensación, incluído o representante da Administración actuante, sendo o seu presidente e secretario o mesmo có do consello rector.

Artigo 21º.-Reunións.

a) A asemblea xeral reunirase con carácter ordinario, polo menos, unha vez ó ano, coa finalidade de deliberar e adoptar acordos sobre a aprobación do orzamento, a memoria anual, o balance e contas, así como, se é o caso, das xestións realizadas polo consello rector ou as acordadas pola asemblea.

Con carácter extraordinario reunirase cantas veces o considere necesario o seu presidente, o consello rector por maioría dos seus membros ou o solicite un número de membros da xunta que represente unha cuarta parte do total das cotas de participación.

b) Estando reunidos tódolos membros da xunta, poderá celebrarse a asemblea, se se acorda por unanimidade, sen necesidade de previa convocatoria.

Artigo 22º.-Eficacia.

Tódolos membros da xunta, mesmo os disidentes e os non asistentes á asemblea xeral, quedan sometidos ós seus acordos validamente adoptados.

Artigo 23º.-Facultades.

A asemblea xeral coñecerá de todos cantos asuntos afecten ó obxecto e fins da Xunta de Compensación, sinalándose para o efecto, con carácter enunciativo, as seguintes facultades:

a) Aprobación dos orzamentos de gastos e investimentos.

b) Aprobación da memoria e balance anual.

c) Modificación dos estatutos e bases de actuación, sen prexuízo da súa aprobación posterior pola Administración actuante.

d) Designación e cesamento dos membros do goberno e administración da xunta e, se é o caso, de auditores ou censores de contas.

e) Fixación de medios económicos e contribucións ordinarias e extraordinarias.

f) Aprobación de indemnizacións e prezos xustos.

g) Autoriza-la formalización de actos dispositivos sobre bens e dereitos pertencentes á xunta, tales como adquisicións, alleamentos, concesións, segregacións, dereitos de superficie, divisións, agrupacións, permutas, obras, plantacións, declaracións de obra nova e división horizontal, constitución de gravames e dereitos reais, así como cancelación destes e demais actos de administración e disposición relativos a bens e dereitos da Xunta de Compensación.

h) Aproba-lo proxecto de compensación, de conformidade coas bases de actuación, determinando as adxudicacións dos predios resultantes e aprobación do proxecto de urbanización.

i) Contratación das obras de urbanización de conformidade co artigo 176 do Regulamento de xestión urbanística.

j) Determina-la prioridade na execución das obras de urbanización e edificación, se é o caso, por proposta do consello rector, dentro das previsións do plan de etapas.

k) Acorda-la constitución de garantías que poidan esixi-los órganos urbanísticos para asegura-las obrigacións contraídas pola xunta.

l) Acorda-la formalización de créditos para realiza-las obras de urbanización.

ll) Aprobación da incorporación de empresas urbanizadoras así como acorda-la constitución de sociedades con fins de urbanización, edificación, explotación de servicios ou complementarias destas.

m) Aproba-la disolución da Xunta de Compensación.

n) En xeral, calquera outro asunto e cantas facultades sexan precisas para o normal desenvolvemento dos fins da xunta.

Artigo 24º.-Convocatoria.

1. O secretario, por orde do presidente, será quen convoque a asemblea xeral ordinaria, mediante carta certificada enviada ó domicilio dos membros asociados da Xunta de Compensación, cunha antelación mínima de oito días hábiles contados desde a data da imposición do certificado, indicando, de conformidade cos estatutos, a data en que se vaian celebrar e coa mesma antelación con anuncio no domicilio social. Nos dous casos, a convocatoria da reunión indicará o lugar, a data e a hora da primeira e segunda convocatoria e a orde do día expresiva dos asuntos que se someterán ó coñecemento e resolución da asemblea.

2. Os asociados terán á súa disposición, no domicilio social, ata un día anterior á celebración das asembleas xerais ordinarias, a memoria, o orzamento anual e as contas correspondentes; todo o cal se indicará na mesma convocatoria da asemblea.

3. As reunións de asembleas xerais extraordinarias serán convocadas polo presidente e notificadas polo secretario, por carta certificada enviada ó domicilio dos membros da xunta, coa antelación de tres días hábiles contados desde a data de imposición do certificado.

Artigo 25º.-Quórum de constitución.

1. A asemblea queda validamente constituída en primeira convocatoria, cando concorran a ela, por si ou por representación, asociados da xunta que representen polo menos o 50% das cotas de participación. En segunda convocatoria, despois de media hora da primeira, será válida a súa constitución con calquera número de asistentes, sendo preceptiva a presencia do presidente e mailo secretario.

2. Os membros da xunta poderán, por escrito e para cada reunión, designar unha persoa que os represente nas asembleas. No suposto de teren asignada a representación, por medio de poder notarial, dúas ou máis persoas, só poderá votar un dos representantes.

Artigo 26º.-Sesións.

O presidente do consello rector, ou quen establece os estatutos en caso de substitución, presidirá a asemblea xeral e dirixirá e moderará os debates, abrirá quenda para proceder á votación dos puntos da orde do día da convocatoria. O cargo de secretario en asemblea será exercido polo secretario do consello rector ou quen o substitúa.

Artigo 27º.-Adopción de acordos.

1. Quórum ordinario: os acordos alcanzaranse por maioría simple das cotas de participación presentes ou representadas, coas excepcións que sinala o apartado seguinte.

