Visto o texto do convenio colectivo para o sector de industrias de siderometal e talleres de reparación de vehículos de Ourense (código nº 3200305) de Ourense, con entrada nesta delegación provincial o día 15-5-1997, subscrito en representación da parte económica, pola Asociación Provincial de Talleres de Reparación de Vehículos de Ourense-ATAVE, a Asociación de Concesionarios de Automóbiles de Ourense-ACAUTO- e a Asociación de Instaladores Eléctricos de Ourense, e, da parte social, polas centrais sindicais UXT, CC.OO. e CIG, todas elas con capacidade e lexitimidade suficiente para asinalo en xuntanza celebrada o día 12-5-1997, de conformidade co disposto no artigo 90.2º e 3º do Estatuto dos traballadores, texto refundido aprobado polo Real decreto 1/1995, do 24 de marzo, Real decreto 1040/1981, do 22 de maio, sobre rexistro e depósito de convenios colectivos de traballo e Real decreto 2412/1982, do 24 de xullo, sobre traspaso de funcións e servicios da Administración do Estado á
Comunidade Autónoma de Galicia, en materia de traballo. Esta delegación provincial,
ACORDA:
Primeiro.-Ordena-la súa inscrición no rexistro de convenios colectivos desta delegación provincial, con notificación ás representacións económica e social da comisión negociadora.
Segundo.-Ordena-lo seu depósito no Servicio de Relacións Laborais, Unidade de Mediación, Arbitraxe e Conciliación desta delegación.
Terceiro.-Dispoñe-a súa publicación no Diario Oficial de Galicia.
Ourense, 21 de maio de 1997.
Manuel López Casas
Delegado provincial de Ourense
Convenio colectivo para as industrias de siderometal e talleres de reparación de vehículos da provincia de Ourense
Capítulo I
Extensión e ámbito do convenio colectivo
Artigo 1º.-Ámbito territorial.
O presente convenio afecta a tódalas empresas situadas na provincia de Ourense, rexidas pola ordenanza laboral para as industrias siderometalúrxicas, sen outra excepción que as empresas que concertasen ou concerten no futuro convenio colectivo de ámbito de
empresa cos seus traballadores, sempre e cando as súas condicións sexan superiores globalmente ás do presente convenio.
Artigo 2º.-Ámbito persoal.
O convenio afectará a todo o persoal que preste os seus servicios nas empresas encadradas no ámbito de aplicación, salvo o que realiza traballos de alta dirección ou alta xestión da empresa.
Artigo 3º.-Vixencia e duración.
O presente convenio entrará en vigor, para tódolos efectos o 1 de xaneiro de 1997, independentemente da súa publicación no BOP. Será de aplicación ata que se asine outro ou outros que o substitúan.
Establécese unha duración dun ano, é dicir, ata o 31 de decembro de 1997, prorrogable pola tácita de ano en ano a partir de 1997 en períodos anuais sempre que non sexa denunciado por algunha das partes que o subscribe antes do termo da súa vixencia inicial ou de calquera das súas prórrogas. Os requisitos formais e efectos da denuncia quedan establecidos no artigo 89 do Estatuto dos traballadores.
Capítulo II
Organización do traballo
Artigo 4º.-Productividade.
Fin primordial do presente convenio colectivo é mellora-la productividade das empresas logrando ó mesmo tempo unha elevación das retribucións dos traballadores, como consecuencia da implantación do sistema de organización científica do traballo, debe producirse cos mesmos custos totais e obte-la mesma cantidade de producción cun custo total inferior, resultando, de ámbalas maneiras uns beneficios para a comunidade no seu conxunto. Para iso, como consecuencia deste convenio xorde a recomendación ás empresas, nas que iso sexa posible, para que sigan unha técnica organizativa que as leve a unha total racionalización. O sistema de traballo que se deba empregar será de libre iniciativa da empresa. Non obstante, calquera que sexa o sistema, deberase axustar ás regras que se sinalan no presente convenio, sen prexuízo da súa aprobación pola autoridade laboral competente e representantes dos traballadores.
