Visto o expediente de recoñecemento e declaración de interese galego e inscrición no Rexistro de Fundacións de Interese Galego da Fundación Germán Estévez.

Supostos de feito.

1. Germán Estévez Janeiro, na súa calidade de fundador e presidente da fundación, en escrito do 24 de setembro de 1997 formulou solicitude de clasificación e de recoñecemento e declaración de interese galego e inscrición no Rexistro de Fundacións de Interese Galego.

2. A fundación constituída en escritura pública, á que están incorporados os seus estatutos, outorgada en Santiago de Compostela o día 10 de setembro de 1997, ante o notario do Ilustre Colexio da Coruña, Domingo Enrique Gutiérrez Aller, co número mil catrocentos noventa e seis do seu protocolo, por Luis Álvarez Fernández e Germán Estévez Janeiro, que interveñen en nombre propio e Germán Estévez Janeiro, ademais, en representación de Montserrat Iglesias. Esta escritura emendada por outra posterior con data do 19 de setembro de 1997 ante o mesmo notario e co número mil seiscentos dezanove do seu protocolo.

3. A Fundación Germán Estévez constitúese para a protección do medio ambiente e a conservación da natureza segundo consta no artigo 1º dos seus estatutos.

4. A comisión integrada polos secretarios xerais de tódalas consellerías eleva ó conselleiro da Presidencia e Administración Pública proposta de clasificación como de interese medioambiental da Fundación Germán Estévez, dado o seu obxecto e finalidade, polo que, cumpridos os requisitos exigidos na Lei 7/1983, do 22 de xuño, e na Lei 11/1991, do 8 de novembro, de reforma da lei anterior, de réxime das fundacións de interese galego, e segundo establece o artigo 32.1º e 2º do Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de interese galego, procede a súa clasificación como de interese medioambiental e a súa adscrición á Consellería de Agricultura, Gandería e Montes por razón da materia que constitúe o fin primordial desta.

5. Á vista da citada proposta da comisión de secretarios xerais por orde da Consellería da Presidencia e Administración Pública do 22 de outubro de 1997 (DOG do 31 de outubro), clasificouse como de interese medioambiental a Fundación Germán Estévez e adscribiuse á Consellería de Agricultura, Gandería

e Montes para efectos do exercicio do protectorado sobre ela, en cumprimento do disposto no artigo 32.3º a) do Regulamento de organización e funcionamento do protectorado das fundacións de interese galego.

6. Nas anteriormente sinaladas escrituras públicas de constitución da fundación e emenda posterior constan os extremos relativos á personalidade dos fundadores; a súa capacidade para constituíla e a súa vontade de facelo como de interese galego conforme os preceptos da Lei 7/1981, do 22 de xuño, de réxime das fundacións de interese galego, modificada pola Lei 11/1991, do 8 de novembro; os estatutos; a dotación inicial constituída por unha cantidade de diñeiro en efectivo ingresado nunha entidade bancaria a nome da fundación e que debe entenderse realizada a título gratuíto por estar afectada de modo duradeiro á realización dos seus fins, segundo se especifica no artigo 1.2º dos estatutos, e a designación das persoas naturais que constitúen o órgano de goberno inicial da fundación, coa aceptación, no devandito acto fundacional, dos seus cargos.

7. Nos estatutos da fundación constan os extremos relativos á súa denominación de Fundación Germán Estévez (artigo 1.1º), o seu obxecto e finalidade de promoción do medio ambiente e conservación da natureza mediante a realización de actividades docentes e divulgativas e a concesión de bolsas e axudas á investigación (artigo 6); o seu enderezo en Travesía Xeneral Franco, 3-1º esquerda, de Noia (A Coruña) (artigo 4); as regras para a aplicación das rendas ó obxecto fundacional e para a determinación dos beneficiarios (artigos 7 y 8) e a designación do padroado como órgano de goberno, representación e administración desta, con indicación do seu réxime de funcionamento (artigos 9 a 18 e 21).