2. Quórum especial: cómpre o 60% das cotas de participación dos propietarios integrantes da xunta para adoptar acordos coa finalidade de modifica-los estatutos e bases; sinalamento e rectificación de cotas; imposición de contribucións extraordinarias; alleamento de terreos obtidos por expropiación, incorporación de empresas urbanizadoras e garantías e compromisos esixibles; aprobación do proxecto de edificación, remoción de cargos e nomeamento de xerente, así como o 80% das cotas de participación na proposta de disolución da xunta e concertación de créditos.

3. A aprobación do proxecto de compensación require o acordo adoptado pola maioría dos membros que representen a maioría absoluta das cotas de participación.

Artigo 28º.-Executividade dos acordos.

Os acordos da asemblea serán inmediatamente executivos, con independencia dos recursos que se exerzan agás que neles se acordase a suspensión.

Artigo 29º.-Cómputo de votos.

1. O voto de cada membro da Xunta de Compensación estará determinado polas cotas de participación en función do dereito de cada socio, considerándose un voto por cada unidade ou fracción

superior á metade dunha cota de participación para mante-la proporcionalidade do voto ó dereito de cada asociado.

2. As cotas de participación adxudicadas ás parcelas pola entidade como consecuencia do seu carácter de beneficiaria da expropiación, atribuiránselle á Xunta de Compensación.

3. Ó incorporarse á Administración actuante, co aproveitamento edificable e parcela/s que lle correspondan ou se chegasen a facelo empresas urbanizadoras, no momento da súa integración, reaxustaranse as participacións porcentuais dos asociados, asignando a cota correspondente a estas.

4. Os asociados serán suspendidos do exercicio dos seus dereitos na asemblea nos supostos de non estaren ó día nos pagamentos que lles correspondan así como nos supostos de incumprimento das súas obrigacións para coa xunta e durante todo o tempo que permanezan na dita situación.

Artigo 30º.-Actas.

l. Dos acordos adoptados en cada reunión da asemblea xeral levantarase unha acta que deberá ser aprobada na mesma reunión. Na dita acta, que posteriormente será transcrita ó correspondente libro de actas, farase consta-lo lugar, a data e a hora da celebración en que tivo lugar; a convocatoria en que se constituíu, a identificación dos asistentes con nome e apelidos e, se é o caso, dos representantes, orde do día que será a que figure na convocatoria previa, relación completa pero breve dos acordos adoptados, así como o resultado das votacións.

Os asistentes e mailo secretario asinarán, na parte inferior da acta ou nas follas anexas que se incorporen, a súa asistencia á asemblea e, todo iso, co visto e prace do presidente.

2. As actas figurarán no libro correspondente debidamente dilixenciado e foliado, coa sinatura do secretario e o visto e prace do presidente.

3. Por petición dos asociados ou de órganos urbanísticos, o secretario expedirá certificacións dos acordos consignados no libro de actas, co visto e prace do presidente.

4. É de aplicación, no non previsto, a lexislación do réxime local.

Capítulo II

Do consello rector

Artigo 31º.-Composición.

O consello rector é a representación permanente da asemblea e órgano normal de goberno da xunta e está integrado por un presidente, un vicepresidente, un tesoureiro, un secretario e, se cumprir, o vocal ou vocais que determine a asemblea, ademais dun vocal, un representante da Administración, os cales serán elixidos na primeira asemblea xeral. Os cargos serán exercidos por persoas físicas, entre os membros da xunta ou dos seus representantes ou, por petición e proposta destes, de persoas de recoñecida compentencia urbanística.

Artigo 32º.-Competencia do consello rector.

Son as súas funcións as seguintes:

a) Administra-la Xunta de Compensación de conformidade coa lei e mais estes estatutos e bases de actuación.

b) Propoñe-los acordos que adoptará a asemblea xeral.

c) Executa-los acordos da asemblea xeral.

d) Representar xuridicamente á Xunta de Compensación con plena personalidade ante o Estado, a provincia, o municipio, órganos urbanísticos, entes estatais e paraestatais, incluído o Xurado Provincial de Expropiación, empresas particulares e persoas individuais coa finalidade de executa-los acordos da xunta.

e) Autoriza-la celebración de toda clase de actos e contratos, públicos e privados, civís, mercantís e administrativos necesarios para o desenvolvemento da actividade da Xunta de Compensación, necesitando da ratificación da asemblea xeral para a súa validez.

f) Facer e esixir toda clase de pagamentos, cobros, liquidacións sexa cal for a súa causa xurídica e persoa ou entidade obrigada ó pagamento, segundo o acordado pola asemblea xeral.

g) Abrir, manexar e cancelar toda clase de contas en entidades bancarias ou de aforro así como dispoñer de fondos nelas, mediante a sinatura das persoas autorizadas para tal fin.

h) Expedir, aceptar, endosar, descontar. e protestar letras de cambio, talóns ou obrigas de pagamento.

i) Realizar toda clase de operacións con calquera das facendas públicas, estatais, autónomas e municipais así como con todo tipo de entidades de aforro e bancos, incluído o Banco de España, sociedades, seguros, empresas e particulares.

j) Contratar e separar a todo o persoal e servicios que resultasen necesarios para levar a bo fin a xestión administrativa e técnica da Xunta de Compensación.

k) Realizar actos de xestión.