A actividade normal do traballo é a desenvolvida polo operario medio que actúa baixo a dirección competente, pero sen estímulo dun sistema de remuneración por rendemento e sen coacción ningunha, isto é, a cantidade de traballo desenvolvida efectivamente por un obreiro capacitado realizando unha actividade mínima normal equivalente a 4800 km/hora e que foi determinado por unha correcta cronometraxe.
A actividade normal vén determinada por cen unidades centesimais ou sesenta puntos Bedaux ou o seu equivalente noutros sistemas de medición que sexan aceptados internacionalmente.
A actividade óptima é a que poida desenvolver un traballador activo adestrado no traballo e que logre nel con seguridade o nivel de calidade e precisión fixados pola tarefa. Esta actividade está valorada en
140 unidades centesimais ou 80 puntos Bedaux ou o seu equivalente. Será sancionable todo traballador que non acade a productividade normal durante tres días consecutivos ou cinco alternos no período de trinta días. En cada caso a empresa, para efectos de sanción apreciará a gravidade da falta á vista dos feitos producidos. Así mesmo, será obxecto de sanción o productor que de maneira reiterada manteña a actividade inferior á normal.
Establécese especificamente que a facultade de organización práctica do traballo corresponde á dirección da empresa logo de audiencia e informe dos representantes dos traballadores, e en consecuencia sinálanse entre outras as seguintes funcións:
a) Esixencia da actividade normal fixada polo convenio.
b) Adxudicación do número de máquinas ó traballador a rendemento normal.
c) Mobilidade e cambio de persoal nas empresas de acordo coas necesidades de organización e da producción na forma sinalada regulamentariamente. Nas empresas nas que se establezan sistemas de incentivos á actividade normal corresponderá o plus de carencia de incentivos do presente convenio. Nestas empresas o dito sistema deberá ser aprobado de mutuo acordo entre a dirección e os representantes dos traballadores, non deben aplicarse penalizacións ata tres meses despois de se establecer, considerándose o dito período como de proba. En ningún caso poderá penalizarse a falta de productividade e a falta de puntualidade e asistencia á vez.
Artigo 5º.-Repercusión de prezos.
Faise expresa mención que as melloras do presente convenio terán repercusión no prezo dos productos ou servicios a que esta actividade se refire.
Artigo 6º.-Postos de traballo e categorías profesionais.
Serán as que se determinan e clasifican no anexo I.
Artigo 7º.-Traballos de superior categoría.
Tódolos traballadores en caso de necesidade poderán ser destinados a traballos de categoría superior co salario que corresponda á dita categoría. Este cambio non pode ser de duración superior a dous meses. Se un traballador ocupa un posto de categoría superior durante doce meses alternos, consolidará o salario da dita categoría. No dito suposto o traballador pasará á categoría superior; en todo caso, rexerá o disposto no Estatuto dos traballadores.
Artigo 8º.-Diminuídos físicos.
Todo traballador que padeza algunha incapacidade física, será destinado a ocupa-los postos de traballo acordes coas súas aptitudes.
Artigo 9º.-Reserva do posto de traballo en caso de invalidez profesional.
Os traballadores que cesasen na empresa por causa de invalidez profesional teñen dereito a seren decla-
rados aptos para o traballo e seren reintegrados no posto de traballo que, con carácter normal ocupaban na empresa na data na que causaron baixa e no posto adecuado ás súas condicións.
Será preciso que o traballador o solicite da empresa dentro do mes seguinte á data de declaración de aptitude.
Artigo 10º.-Protección ó embarazo.
Entendémo-lo embarazo como unha función social e non como un tema que afecte unicamente á muller.
