Polo Decreto 216/1997, do 30 de xullo, procedeuse á creación e regulación do funcionamento do Servicio de Resposta Inmediata (Seri) para determinados procedementos tramitados por instancia de parte ante a Administración autonómica de Galicia segundo os principios informadores ós que debe someterse a actuación administrativa para conseguir unha maior axilidade e eficacia no seu servicio ó cidadán.
O Decreto 239/1997, do 10 de setembro, sobre desconcentración e delegación de competencias en determinados procedementos para a implantación do Servicio de Resposta Inmediata, establece no seu artigo 2 a desconcentración nos delegados provinciais da Consellería da Presidencia e Administración Pública das competencias que ten atribuídas a Secretaría Xeral para o Turismo en relación coa inscrición no rexistro de empresas e actividades turísticas da Comunidade Autónoma de Galicia de determinadas empresas ou actividades turísticas.
Co fin de conseguir efectivamente esa desexada axilización na resolución destes procedementos é polo que procede, agora, delega-la referida competencia no xefe do Servicio Provincial de Turismo o que, sen dúbida, redundará nunha tamén maior eficacia.
Na súa virtude, facendo uso das atribucións que me confire o artigo 13 da Lei 30/1992, do 26 de
novembro, de réxime xurídico das administracións públicas e do procedemento administrativo común,
DISPOÑO:
Primeiro.-Delegar no xefe do Servicio Provincial de Turismo de Lugo a competencia para entender e resolve-los procedementos tramitados por instancia de parte en relación coa inscrición no rexistro de empresas e actividades turísticas da Comunidade Autónoma de Galicia das seguintes empresas ou actividades turísticas:
-Cafés, bares, tabernas.
-Pubs e whiskerías.
-Discotecas e salas de festa.
-Asociacións, federacións e confederacións empresariais.
-Asociacións, federacións e confederacións de profesionais do turismo.
-Padroados de turismo.
-Centros de iniciativas turísticas.
-Casinos.
-Feiras e festas típicas, sempre e cando a súa organización estea avalada pola corporación local correspondente.
-Liñas aéreas, liñas de autobuses, transporte marítimo, aluguer de coches sen conductor, transbordadores.
-Festas declaradas de interese turístico.
-Axentes da propiedade inmobiliaria.
-Museos.
Segundo.-As resolucións administrativas que se adopten facendo uso da delegación contida na presente resolución, farán constar expresamente esta circunstancia e consideraranse dictadas pola autoridade que a conferiu.
Terceiro.-En calquera momento, o delegado provincial de Lugo da Consellería da Presidencia e Administración Pública poderá reclama-lo exercicio das competencias que son delegadas por esta resolución, de acordo co establecido no artigo 14 da citada lei.
Lugo, 12 de setembro de 1997.
José Mª Moraleja Alonso
Delegado provincial de Lugo
7076