l) Propoñerlle á asemblea xeral o sistema de cálculo e a determinación das porcentaxes das cotas de participación dos membros da Xunta de Compensación así como os reaxustes ou modificacións como resultantes de novas contribucións ou como consecuencia das operacións de compensación.

ll) Sinala-las cantidades que sexan necesarias para contribuír ós gastos comúns ordinarios e extraordinarios, sinalando a forma e prazos para o seu pagamento.

m) Exerce-las reclamacións e accións que sexan precisas contra os asociados morosos para facer efectivo o pagamento das cantidades debidas que lles

correspondan, así como esixir da Administración actuante o uso da vía de constrinximento contra os ditos asociados morosos.

o) Solicita-las exencións e beneficios fiscais que a lei lles atribúe ás xuntas de compensación.

p) Fixar e modifica-lo domicilio social da xunta.

q) Propoñer unha xerencia técnica, establecendo as súas funcións e contido.

r) Tamén lle corresponderán ó consello rector tódalas restantes facultades que non sexan compentencia da asemblea xeral, así como as que esta última delegue nela.

Artigo 33º.-Duración de cargos.

Os cargos dos membros do consello rector terán unha duración de dous anos, coa posibilidade de seren reelixidos por outros períodos. Non obstante o anterior, poderán ser cesados durante a vixencia de calquera dos seus mandatos, se así se acorda na asemblea xeral, cun voto que represente o 60% das cotas de participación.

Para o suposto de vacantes por falecemento ou renuncia dalgún membro, deberá notificarse fidedignamente á Xunta de Compensación. Para os ditos casos, así como para o suposto de cesamento dalgún membro, o consello nomeará por maioría e con carácter provisional, entre os asociados, un substituto; o seu cargo durará ata a primeira reunión que se convoque da asemblea xeral. O elixido desempeñará o cargo durante o prazo que lle faltase por transcorrer ó substituído.

Artigo 34º.-Sesións.

O consello rector reunirase, por propia iniciativa ou por petición dun tercio dos seus membros, as veces que sexa necesario para o desenvolvemento e boa xestión da Xunta de Compensación.

A convocatoria será realizada polo secretario, mediante carta certificada con xustificante de recepción, con oito días hábiles de antelación contados a partir da imposición do certificado ou calquera medio que deixe constancia da súa recepción, a cada membro, indicándose o día, a hora, o lugar e a orde do día que se vai tratar. As reunións do consello consideraranse validamente constituídas cando, sen mediar convocatoria, estean presentes tódolos membros, presentes ou representados, sendo posible a delegación, por escrito e para cada sesión, duns membros ós outros.

As decisións do consello rector tomaranse por maioría dos votos dos asistentes, dirimindo os empates o voto de calidade do presidente e as ditas decisións serán inmediatamente executivas sen prexuízo dos recursos oportunos.

Os acordos adoptados polo consello rector seranlle notificados ós asociados por correo certificado con

xustificante de recepción, nos quince días posteriores á data de celebración, ó domicilio que conste na secretaría.

Artigo 35º.-Actas e certificacións.

1. Os acordos adoptados e o resultado das votacións do consello rector serán recollidos na acta da sesión polo secretario, deberá ser debidamente dilixenciada e asinada co visto e prace do presidente, podendo ser aprobada na mesma sesión ou na seguinte que se celebre.

2. Os asociados, os órganos urbanísticos ou persoas interesadas poderán solicitar certificación dos acordos que, consignados no libro de actas, sexan adoptados no consello rector, e estas deberanse expedir co visto e prace do presidente.

Capítulo III

Do presidente, vicepresidente e secretario

Artigo 36º.-Nomeamento e duración.

O presidente, o vicepresidente e mailo secretario serán elixidos pola asemblea xeral e o seu cargo durará de conformidade co artigo 33º destes estatutos. En caso de vacante do posto de secretario, será elixido polo presidente entre os membros do consello rector.

Artigo 37º.-Funcións do presidente.

A) Convocar, presidir, suspender e levanta-las sesións dos órganos colexiados da xunta, dirixi-las súas deliberacións e executar e facer cumpri-los acordos.

B) Representar xudicial e extraxudicialmente a xunta de compensación e os seus órganos de goberno, ante toda clase de xulgado, tribunal, autoridades e órganos de calquera Administración, así como ante calquera persoa xurídico-pública ou xurídico-privada; podendo outorgar poder a favor de procuradores e letrados coas máis amplas facultades de postulación.

C) Formular, outorgar e autorizar requirimentos incluso notariais; pedir protocolizacións notariais de actas e de calquera clase de documento; pedir e obter copias auténticas dos protocolos notariais, certificacións dos rexistros da propiedade así como inscricións e anotacións; outorgar ante notario e inscribir ou anotar nos ditos rexistros documentos emendatorios ou aclaratorios de toda índole e pedir certificacións e informes de expedientes administrativos.

D) Asinar documentos de disposición, de conformidade cos acordos adoptados pola asemblea xeral.

E) Dirimi-los empates co seu voto de calidade.

F) Exercer calquera actividade bancaria que esixa o funcionamento da xunta, da forma e cos requisitos que lle sinale o consello rector.

G) Tódalas funcións que sexan inherentes ó seu cargo ou que lle sexan delegadas pola asemblea ou consello rector.

Artigo 38º.-Funcións do vicepresidente.