A traballadora xestante terá dereito a ocupar, durante o seu embarazo, un posto de traballo e/ou quenda distinto ó seu, se a prescrición do especialista que atende o seu embarazo así o aconsellase, pola que o Comité de Saúde Laboral, ou representante dos traballadores e traballadoras proporá á empresa o cambio de posto de traballo ou quenda. Se a empresa se negase, denunciarase á Inspección de Traballo, quen se deberá pronunciar no prazo de tres días. Este cambio de posto de traballo non suporá modificación na súa categoría, nin mingua nos seus dereitos económicos. Finalizada a causa que motivou o cambio, procederase á súa reincoporación ó seu destino orixinal. Ante a imposibilidade de cambio de posto de traballo, a traballadora embarazada pasará á situación de I.T. e tal como se considera anteriormente, despois do informe do médico especialista.
Artigo 11º.-Principio de igualdade de oportunidades e de trato.
Ningún traballador ou traballadora poderá ser discriminado ou discriminada en razón do seu sexo. Tódolos traballadores teñen dereito ó respecto á súa dignidade e á protección á súa intimidade. Polo tanto, en consonancia coa lexislación vivente, os comités de empresa e/ou representantes dos traballadores e traballadoras vixiarán o cumprimento das seguintes normas:
a) Que non figure nas condicións de contratación ningún requisito que supoña discriminación por sexo.
b) Que non se produzan diferencias nas denominacións dos postos de traballo en función por sexo.
c) Que ningún traballador ou traballadora poderá ser obxecto de decisións e/ou condicións, ou calquera clase de medidas, que comporten un trato discriminatorio en materia de salarios, promoción, conservación do posto de traballo, etc., en razón do seu sexo.
d) Ningún traballador ou traballadora poderá ser discriminado, sancionado ou despedido por cuestións relativas á súa intimidade, sempre que non afecten á actividade laboral.
e) Evitarase na redacción do convenio a linguaxe sexista.
Capítulo III
Formación e ingreso do persoal
Artigo 12º.-Período de proba.
O período de proba será de quince días para os seguintes traballadores: peón, especialista, oficial de
3ª, oficial de 2ª e oficial de 1ª. Para as demais categorías rexerá o disposto no Estatuto dos traballadores.
Artigo 13º.-Rexistro de persoal.
Mantense a obriga de levar un rexistro xeral do persoal dentro de cada empresa. Os modelos de cotización á Seguridade Social serán expostos no taboleiro de anuncios.
Artigo 14º.-Prohibición da discriminación.
Prohíbese toda discriminación por razón de sexo, idade ou nacionalidade dos traballadores en materia salarial de promoción e ascenso.
Artigo 15º.-Situación laboral dos traballadores.
As empresas entregaranlles ós traballadores que o soliciten dentro dos dez días seguintes á súa incoporación ó traballo, copia da acta debidamente dilixenciada polo organismo competente.
Artigo 16º.-Cláusula xeral sobre formación.
As partes asinantes coinciden en que unha das causas da deficiente situación do mercado de traballo, deriva do afastamento da formación profesional respecto de necesidades auténticas de man de obra, e da carencia dunha formación ocupacional continua para a actualización e adaptación dos traballadores activos ás novas características das tarefas da empresa.
A formación profesional, en tódalas súas modalidades (inicial ou continua) e niveis, debe ser considerada como un instrumento máis de significativa validez, que coadxuve a logra-la necesaria conexión entre as cualificacións dos traballadores e os requirimentos do mercado de traballo (emprego). E nunha perspectiva máis ampla, ser un elemento dinamizador que acompañe ó desenvolvemento industrial a longo prazo, permita a elaboración de productos de maior calidade que favoreza a competitividade das nosas empresas españolas no ámbito internacional; e faga posible a promoción social integral do traballador, promovendo a diversificación e afondamento dos seus coñecementos e habilidades de modo permanente.
Para estes efectos, as partes asinantes coidan conveniente:
-Realizar, por si ou por medio de entidades especializadas, estudios de carácter prospectivo respecto das cualificacións futuras e necesidades de man de obra no sector.
