O Pleno da Corporación, en sesión celebrada o día 25-9-1997, adoptou o seguinte acordo:
Primeiro.-Prestar aprobación definitiva ó proxecto de compensación da unidade de actuación número 17-B, situada entre a rúa Irmáns Nodales e Avenida das Corbaceiras, formulado pola xunta de compensación deste ámbito especial, coa finalidade de proceder á súa xestión e execución urbanística, determinándose que o aproveitamento urbanístico non patromonializable pola propiedade dos terreos da unidade se materialice nun local en planta baixa á da futura edificación dunha superficie de 68,29 m, co acabado de obra descrito polo arquitecto xefe do Servicio Municipal de Xestión e Disciplina Urbanística no seu informe do 22-9-1997 que se incorpora a este acto.
Segundo.-Dispor que, de acordo co apartado anterior, a xunta de compensación de unidade de actuación número 17-B redacte un proxecto de compensación refundido no que se recolla a materialización do aproveitamento urbanístico non patrimonializable pola propiedade dos terreos, segundo a compensación elixida por este órgano de goberno municipal, debéndose practica-las pertinentes correccións na documentación literal e gráfica. Unha vez emitido informe favorable polo Servicio Municipal de Xestión Urbanística este documento refundido, perfeccionarase por medio de resolución da Alcaldía, impulsándose a súa formalización do modo esixido no seguinte apartado deste acto.
Terceiro.-Determinar que a formalización do proxecto de compensación de carácter refundido se efectúe en documento administrativo coas solemnidades e requisitos dispostos para as actas dos acordos deste concello co contido legalmente esixido, ou ben mediante escritura pública se así o prefire a xunta de compensación e por conta desta. En calquera caso, o documento en que se formalice será inscrito no Rexistro da Propiedade, logo de protocolización notarial deste, sendo ámbalas obrigas por conta da xunta.
Cuarto.-Incorpora-los terreos desta unidade de actuación número 17-B de cesión obrigatoria, en pleno dominio e completamente libres de cargas e gravamens, ó patrimonio municipal e inventario de bens e á súa afectación ós usos previstos polo planeamento.
Quinto.-Ordenar que o Servicio Municipal de Arquitectura e Urbanismo vixile, unha vez aprobados definitivamente os proxectos técnicos precisos, a execución das obras e instalacións, de conformidade cos instrumentos urbanísticos sucesivamente aprobados por esta Administración municipal.
A cesión entenderase sen prexuízo do dereito de ocupación para procederse á execución das obras, tendo que efectuarse a cesión e entrega da urbanización nun prazo non superior a tres meses contado desde a recepción definitiva pola propiedade, formalizándose esta en actas que subscribirán este concello e os citados propietarios.
Sexto.-Publica-lo presente acto administrativo no taboleiro de anuncios deste concello, Diario de Pontevedra e Diario Oficial de Galicia e notificárllelo individualizadamente ós interesados con comunicación de testemuño deste á Consellería de Política Territorial, Obras Públicas e Vivenda da Xunta de Galicia.
Recursos procedentes:
Contra a precedente resolución, que esgota a vía administrativa, poderá interpoñerse recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia no prazo de dous meses computados a partir do día seguinte ó desta publicación, logo de comunicación ó órgano que dictou o acto impugnado, e isto sen perxuízo de que poida exercitar, se é o caso, calquera outro recurso que se considere procedente.
Pontevedra, 3 de outubro de 1997.
Juan Luis Pedrosa Fernández
Alcalde
Julio Dapena Outomuro
Secretario xeral
97-8263