A) Substituí-lo presidente, nas súas facultades nos supostos de vacante, ausencia, imposibilidade ou enfermidade.

B) Substitución do presidente nos casos de delegación deste.

C) Asinar conxuntamente co presidente os documentos de disposición de fondos a que se fai referencia no artigo 37º dos estatutos.

Artigo 40º.-Funcións do secretario.

A) Asistir obrigatoriamente a tódalas reunións da asemblea xeral e do consello rector.

B) Levantar acta das sesións, transcribíndoas posteriormente ó libro de actas e expedir certificacións do contido do libro de actas, co visto e prace do presidente.

C) Levar un libro-rexistro en que se relacionarán os asociados membros da Xunta de Compensación, indicando as súas circunstancias persoais, domicilio, data de incorporación, cota de participación, número de votos e cantos datos complementarios se consideren procedentes.

D) Realiza-las notificacións dos acordos da asemblea xeral e do consello rector ós asociados membros da xunta e ós órganos urbanísticos.

E) Custodia-las documentacións da Xunta de Compensación.

Título V

Contribucións e medios económicos

Artigo 40º.-Tipos de contribucións.

As contribucións dos membros da xunta calcularanse en relación coa superfieie dos seus terreos incluídos dentro da unidade de actuación e estarán constituídas por:

A) Con carácter fiduciario, agás que se acorde outra cousa, pola totalidade dos terreos e dereitos que resulten para efectos da actuación.

B) Polas cotas ordinarias e extraordinarias satisfeitas polos membros e polas cesións de solo ou de dereitos edificables cedidos por estas á xunta.

C) Por subvencións, créditos, doazóns e outros medios económicos que se obteñan.

D) Polas rendas e productos do seu patrimonio.

E) Polas contribucións das empresas urbanizadoras, en caso de incorporación á Xunta de Compensación.

F) Os ingresos obtidos por vendas de bens e servicios.

Artigo 41º.-Achega de terreos.

A) A distribución de participación nos dereitos e obrigacións comúns e a conseguinte adxudicación de parcelas resultantes da urbanización vén deter

minada pola cota de participación que lles corresponda ós predios achegados por cada un dos propietarios, calculada conforme o disposto nestes estatutos e nas bases de actuación.

B) Nos terreos gravados con cargas reais, os seus propietarios deberán compartir co titular do dereito a cota atribuída.

A non declaración dalgún tipo de carga polo propietario do terreo suporá que serán pola súa conta os danos e perdas ocasionados á xunta.

C) En canto ós bens e dereitos que como consecuencia do planeamento deban demolerse ou desaparecer pola execución material da urbanización e que afecten ó voo, solo ou subsolo de superficies que sexan obxecto de cesión obrigatoria e gratuíta, determinarase a súa compensación para efectos de indemnización, de acordo coas bases de actuacións, pero non influirá na participación dos asociados.

Artigo 42º.-Cotas.

Existirán dúas clases de cotas; as ordinarias e as extraordinarias. As ordinarias son as destinadas a paga-los gastos da xunta que recollan os orzamentos anuais destinados ó funcionamento da xunta, custos de urbanización e, en xeral, tódolos que ocasione o cumprimento dos seus fins. As extraordinarias son aquelas que así determine con este carácter a asemblea xeral.

Artigo 43º.-Contía e pagamento de cotas.

O consello rector establecerá a forma e condicións de pagamento das cantidades que deban satisface-los asociados e procederá á súa recadación.

O importe das cotas será proporcional á participación de cada membro da xunta, incluída a Administración actuante polo aproveitamento que legalmente lle corresponda, se este se materializa en superficie edificable.

As cotas serán pagadas no prazo dun mes desde a data do seu requirimento polo consello rector. Transcorrido o dito prazo, dará lugar á imposición dunha recarga do xuro legal do diñeiro, podendo así mesmo instar á Administración actuante á utilización da vía de constrinximento ou á autoridade xudicial ordinaria para reclama-lo pagamento da débeda sinalada.

O non pagamento de máis de dúas cotas, en períódo voluntario, dará dereito á Xunta de Compensación de instar á Administración para que utilice a expropiación forzosa dos terreos do socio moroso na unidade de actuación, en beneficio da mencionada xunta, e, para ese efecto, o secretario do consello rector expedirá, co visto e prace do presidente, a correspondente certificación de descuberto.

Todo asociado terá suspendidos os seus dereitos na Xunta de Compensación desde o momento en que deixe de pagar unha soa cota no período voluntario en que aquela se faga efectiva.

Artigo 44º.-Alleamento e gravame de predios da xunta.

A Xunta de Compensación poderá allear terreos da súa propiedade obtidos por expropiación, logo do acordo da asemblea xeral, na cal se debaterá a oportunidade e prezo da dita venda. Da mesma forma, poderá procederse en relación á constitución de gravames reais sobre os ditos predios.

Título VI

Recursos

Artigo 45º.-Executividade.

Os acordos dos órganos sociais da Xunta de Compensación serán executivos sen prexuízo dos recursos que contra eles poidan proceder. Os que deben ser ratificados ou aprobados pola Administración, ou inscritos no Rexistro de Entidades Urbanísticas Colaboradoras, non terán efectividade ata a súa ratificación ou inscrición.

