O Decreto 290/1992, do 8 de outubro, polo que se modifica a composición e funcións da Comisión de Informática da Xunta de Galicia, crea as subcomisións de Informática Fiscal e Orzamentaria e a Sanitaria, co fin de estudiar e elevar ó Pleno da comisión, as propostas relativas á planificación e desenvolvemento da informática especializada nas ditas áreas.
A crecente implantación da tecnoloxía da información na área educativa fai aconsellable a creación dun órgano especializado no estudio das iniciativas informáticas en materia de educación e ordenación universitaria.
Na súa virtude, por proposta do conselleiro da Presidencia e Administración Pública e logo da deliberación do Consello da Xunta de Galicia na reunión con data do un de outubro de mil novecentos noventa e sete,
DISPOÑO:
Artigo 1º
Dependendo da Comisión de Informática da Xunta de Galicia, créase a Subcomisión de Informática Educativa, que se encargará de elevar ó Pleno da comisión, as propostas relativas á planificación xeral e desenvolvemento da informática educativa.
Artigo 2º
A Subcomisión de Informática Educativa terá a seguinte composición:
Presidente: o secretario xeral da Consellería de Educación e Ordenación Universitaria.
Vocais: o director xeral de Organización e Sistemas Informáticos.
O director xeral de Persoal da Consellería de Educación e Ordenación Universitaria.
O director xeral de Centros e Inspección Educativa.
O director xeral de Ordenación Educativa e de Formación Profesional.
O director xeral de Universidades e Investigación.
O director xeral de Política Lingüística.
O xefe do Servicio de Informática da consellería.
Secretario: o subdirector xeral de Coordinación Administrativa e Xestión Orzamentaria.
Artigo 3º
Os membros desta subcomisión poderán delegar en favor dun subdirector ou xefe de servicio do seu centro directivo.
Disposición derradeira
O presente decreto entrará en vigor o día seguinte ó da súa publicación.
Santiago de Compostela, un de outubro de mil novecentos noventa e sete.
Manuel Fraga Iribarne
Presidente
Dositeo Rodríguez Rodríguez
Conselleiro da Presidencia e Administración Pública
7568