-Desenvolver e promove-la aplicación efectiva do artigo 22 do Estatuto dos traballadores, así como dos convenios internacionais subscritos por España, referentes ó dereito á formación continua, facilitando o tempo necesario para a formación.
-Propor e executar accións formativas nas súas diversas modalidades e niveis, xa sexa con programa que poidan impartirse nos centros de formación de empresa ou os que no futuro puidesen constituírse como a través dos programas nacionais ou internacionais desenvolvidos por organismos competentes.
-Colaborar, segundo as propias posibilidades, ou mediante entidades especializadas, no diagnóstico e deseño de programas puntuais de formación nas
empresas, tendo en conta as especificacións e necesidades concretas, así como as características xenéricas ou individuais dos traballadores afectados.
-Coordinar e segui-lo desenvolvemento de formacións en prácticas, dos alumnos que sexan recibidos polas empresas, no marco dos acordos asinados a nivel sectorial ou por empresas.
-Avaliar de maneira continuada tódalas accións emprendidas co fin de revisa-las orientacións, promover novas actividades e autoriza-la definición dos obxectivos da formación profesional.
-Nesta perspectiva, as partes asinantes do presente convenio consideran conveniente que as empresas desenvolvan, neste sentido, procesos formativos (diagnósticos, programación, cursos, avaliación), podéndose constituír en empresas de máis de 250 traballadores, comisións paritarias de estudio que teñan por obxectivos a avaliación e información sobre o proceso formativo da empresa.
Artigo 17º.-Traballadores en formación laboral.
As relacións laborais entre empresa e traballadores con contrato para a formación laboral rexeranse polas seguintes normas:
-Os menores de 16 anos non poderán ser contratados en ningunha empresa.
-Toda relación laboral cos traballadores menores de 18 anos revestirá a forma legal de contrato para a formación laboral, salvo que o traballador dispoña de titulación profesional.
Artigo 18º.-Medidas de fomento do emprego e da contratación laboral.
Co fin de fomenta-la concentración e debido ós límites a esta impostos por causa das últimas modificacións lexislativas, as partes acordan que a duración máxima do contrato eventual por circunstancias da producción será de dezaoito meses dentro dun período de trinta e seis.
Capítulo IV
Retribucións do persoal
Artigo 19º.-Salario base.
O salario base por categoría especifícase que o anexo I do convenio (1ª columna).
Artigo 20º.-Complemento persoal por antigüidade.
O complemento persoal de antigüidade continúa fixado en quinquenios do 6% sobre o salario base.
Artigo 21º.-Plus de carencia de incentivos.
As empresas que non teñan regulada a retribución do traballador en función do rendemento, establécese o devengo do plus de carencia de incentivos como prima de productividade e asistencia. O plus aboarase mensualmente.
O dereito á percepción deste plus perderase total ou parcialmente polas seguintes causas:
-O 25% do plus correspondente ó salario dun día por falta de puntualidade de ata 5 minutos. A reincidencia neste tipo de falta gravarase co 50%.
-O 75% do plus correspondente ó salario dun día por falta de puntualidade superior a 5 minutos e ata media hora.
-O 100% por máis de media hora, sen chegar ó día completo.
-O correspondente a dous días por cada falta de asistencia.
O abandono do traballo antes da hora sinalada, a non incorporación á hora xusta de empezalo e as interrupcións inxustificadas consideraranse como faltas de puntualidade para estes efectos.
O plus de carencia de incentivos aboarase pola segunda columna da táboa salarial e por día efectivo de traballo. Para efectos de percepción do plus, o sábado entenderase como día efectivamente traballado.
Artigo 22º.-Traballo da muller.
Se a realización de tarefas consideradas tóxico-penosas, molestas ou insalubres afectasen á situación de embarazo ou maternidade, terán que ser excluídas para a muller.
Artigo 23º.-Plus de traballos especiais.
