Mediante a orde da Consellería de Economía e Facenda, do 25 de febreiro de 1997, publicada no Diario Oficial de Galicia nº 51, do 14 de marzo de 1997, desenvólvese a normativa reguladora correspondente á liña de axudas ó establecemento da empresa galega no estranxeiro, creada polo Decreto 454/1996, do 26 de decembro, polo que se establece un réxime de axudas á expansión exterior da empresa galega, realizándose a convocatoria, dentro dos diferentes programas que integran a dita liña, das axudas correspondentes a subvencións a fondo perdido sobre o importe dos gastos necesarios para o establecemento e posta en marcha de redes comerciais no estranxeiro, así como das subvencións a fondo perdido sobre o custo salarial de contratación laboral polas empresas de persoal especializado destinado a prestar servicios a estas en establecementos no estranxeiro.
Nos artigos 8.4º e 9.3º da Orde do 25 de febreiro de 1997 establécese que o prazo de presentación de solicitudes será o dos catro primeiros meses de cada ano natural, agás para o ano de entrada en vigor da dita orde, no que o prazo de presentación comezará a contar a partir do día seguinte ó da súa publicación no Diario Oficial de Galicia; sen embargo, con obxecto de lograr unha plena efectividade na posta en marcha destas axudas, dada a novidade que estas supoñen e o período de análise empresarial previo necesario para a toma de decisión sobre a implantación da empresa no exterior, todo iso en coordinación coa adecuada política de difusión destas axudas e os convenios recentemente subscritos co Instituto Español de Comercio Exterior, o Instituto de Crédito Oficial e as entidades financeiras , considérase conveniente ampliar para este exercicio o prazo de presentación de solicitudes.
Por todo isto, en virtude das facultades que teño conferidas,
DISPOÑO:
Artigo único.-Modifícase a orde da Consellería de Economía e Facenda, do 25 de febreiro de 1997, publicada no Diario Oficial de Galicia nº 52, do 14 de marzo de 1997, pola que se desenvolve unha
liña de axudas ó establecemento da empresa galega no estranxeiro, que pasará a te-la seguinte redacción nos artigos que se relacionan a continuación:
1. Artigo 8.4, parágrafo primeiro:
«O prazo de presentación de solicitudes será o dos catro primeiros meses de cada ano natural, agás para o ano 1997, no que o prazo de presentación de solicitudes rematará o día 14 de novembro de 1997».
2. Artigo 9.3., parágrafo primeiro:
«O prazo de presentación de solicitudes será o dos catro primeiros meses de cada ano natural, agás para o ano 1997, no que o prazo de presentación de solicitudes rematará o día 14 de novembro de 1997»
Disposición derradeira
A presente orde entrará en vigor o día seguinte ó da súa publicación no Diario Oficial de Galicia.
Santiago de Compostela, 4 de xullo de 1997.
José Antonio Orza Fernández
Conselleiro de Economía e Facenda
5470
