A Escola Galega de Administración Pública organiza unhas xornadas de estudio sobre a responsabilidade patrimonial das administracións públicas e do persoal ó seu servicio, conforme as seguintes bases:
1. Obxectivos.
Potencia-los coñecementos dos participantes sobre o novo sistema introducido pola Lei 30/1992, do 26 de novembro, de réxime xurídico das administracións públicas e do procedemento administrativo común, en materia de responsabilidade das administracións públicas e do persoal ó seu servicio, con especial incidencia na responsabilidade derivada do funcionamento da Administración sanitaria, de xustiza e educativa.
Trataranse estos temas:
-Responsabilidade patrimonial da Administración pública: principios e procedementos.
-Responsabilidade das autoridades e persoal ó servicio das administracións públicas.
-A responsabilidade civil da Administración no Código Penal.
-Responsabilidade polo funcionamento anormal da Administración de xustiza.
-Responsabilidade patrimonial e Administración sanitaria: presupostos e xurisdicción competente.
-Responsabilidade dos centros docentes públicos e do profesorado por danos causados ós seus alumnos.
-A responsabilidade da Administración e medio ambiente.
3. Destinatarios.
Funcionarios da Administración de xustiza e da Administración estatal, autonómica e local: profesionais do dereito, docentes universitarios, xuristas e interesados en xeral.
4. Lugar e datas.
As xornadas convocadas terán lugar os días 10 e 11 de novembro no salón de actos da Escola Galega de Administración Pública, rúa de Madrid, 2-4, polígono das Fontiñas, en Santiago de Compostela.
A dita actividade abrirase o luns, día 10 de novembro, e rematará o martes día 11.
5. Inscrición.
-Prazo: remata o mércores, día 6 de novembro de 1997.
-Lugar de presentación: no rexistro xeral da Egap (polígono das Fontiñas, rúa de Madrid, 2-4, 15707 Santiago de Compostela). Tfno.: 54 60 40. Fax: 54 63 37.
-Forma: as solicitudes de inscrición faranse por escrito, no modelo oficial que figura o final destas bases. Serán rexeitadas todas aquelas peticións que non reúnan o dito requisito.
As peticións de admisión poderanse enviar por correo ordinario ou por telefax ó número consignado.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando, a partir do día 6 de novembro, por teléfono de 10.30 a 14.45 horas, o seguinte número: (981) 54 62 39.
6. Certificación de asistencia.
Entregaráselles ó remate destas xornadas a aqueles asistentes que concorresen asiduamente a estas, e expresarase neste documento a natureza da actividade e as datas da súa realización.
Santiago de Compostela, 20 de outubro de 1997.
Domingo Bello Janeiro
Director da Escola galega de Administración Pública
8094
