O Concello de Carballo (A Coruña), en sesión celebrada o día 6 de febreiro de 1997, acordou aproba-lo proxecto da obra de colectores de augas residuais, canalización do río Anllóns EDAR en Carballo, e na mesma sesión acordou solicitar da Xunta de Galicia a declaración de urxente ocupación dos bens e dereitos afectados pola expropiación forzosa ó abeiro do disposto no artigo 52 da Lei de expropiación forzosa. O concello remitiu a documentación complementaria para a correcta tramitación do expediente con data de entrada no rexistro xeral da Consellería de Xustiza, Interior e Relacións Laborais o día 20 de maio de 1997, baixo o número 6818.
Os bens nos que se concreta a declaración de urxente ocupación están determinados no expediente que se someteu a información pública.
A Dirección Xeral de Calidade Medioambiental e Urbanismo da Consellería de Política Territorial, Obras Públicas e Vivenda emitiu informe favorable. O dito informe tivo entrada no rexistro xeral da Consellería de Xustiza, Interior e Relacións Laborais o día 21 de xullo de 1997, baixo o número 10.371, precisando nel que polo que atinxe á canalización do arroio da Balsa, a execución das obras en solo apto para urbanizar poderían realizarse, sempre que non afectasen o normal desenvolvemento do plan parcial.
Considérase necesaria a declaración de urxente ocupación dos bens e dereitos precisos para a realización das obras do proxecto técnico sinalado, porque a razón que, en definitiva, motiva a solicitude do excepcional procedemento do artigo 52 da Lei de expropiación forzosa radica en que se trata dunhas obras que figuran no Plan de Saneamento de Galicia e que son absolutamente prioritarias dentro das necesidades de infraestructura deste concello e necesarias para poder cumpri-las directrices da Unión Europea, Directiva do Consello do vinteún de maio de mil novecentos noventa e un sobre o tratamento de augas residuais urbanas (DOCE 3-5-1991).
A competencia para a declaración da urxente ocupación correspóndelle ó Consello da Xunta de Galicia segundo o disposto nos artigos 27.2º e 28.2º do Estatuto de autonomía de Galicia.
Na súa virtude e por proposta do conselleiro de Xustiza, Interior e Relacións Laborais e logo de deliberación do Consello da Xunta de Galicia na súa
reunión do día dez de setembro de mil novecentos noventa e sete,
DISPOÑO:
Artigo único.-De conformidade co disposto no artigo 52 da Lei de expropiación forzosa, declárase a urxente ocupación, polo Concello de Carballo (A Coruña) para efectos de expropiación forzosa, dos bens e dereitos concretados no expediente administrativo instruído para o efecto e necesarios para a execución das obras do proxecto de colectores de auga residuais, canalización do río Anllóns EDAR en Carballo.
Santiago de Compostela, dez de setembro de mil novecentos noventa e sete.
Manuel Fraga Iribarne
Presidente
Jesús C. Palmou Lorenzo
Conselleiro de Xustiza, Interior e Relacións Laborais
7194