As porcentaxes que hai que aboar por tales traballos regulados na ordenanza laboral serán do 25, 30 e 35 por cento.
Artigo 24º.-Plus de xefe de equipo.
De acordo co establecido no artigo 79 da ordenanza laboral de siderometal, o xefe de equipo percibirá un plus consistente nun 20% sobre o salario base da súa categoría.
Artigo 25º.-Gratificacións extraordinarias.
Aboaranse de acordo co establecido na ordenanza laboral de siderometal. En canto á contía, serán aboadas segundo nómina mensual normal e faranse efectivas o 15 de xullo e o 15 de decembro.
Artigo 26º.-Servicio militar.
Durante o tempo que se preste servicio militar voluntario ou obrigatorio, o traballador ten dereito á reserva do posto de traballo que se entenderá 30 días despois de licenciado, e a percepción das pagas extras na mesma contía que se estivese traballando.
Artigo 27º.-Plus de nocturnidade.
Aboarase o dito plus cun 25% sobre o salario base conforme o disposto na ordenanza laboral de siderometal.
Artigo 28º.-Horas extraordinarias.
As partes asinantes deste convenio estiman que a reducción de horas extraordinarias, é unha vía adecuada para a creación de emprego e coincidiron na recomendación de as reducir.
Poderanse realizar horas extraordinarias motivada por forza maior e as estructurais, entendendo estas
últimas como as necesarias en períodos punta de producción, ausencias imprevistas, cambios de quenda ou as de carácter estructural derivados da natureza do traballo de que se trate ou mantemento. Todo iso sempre que non poidan ser substituídos por contratacións temporais ou a tempo parcial previstas na lei. A realización das ditas horas notificarase mensualmente á autoridade laboral conxuntamente por empresa e comité ou delegados de persoal, se é o caso.
Tamén en relación co obxectivo de estimula-la creación de emprego a través da reducción de horas extraordinarias, as partes coincidiron na importancia do estricto cumprimento do artigo 35 do Estatuto dos traballadores. O incumprimento deste artigo será considerado falta grave para efectos do estatuto.
Artigo 29º.-Incapacidade laboral transitoria.
Durante o período que o traballador afectado polo presente convenio estea de baixa, como consecuencia de accidente laboral ocorrido na empresa, durantes as horas de traballo ou nos desprazamentos que se efectúen fóra do lugar habitual del, por necesidades da empresa e polo tempo indispensable de ida e volta, excluíndose o accidente in intinere, este percibirá o 100% do seu salario; debendo aboar en consecuencia a empresa a diferencia, é dicir 0 25% restante.
Igualmente, o traballador terá dereito ó 100% do seu salario en caso de hospitalización durante o tempo que dure calquera clase de ILT.
Neste suposto de hospitalización inclúese o accidente in itinere.
Así mesmo, en caso de accidente fóra da xornada laboral, os traballadores terán dereito ó 100% do seu salario mentres dure a hospitalización ata un máximo de 30 días.
Artigo 30º.-Pezas de roupa de traballo.
As empresas entregarán desde o primeiro día de traballo as pezas de roupa de protección e hixiene necesarias segundo a lexislación vixente. O persoal obreiro percibirá dúas fundas ou pezas semellantes ó entraren no traballo por primeira vez e unha vez cada seis meses.
Capítulo V
Xeira de traballo e vacacións
Artigo 31º.-Xeira de traballo e horarios.
A xeira de traballo durante a vixencia do presente convenio será de 40 horas semanais.
A dita xeira será en cómputo anual de 1792 horas.
Para adapta-la xeira laboral efectiva ó dito cómputo anual corresponden corenta horas libres. Para estes efectos, serán inhábiles no sector os días 24 e 31 de decembro. O descanso correspondente ás vintecatro horas restantes desfrutarase de común acordo entre empresa e traballador e serán por horas ou por minutos segundo o que ámbalas partes acorden.
