O consello da Xunta de Galicia, na súa reunión do 11 de febreiro de 1993, aprobou o Decreto 25/1993, polo que se crea o Centro de Investigacións Lingüísticas e Literarias Ramón Piñeiro e se regula o seu funcionamento (DOG do 19 de febreiro).
Este centro de investigación encárgase de promover e desenvolver proxectos e programas galegos de estudios lingüísticos, literarios, históricos e antropolóxicos e da súa difusión, segundo determina o artigo 1 da citada disposición.
En cumprimento desta finalidade, o centro Ramón Piñeiro vén levando a cabo unha pluralidade de proxectos de investigación en tódolos campos do coñecemento que figuran como funcións propias no artigo 2 do decreto da súa creación.
Por iso, considérase conveniente cambia-lo nome deste centro polo de investigación en humanidades, por ser este concepto máis xenérico e axeitado á realidade do amplo labor que desenvolve.
En consecuencia, por iniciativa da comisión rectora do devandito centro en acordos do 17 de xaneiro e do 5 de xuño de 1997, elabórase este decreto
polo que se cambia a súa actual denominación pola de Centro Ramón Piñeiro para a Investigación en Humanidades.
Por todo o que antecede, por proposta do conselleiro de Educación e Ordenación Universitaria e logo de deliberación do Consello da Xunta de Galicia na súa reunión do día trece de novembro de mil novecentos noventa e sete,
DISPOÑO:
Artigo único.-O Centro de Investigacións Lingüísticas e Literarias Ramón Piñeiro, creado polo Decreto 25/1993, pasa a denominarse Centro Ramón Piñeiro para a Investigación en Humanidades.
Disposición derradeira
Única.-Este decreto entrará en vigor o mesmo día da súa publicación no Diario Oficial de Galicia.
Santiago de Compostela, trece de novembro de mil novecentos noventa e sete.
Manuel Fraga Iribarne
Presidente
Celso Currás Fernández
Conselleiro de Educación e Ordenación Universitaria
9000