Os mencionados acordos non se suspenderán pola única impugnación, agás que así o acorde o órgano ó que lle corresponda resolve-lo recurso e fose solicitado polo recorrente. A suspensión comportará o afianzamento en contía suficiente, sinalada polo órgano ante o que se recorra, para garanti-los posibles danos e perdas que cause a suspensión. Se a suspensión versa sobre cotas, a fianza equivalerá á contía das cotas que se deben máis un 25% para responder ós xuros de demora e danos e perdas causados. Será plenamente válida a constitución dun aval bancario polo total do importe sinalado.

Artigo 46º

Os acordos do consello rector e da asemblea xeral poderán ser recorridos, os primeiros ante a asemblea xeral e os segundos, mediante o acordo. A dita acción poderá exercela calquera membro que non votase a favor do acordo impugnado.

Título VII

Disolución e liquidación

Artigo 47º.-Disolución.

1. A Xunta de Compensación disolverase polo cumprimento do seu obxecto e fins.

2. Tamén se disolverá polo acordo do 80% das cotas de participación dos membros da Xunta de Compensación en asemblea xeral extraordinaria, debendo subrogarse individualmente cada asociado, en proporción á súa participación, nos compromisos de todo tipo contraídos pola Xunta de Compensación, nas condicións e garantías que determine o órgano tutelar.

3. E por disolución por mandado xudicial ou prescrición legal.

Nos dous primeiros supostos será necesaria para a súa efectiva disolución a aprobación da Administración actuante.

A Xunta de Compensación, unha vez finalizada a urbanización e recibida esta pola Administración actuante, poderá transformarse en asociación administrativa de conservación, sendo necesaria a súa aprobación pola Administración.

Artigo 48º.-Liquidación.

Acordada validamente a disolución da Xunta de Compensación pola asemblea xeral, o consello rector procederá á liquidación mediante o cobro de créditos e pagamentos de débedas, distribuíndo o remanente entre os asociados en proporción ás súas respectivas cotas de participación e procedendo á cancelación da súa inscrición no Rexistro de Entidades Urbanísticas colaboradoras.

Disposición adicional

Verbo do non previsto nestes estatutos, observarase o disposto na Lei 1/1997, do 26 de marzo, do solo de Galicia, Real decreto lexislativo 1/1992, do 26 de xuño, sobre o réxime do solo e ordenación urbana, Regulamento de xestión urbanística e disposicións concordantes e, supletoriamente, o sinalado na Lei de sociedades anónimas.

Bases de actuación

Primeira.-Ámbito.

A urbanización da unidade de execución denominada Canido-Praia está delimitada no estudio de detalle aprobado polo Concello de Vigo no pleno do día 3 de marzo de 1995, o cal se executará mediante o sistema de compensación regulado no capítulo II do título IV da Lei do solo de Galicia, no capítulo II do título IV da Lei do solo estatal e no capítulo II do título V do Regulamento de xestión urbanística que a desenvolve.

Segunda.-Obxecto.

As presentes bases terán como obxecto regulamenta-las normas para conseguir, a través dun sistema de compensación, a xusta distribución de beneficios e cargas entre os propietarios dos terreos, como título de adxudicación das parcelas resultantes no futuro proxecto de compensación, así como a completa urbanización da unidade de execución.

Terceira.-Actuacións que comprende.

A actuación por compensación comprenderá:

A) Transmitir gratuitamente e libres de cargas os terreos de cesión obrigatoria e a edificabilidade asignada pola lei ó Concello.

B) Realiza-las obras de urbanización consignadas no E. D. e no proxecto de urbanización.

C) Expropia-los predios de propietarios non incorporados á Xunta de Compensación nos prazos legalmente establecidos así como daqueles membros que incumpran gravemente as súas obrigacións coa Xunta, sendo beneficiaria dela a Xunta de Compensación.

D) A xusta distribución de beneficios e cargas entre tódolos propietarios.

Cuarta.-Valoración dos predios achegados.

1. Os criterios para valora-los dereitos dos propietarios determinaranse en proporción ás achegas de solo susceptibles de aproveitamento privado, polo que a cada propietario se lle asignará unha por

centaxe en relación coa superficie total, porcentaxe que constituirá o coeficiente para a adxudicación das parcelas resultantes.

2. A superficie computable acreditarase, en primeiro lugar, por certificación do Rexistro da Propiedade; no seu defecto, por testemuño notarial de título de propiedade.

3. A falta de título de propiedade, deberá o propietario presenta-la declaración xurada en que faga consta-los lindes, a superficie, os propietarios estremeiros e mailo título de adquisición e á que se unirá un plano do terreo e cantos documentos acrediten a condición de propietario (recibo de contribución urbana ou rústica, certificado de acharse catastrado ou censado o predio, etc.). Neste suposto estará obrigado o propietario a tramita-lo correspondente expediente de dominio se así o esixise o Rexistro da Propiedade.

4. En todo caso, a Xunta de Compensación realizará a correspondente comprobación mediante medición da superficie exacta dos predios.

5. Para o suposto de discrepancia entre propietarios pola titularidade parcial ou total dun predio ou para o sinalamento de lindeiros, a superficie discutida considerarase pertencente ó que posúa proba documental, indicios ou testemuños a xuízo da Xunta de Compensación, sen prexuízo da correspondente reclamación xudicial ou de soluciona-las ditas diferencias de mutuo acordo entre ámbalas partes.