Dentro do concepto de traballo efectivo entenderanse comprendidos os tempos horarios empregados nas xeiras continuadas como descanso ou outras interrupcións cando por normativa legal ou acordo entre partes ou pola propia organización se entendan integradas na xornada diaria de traballo. A este respecto establécese un período mínimo de 15 minutos.
O horario establécese de luns a venres salvo en empresas con tres quendas e que teñan necesidade de compensación de horas; nese caso poderase traballa-lo sábado ata compensa-la xornada.
Artigo 32º.-Vacacións.
As vacacións consistirán no desfrute de 30 días naturais. O salario que se vai percibir durante elas será igual ó dunha nómina do mes. Desfrutaranse preferentemente nos meses de xuño, xullo e agosto, confeccionando o calendario nos tres primeiros meses do ano, antes do 31 de marzo. O traballador deberá coñecer, en todo caso, o dito calendario con dous meses de antelación á data do seu defrute.
No caso de que o traballador estea de baixa antes de colle-las vacacións, estas posporanse e fixarase un novo período. En caso contrario se a baixa se producise durante o desfrute delas, estas seguirán correndo ata se cumpri-lo período correspondente.
Capítulo VI
Gastos de locomoción, manutención e estadía
Artigo 33º.-Desprazamentos e axudas de custo.
Se por necesidade e conveniencia da empresa o traballador tivese que se desprazar a prestar traballos a outros centros, o tempo que se invirta no desprazamento desde o seu centro de traballo ata aquel en que deba presta-los seus servicios deberá coincidir coa xeira establecida.
Se como consecuencia dun desprazamento tivese que iniciarse a viaxe antes de dar comezo á súa xeira ou se como consecuencia do seu regreso ó seu punto de partida este se producise unha vez superada a hora oficial de remate da xeira, o traballador percibirá o tempo de exceso de xeira como horas extraordinarias.
O importe da axuda de custo completa será de 3.285 ptas. e o da media axuda de custo de 1.565 ptas. Tamén se poderán establecer no lugar das axudas de custo o sistema de gastos a xustificar.
As empresas de nova localización e as que nun futuro trasladen o seu centro de traballo fóra do núcleo urbano aboarán ós traballadores o importe do desprazamento que se realice en autobús público ou ben facilitarán o medio de transporte para o traslado dos traballadores ó centro de traballo, tanto de ida coma de volta.
Capítulo VII
Prestacións especiais
Artigo 34º.-Xubilación.
Os traballadores que reúnan as condicións precisas para acceder á xubilación anticipada ós 64 anos de
idade, de conformidade co establecido na lexislación vixente.
Premios de xubilación:
Xubilación ós 60 anos: seis mensualidades.
Xubilación ós 61 anos: cinco mensualidades.
Xubilación ós 62: catro mensualidades.
Xubilación ós 63: tres mensualidades.
Xubilación ós 64: dúas mensualidades.
Xubilación ós 65: unha mensualidade.
O traballador que se xubile ós 64 anos de idade, ó abeiro do disposto no primeiro parágrafo do presente artigo, non terá dereito ó premio de xubilación.
Artigo 35º.-Seguro colectivo.
As empresas deberán concertar con primas íntegras ó seu cargo unha póliza de seguros que cubra as seguintes indemnizacións:
-Accidente laboral ou común con resultado de morte: 3.000.000 de ptas.
-Accidente laboral ou común con resultado de invalidez permanente total, absoluta ou gran invalidez: 3.000.000 de ptas.
-Para o persoal de nova incorporación a póliza de seguro establecida no presente artigo deberá concertarse no prazo dun mes a partir da contratación do traballador.
Capítulo VIII
Permisos, licencias, faltas e sancións
Artigo 36º.-Permisos e licencias.
En caso de matrimonio do traballador, quince días.
Por parto de esposa, catro días
Por matrimonio de fillos, dous días.
