O Concello de Tui solicitou, perante a Consellería de Economía e Facenda, a cesión do uso dunha parcela de terreo de 1900 m que forma parte do predio onde están na actualidade o centro social e o instituto de bacharelato de Tui, rúa Colón (antes estrada de Baiona), termo municipal de Tui, co fin de instalar nel unha gardería infantil.
A Consellería de Sanidade e Servicios Sociais emitiu informe favorable sobre a cesión solicitada, o que supón, segundo o disposto no artigo 24 do Decreto 50/1989, do 9 de marzo, polo que se aproba o Regulamento para a execución da Lei do patrimonio da Comunidade Autónoma de Galicia, a conformidade coa desafectación do dominio público do antedita parcela.
O artigo 10.1º da Lei 3/1985, do 12 de abril, do patrimonio da Comunidade Autónoma de Galicia, sinala que cando os bens e dereitos non fosen necesarios para o cumprimento dos fins determinantes da súa afectación, cesará a súa natureza demanial e adquirirán a condición de patrimoniais, sen perxuízo, se é o caso, do dereito de reversión nos termos da lexislación de expropiación forzosa respecto daqueles bens adquiridos por este título.
O apartado segundo do antedito artigo establece que a desafectación dos bens de dominio público da Comunidade Autónoma de Galicia deberá facerse mediante acordo do Consello da Xunta, logo da instrucción do expediente pola Consellería de Economía e Facenda, por instancia da consellería interesada, e sempre que se acredite a desaparición das causas xustificativas da afectación.
Por todo isto, de conformidade coa proposta do conselleiro de Economía e Facenda e logo de deliberación do Consello da Xunta de Galicia na súa reunión do día trinta de xullo de mil novecentos noventa e sete,
DISPOÑO:
Artigo 1º
Desaféctase do dominio público o ben inmoble que a continuación se describe:
Parcela de terreo de mil novecentos metros cadrados de extensión superficial, que forma parte do predio onde están na actualidade o centro social e o instituto de bacharelato de Tui, rúa Colón (antes estrada de Baiona), termo municipal de Tui (Pontevedra), que linda ó norte, resto do predio matriz propiedade da Comunidade Autónoma de Galicia polo que ten a súa entrada o instituto de bacharelato desde a rúa Casal Aboy; ó sur, resto do predio matriz propiedade da Comunidade Autónoma de Galicia onde está o centro social; ó leste, propiedades particulares de herdeiros do Crisóstomo e do Gil e ó oeste, resto do predio matriz propiedade da Comunidade Autónoma de Galicia ocupado polo depósito de gas do centro social.
Artigo 2º
O inmoble anteriormente descrito adquire natureza patrimonial, sen prexuízo do cumprimento da recepción formal por parte da Consellería de Economía e Facenda dos bens desafectados de conformidade co disposto no artigo 27 do Decreto 50/1989, do 9 de marzo, polo que se aproba o Regulamento para a execución da Lei 3/1985, do patrimonio da Comunidade Autónoma galega.
Santiago de Compostela, trinta de xullo de mil novecentos noventa e sete.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
6151