6. Mentres non se resolva xudicialmente ou por mutuo acordo o problema da titularidade dun predio, adxudicaráselle a ámbolos propietarios, tendo a consideración de predio litixioso.

Quinta.-Criterios de valoración de dereitos reais e dereitos persoais existentes sobre os predios.

1. Os dereitos e cargas sobre parcelas achegadas, que sexan compatibles co planeamento urbanístico que se vai realizar, pasarán a grava-lo novo predio resultante en virtude de subrogación real, sen que iso implique altera-la valoración do predio achegado nin a adxudicación que lle corresponda.

2. Os dereitos e cargas incompatibles co planeamento serán declarados así polo proxecto de compensación e este fixará a indemnización, de conformidade coa lexislación da Lei de expropiación forzosa, pero por conta de cada propietario, sen prexuízo do que resolva a xurisdicción competente. A aprobación do proxecto de compensación suporá a extinción dos ditos dereitos e cargas.

3. O réxime da reparcelación que establece a Lei do solo de Galicia, estatal e o seu Regulamento de xestión determinará a compatibilidade ou non da carga e o procedemento que se deberá seguir.

4. En caso de existencia de dereitos do inquilinato en que non se exerza o dereito ó retorno, será o arrendador quen pague os gastos de aloxamento provisional, traslado e eventuais indemnizacións.

5. A extinción do dereito de servidume non dará dereito a indemnización no suposto de que o seu servicio sexa substituído por outro previsto na nova ordenación.

6. Se existisen obras de urbanización compatibles co novo ordenamento, e que sexan útiles para a execución do novo plan, serán consideradas como obras de urbanización con cargo ó proxecto, pagándolle ó titular do terreo o seu importe.

7. A valoración de dereitos reais ou servidume prediais e persoais sobre inmobles para efectos de determina-lo prezo xusto realizarase de conformidade coa Lei de expropiación forzosa, e subsidiariamente polas normas específicas do dereito de que se trate.

8. A valoración de arrendamentos urbanos ou rústicos que deban extinguirse por materializarse en edificios obxecto de derruba realizarase tendo en conta o seguinte:

A) Contratos de arrendamentos e as súas circunstancias.

B) Alta no imposto de actividades económicas, así como autorizacións administrativas de uso e actividade.

C) Gastos de traslado.

D) Melloras realizadas.

E) Diferencia de renda entre o actual arrendamento e o futuro.

F) E, no caso de arrendamento rústico, a actividade desenvolvida e rendementos obtidos na explotación.

Sexta.-Criterios de valoración de edificacións, obras e instalacións que deban demolerse.

1. As edificacións, obras, plantacións, instalacións e outros elementos existentes nos predios que vaian demolerse ou desaparecer, valoraranse de conformidade coa Lei de expropiación forzosa, aparecendo a súa valoración no proxecto de compensación e figurando como cargo ós gastos de urbanización.

2. Enténdense como elementos non conservables aqueles en que sexa necesaria a súa eliminación física para realiza-las obras de urbanización.

3. Aqueles elementos que, existindo sobre o predio, non fose preciso demoler, poderán conservalos os seus titulares, sen prexuízo da obrigación de regulariza-los lindes de parcelas e das segregacións precisas de superficie, subsolo ou voo, obxecto de cesión para a urbanización da actuación.

4. As edificacións e instalacións taxaranse tendo en conta os materiais empregados e o seu valor arquitectónico, con deducción dunha porcentaxe de antigüidade e estado de conservación, sen que sexan valorables as expectativas urbanísticas da presente actuación.

5. As taxacións serán realizadas por un perito da Xunta de Compensación. En caso de desconformidade do propietario, poderá este presentar unha nova valoración realizada por perito competente; de non

realizala ou de non haber acordo coa Xunta de Compensación, seguiranse os trámites da lexislación da Lei de expropiación forzosa.

6. O prezo xusto determinado pola Xunta de Compensación dará dereito ó desaloxo, logo da consignación do importe determinado polo perito da xunta, sen prexuízo de continua-lo expediente contradictorio para determinar definitivamente o prezo xusto.

7. Nas plantacións taxarase o arboredo e outras plantacións e cultivos, atendendo ó seu valor agrícola segundo un criterio de reposición.

8. Nos traslados de industrias, só son indemnizables os gastos de traslado.

Sétima.-Predios que se van expropiar.

1. Os predios que, de conformidade coa lei e estes estatutos e bases, sexan obxecto de expropiación pola Administración actuante, ben por non incorporárense en prazo ou por incumprimento grave das obrigacións e cargas dos membros da xunta, serán adxudicados á Xunta de Compensación como beneficiaria da dita expropiación; sendo de aplicación para os efectos de valoración e procedemento o disposto na lexislación urbanística, nos estatutos e nestas bases e supletoriamente na Lei de expropiación forzosa.

2. Os predios expropiados taxaranse polo seu valor inicial, o cal se determinará aplicando os criterios contidos nas disposicións que regulan as valoracións catastrais do solo de natureza rústica, a menos que se trate de solo urbano, en que se aplicarán os criterios de valoración desta clase de solo.

3. Tódolos elementos ou dereitos indemnizables que figuren construídos, plantados ou constituídos sobre predios obxecto de expropiación indemnizaranse conforme se determina nas presentes bases.