8. En cumprimento do establecido no artigo 32.3º a) do Regulamento de organización e funcionamento do protectorado das fundacións de interese galego, con data do 3 de decembro de 1997 a Asesoría Xurídica emite informe do teor literal seguinte: visto o expediente da fundación de interese medio ambiental Germán Estévez, que ten por obxecto destinar e afecta-lo seu patrimonio á realización sen ánimo de lucro de fins xerais de interese galego e que se particularizan no seu artigo 4, tendo en conta que estes conteñen os extremos que esixe o artigo 6 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro, e co que, así mesmo, establece o Decreto 248/1992, do 18 de xuño, polo que se aproba o Regulamento e funcionamento do protectorado daquelas e demais disposicións aplicables vixentes, e ó non contradici-las disposicións aplicables básicas e de aplicación xeral contidas

na Lei 30/1994, do 29 de novembro, de fundacións e de incentivos fiscais á participación privada en actividades de interese xeral; esta asesoría informa favorablemente os ditos estatutos

Fundamentos de dereito:

Primeiro.-O artigo 34 da Constitución española recoñece o dereito de fundación para fins de interese xeral, conforme a lei, e o artigo 27.26º do Estatuto de autonomía para Galicia establece que é competencia exclusiva da Comunidade Autónoma galega o réxime das fundacións de interese galego.

Segundo.-De acordo co disposto no artigo 32.3º a) do Regulamento de organización e funcionamento do protectorado das fundacións de interese galego en relación cos Decretos 347/1997, do 9 de decembro, e 350/1997, do 10 de decembro, correspóndelle a esta Consellería de Medio Ambiente a declaración de interese galego e a inscrición no Rexistro de Fundacións de Interese Galego da Fundación Germán Estévez, así como o exercicio das funcións de protectorado e as demais que lle correspondan á Xunta de Galicia de conformidade co indicado no dito regulamento.

Terceiro.-O artigo 7 do Regulamento de organización e funcionamento do protectorado das fundacións de interese galego dispón que:

1. Para inicia-lo exercicio das súas funcións, os membros dos órganos de goberno das fundacións aceptarán o nomeamento, e que

2. A dita aceptación pode facerse constar no outorgamento da carta fundacional, en documento público independente ou en certificación do padroado, coas sinaturas do secretario e presidente, e farase constar no rexistro de fundacións, polo que, ante a salvidade contida nas escrituras de constitución da fundación sobre a acreditación da representación de Montserrat Iglesias, deberá esta acreditarse posteriormente ou procederse á súa ratificación por parte da representada para a súa inscrición no Rexistro de Fundacións de Interese Galego como membro do órgano de goberno inicial da fundación.

Cuarto.-Á vista dos artigos 2, 3, 4.1º, 5, 6, 7.1º, 2º e 5º e 11.1º da Lei 7/1983, do 22 de xuño, de réxime das fundacións de interese galego, e 4 do Regulamento de organización e funcionamento do protectorado destas, aprobado polo Decreto 248/1992, do 18 de xuño, deben entenderse substancialmente cumpridos os requisitos establecidos pola declaración de interese galego e inscrición no Rexistro de Fundacións de Interese Galego, sección da Consellería de Medio Ambiente, da Fundación Germán Estévez, polo que procede dictarse a presente orde. Por todo elo,

DISPOÑO:

Primeiro.-Recoñecer e declarar de interese galego a Fundación Germán Estévez.

Segundo.-Ordena-la a súa inscrición no Rexistro de Fundacións de Interese Galego, sección da Consellería de Medio Ambiente.

Terceiro.-Que a dita fundación expresamente sometida á Lei 7/1983, do 27 de xuño, modificada pola Lei 11/1991, do 8 de novembro, e ó seu regulamento aprobado polo Decreto 248/1992, do 18 de xuño, e demais normativa de aplicación, onde se establecen especialmente as obrigas de dar publicidade suficiente dos seus obxectivos e actividades, da ausencia de ánimo de lucro na prestación dos seus servicios, de render contas, xustificar mediante unha memoria o cumprimento das cargas fundacionais e presenta-lo proxecto de orzamento antes do último mes do exercicio económico anterior a aquel para o que se formula, todo isto con carácter anual, así como a de solicita-las preceptivas autorizacións, quede suxeita ó protectorado da Xunta de Galicia, que será exercido por esta consellería.

Santiago de Compostela, 17 de decembro de 1997.

José Carlos del Álamo Jiménez

Conselleiro de Medio Ambiente

98-735