4. Por parte da Xunta de Compensación poderá procederse á demolición de edificios, construccións, industrias, plantacións ou calquera obra e ó desaloxo dos seus ocupantes, aínda cando se estea tramitando o expediente de expropiación, unha vez aprobado o proxecto de compensación e consignada a valoración realizada polo perito da dita xunta, e de igual forma poderá proceder á ocupación do solo, subsolo e voos que sexan precisos para o seu destino público ou servicios da actuación.

En todo caso, se os propietarios afectados pola ocupación demostrasen que os seus terreos constitúen a única ou predominante fonte de ingresos con que contan, terán dereito a percibir unha indemnización equivalente á rendibilidade demostrada, durante o período que medie entre a ocupación efectiva e a adxudicación que lles corresponda, ou á expropiación do seu dereito.

5. Os terreos que sexan adquiridos pola Xunta de Compensación, en virtude do procedemento expropiatorio estarán exentos do pagamento do imposto de transmisións patrimoniais e actos xurídicos documentados, así como do imposto municipal de incremento do valor dos terreos.

6. Considéranse causas de expropiación por incumprimento de obrigacións, seguíndose o procedemento sinalado nestas bases para a súa expropiación, as seguintes:

a) O non pagamento das cotas ordinarias e extraordinarias nos prazos establecidos nos estatutos, sempre e cando lle fose necesario á Xunta de Compensación acudir con anterioridade á vía de constrinximento para o cobro das cotas.

b) O incumprimento reiterado das obrigacións sinaladas no artigo 18 dos estatutos, sempre que sexa acordado pola asemblea xeral e pola Administración actuante.

Oitava.-Criterio de valoración de achegas de empresas urbanizadoras.

1. De incorporarse á Xunta de Compensación empresas urbanizadoras, a asemblea xeral determinará a cota de solo urbanizable que lle corresponda en función do valor das obras que executen.

2. A asemblea determinará a procedencia, condicións e garantías de incorporación, determinando as contrapartidas á contribución da empresa urbanizadora.

3. Se algún membro estivese desconforme coa incorporación da empresa urbanizadora, farao constar en acta, reflectíndose así mesmo a súa obrigación de sufraga-los seus gastos de urbanización, para efectos de pagamentos de cotas e adxudicacións.

4. Se entre os membros da xunta existise empresa constructora que puidese e quixese facerse cargo da urbanización das súas parcelas, sempre que as referidas parcelas constitúan unha etapa do proceso urbanizador, así o fará constar en acta, obrigándose a urbaniza-la súa parcela/s unha vez aprobado o proxecto de urbanización.

Novena.-Contratación das obras de urbanización.

1. A execución das obras de urbanización e, se é o caso, de edificación levaraa a cabo a empresa urbanizadora ou contratista idóneo, por adxudicación directa da asemblea xeral, que seleccionará, polo menos, entre tres empresas, agás no suposto de empresa ou empresas urbanizadoras incorporadas, as cales serán as adxudicatarias.

2. O contrato de execución de obras incluirá, ademais de cláusulas de contido típico, as seguintes circunstancias:

A) O compromiso da empresa constructora de realiza-las obras de total conformidade cos proxectos de urbanización debidamente aprobados.

B) A obrigación da empresa de facilita-la acción inspectora da Administración.

C) Os supostos de incumprimento que poidan dar lugar á resolución do contrato así como as indemnizacións que correspondan por inobservancia das características técnicas das obras ou dos prazos de execución.

D) A retención que, de cada pagamento parcial a conta, teña que efectua-la xunta en garantía da correcta execución das obras. Estas retencións non serán devoltas ata que non se recibise definitivamente a obra.

E) Modos e prazos para pagamento pola Xunta de Compensación de cantidades a conta en función da obra realizada.

Décima.-Custos da urbanización.

1. Os gastos de urbanización deben ser sufragados polos propietarios asociados en proporción ás súas respectivas cotas.

2. Considéranse gastos de urbanización os comprendidos no artigo 132 da Lei do solo de Galicia, artigo 155 da Lei do solo estatal e condordantes do Regulamento de xestión e, xeralmente, calquera gasto que ocasione a urbanización da unidade, así como os xuros e amortización de créditos solicitados pola xunta para as ditas obras.

3. A fixación concreta da cota que ten que satisfacer cada socio como custo de urbanización realizarase no proxecto de compensación.

Décimo primeira.-Pagamento de cotas.

1. As cotas ordinarias e extraordinarias serán pagadas polos membros da Xunta de Compensación no prazo dun mes desde que fosen requiridos polo consello rector de conformidade co establecido nos estatutos.

2. O seu pagamento en metálico, podendo a asemblea xeral acordar substituí-lo pagamento en metálico pola entrega de parte dos terreos ou superficie edificable que lle corresponda pola súa achega á xunta, quedando como partícipe polo terreo ou dereito que reteña.

3. O incumprimento do pagamento nos prazos establecidos dará lugar a inicia-lo procedemento que establece o artigo 43º dos estatutos.

Décimo segunda.-Valoración e adxudicación de predios resultantes.

1. A adxudicación de predios resultantes, incluídos os obtidos por expropiación, realizarase entre os membros da Xunta de Compensación de conformidade co proxecto de compensación aprobado pola Administración actuante.

2. O aproveitamento urbanístico da zona de actuación será o criterio para efectua-la valoración e a adxudicación de predios resultantes, en caso de aproveitamento homoxéneo, e determinarase en función das cotas de participación.

Non obstante o anterior, poderase adoptar outro criterio distinto de valoración por acordo unánime dos propietarios.

3. As diferencias en adxudicacións tanto en defecto como en exceso compensaranse en metálico, en función do prezo medio dos terreos adxudicados referido ó aproveitamento concreto que non se percibiu ou fose percibido en exceso, sendo reflectido o dito

sistema compensatorio no proxecto de compensación.

4. 0 proxecto de compensación adxudicará os predios resultantes, así como as cargas e os beneficios, en proporción ás participacións de cada membro, de conformidade co establecido nos estatutos e bases.

5. A superficie susceptible de aproveitamento privado que non resulte afecto ó dotacional público será obxecto de adxudicación.

6. Non poderán adxudicarse parcelas independentes inferiores á determinada como mínima edificable ou que non reúnan as características adecuadas para a edificación de conformidade co planeamento.

7. Procurarase que as adxudicacións de predios resultantes se realicen dentro das parcelas iniciais ou nun lugar próximo ás antigas propiedades dos mesmos titulares, respectando, sempre que sexa posible, as edificacións preexistentes nas que non sexa necesaria a súa demolición por obras de urbanización, viais ou superficie de cesión a uso público.

8. Non serán obxecto de nova adxudicación, conservándose as propiedades primitivas, sen prexuízo, cando fose necesario, da regularización de lindeiros e das compensacións económicas que proceda:

A) Os terreos edificados conforme o planeamento.

B) Os terreos con edificación non axustada ó planeamento, cando a diferencia, en máis ou en menos, entre o aproveitamento que lle corresponda conforme o plan e o que lle correspondería ó propietario en proporción ó seu dereito na reparcelación sexa inferior ó 15% deste último, sempre que non estivesen destinados a usos incompatibles coa ordenación urbanística.

C) Os terreos con edificación destinada a usos non incompatibles co planeamento, cando o custo da súa eliminación resulte desproporcionado á economía da actuación.

D) Os inmobles que iniciasen expediente de declaración de ben de interese cultural ou estean incluídos nos catálogos a que se refire o artigo 32 da Lei do solo de Galicia.

9. Se, como consecuencia do proxecto de compensación, é inferior o número de parcelas resultantes ó de titulares de parcelas iniciais ou pola escasa contía dos dereitos dalgún dos membros da xunta non puidesen acada-lo mínimo necesario para obter unha parcela edificable resultante ou cando así o acorden os propietarios afectados, adxudicaranse en pro indiviso os predios resultantes, expresando no título a cota correspondente a cada copropietario, agás que proceda a adxudicación en metálico, de acordo con estas bases, sen que por iso haxa lugar a indemnización por conta da Xunta de Compensación. No dito suposto, os adxudicatarios estarán obrigados a edificar conxuntamente.

10. Aprobado definitivamente o proxecto de compensación e outorgada pola xunta a escritura pública ou a expedición do documento administrativo coas solemnidades e requisitos dispostos para as actas

dos seus acordos co contido establecido no artigo 113.1º do Regulamento de xestión, procederase a protocoliza-la dita escritura ou documento e inscribirase no Rexistro da Propiedade. As adxudicacións gozarán da exención fiscal que establece a lexislación estatal ou autonómica, o artigo 159.4º da Lei do solo e o artigo 135.4º da Lei do solo de Galicia, en especial as previstas no artigo 159.4º do Real decreto lexislativo 1/1992, do 26 de xuño.

Décimo terceira.-Edificación.

1. Aprobado definitivamente o proxecto de compensación, poderán os titulares de parcelas independentes solicitar licencia municipal de edificación, sempre que se adquirise a condición de soar ou ben se garanta a simultaneidade da urbanización e a edificación, segundo dispón o Regulamento de xestión urbanística.

2. Para a concesión de licencia de primeira ocupación considerarase suficiente a conclusión da urbanización da etapa onde se sitúe a parcela obxecto de licencia.

Décimo cuarta.-Conservación da urbanización e transmisión á Administración actuante dos terreos e da urbanización.

1. Mentres non se proceda á recepción polo concello das obras de urbanización da unidade de execución, estas serán por conta da Xunta de Compensación.

2. A cesión do dereito ó aproveitamento que corresponda á Administración e a cesión dos terreos obxecto de cesión obrigatoria e gratuíta para os usos previstos polo planeamento realizaranse coa aprobación definitiva do proxecto de compensación, formalizándose as parcelas e cesión de terreos mediante o dito proxecto.

3. A recepción das obras de urbanización por parte do concello producirase en tres meses desde a recepción definitiva por parte da Xunta de Compensación, podendo realizarse en fraccións que constitúan unidades funcionais directamente executables.

A dita recepción será reflectida nunha acta que asinarán a Administración e maila Xunta de Compensación.

Disposición adicional

Exención de cotas de participación e urbanización.

Os predios incluídos nas áreas definidas como edificación preexistente no estudio de detalle da unidade de execución non se computarán para efectos de cota de participación e estarán exentos de gastos de urbanización, entendéndose incorporadas ó planeamento as edificacións preexistentes nos ditos predios co seu actual aproveitamento e quedando sometidas ó réxime urbanístico previsto na lexislación do solo e no planeamento xeral.

Vigo, 14 de xaneiro de 1998.

Manuel Pérez Álvarez

Alcalde-presidente da Xerencia Municipal de Urbanismo