Por parto de muller traballadora, segundo lexislación vixente.
Por morte ou enfermidade grave de cónxuxe, pais, irmáns, pais políticos, avós, netos e fillos, o tempo indispensable, como mínimo dous días.
Por morte de irmáns políticos, avós políticos e tíos, dous días.
Por morte de tíos políticos, un día.
Por exames, o tempo necesario con xustificación.
Por consulta médica, o tempo necesario con xustificación.
En caso de que o feito causante ocorra fóra da provincia, corresponderá un día máis.
O traballador que teña ó seu cargo algún diminuído físico ou psíquico, terá dereito a unha reducción da xeira de, polo menos, un tercio coa correspondente reducción salarial.
Artigo 37º.-Réxime disciplinario.
Todo comportamento ou situación que atente contra o respecto á intimidade ou contra a liberdade das traballadoras e traballadores, conductas de acoso sexual verbais ou físicas, serán conceptuadas como faltas moi graves tódalas recollidas na Lei de infraccións e sancións na orde social o 7 de abril de 1988. Nos supostos en que se leve a cabo servíndose da súa relación xerárquica coa persoa afectada ou sobre persoas con contrato laboral non indefinido, a sanción aplicarase no seu grao máximo.
O comité de empresa, xunta de persoal, sección sindical ou representante dos traballadores e traballadoras, e a dirección de persoal da empresa velarán polo dereito á intimidade do traballador afectado procurando silencia-la súa identidade.
Os traballadores e traballadoras afectados por esta situación terán dereito a cambio de posto de traballo sempre que o soliciten.
Artigo 38º.-Competencias do comité de empresa e delegados de persoal.
O comité de empresa terá as seguintes competencias segundo o disposto no artigo 64 do Estatuto dos traballadores.
1. Recibir información que lle será facilitada trimestralmente polo menos sobre a evolución xeral do sector económico ó que pertence a empresa, sobre a situación da producción e vendas da entidade, sobre o programa de producción e evolución probable do emprego na empresa.
2. Coñece-lo balance, as contas de resultados, a memoria e en caso de que a empresa revista a forma xurídica de sociedade por accións ou participacións, dos demais documentos que se dean a coñecer ó a socios e nas mesmas condicións que a estes.
3. Emitir informe con carácter previo á execución por parte da empresa das decisións adoptadas por este sobre as seguintes cuestións:
a) Reestructuración do cadro de persoal e cesamentos totais ou parciais, definitivos ou temporais daquela.
b) Reducción da xornada, así como traslado total ou parcial das instalacións.
c) Plans de formación profesional na empresa.
d) Implantación ou revisión de sistemas de organización e control de traballo.
e) Estudio de tempos, establecementos de primas ou incentivos ou valoración de postos de traballo.
4. Emitir informe cando a fusión, absorción ou modificación do status xurídico da empresa supoña calquera incidencia que afecte ó volume do emprego.
5. Coñece-los modelos de contratos de traballo escritos que se utilicen na empresa, así como os documentos relativos á terminación da relación laboral.
6. Ser informado de tódalas sancións impostas por faltas graves.
7. Coñecer trimestralmente polo menos as estatísticas de índices de absentismo e as súas causas, os accidentes de traballo e enfermidades profesionais e as súas consecuencias e dos estudios periódicos ou especiais do medio ambiente laboral e os mecanismos de prevención que se utilicen.
8. Exercer un labor de vixilancia das normas laborais de Seguridade Social de tódolos pactos, condicións e usos das empresas exercendo as accións legais oportunas, así como nas condicións de seguridade e hixiene.
9. Colaborar coa dirección para conseguir cantas medidas leven ó incremento da productividade.
10. Informar ós seus representados de todo o estipulado no presente convenio.
11. Por acordo entre empresa e os representantes legais dos traballadores, poderanse acumular trimestralmente as horas sindicais que marca a Lei 8/1980, do 10 de marzo.
Artigo 39º.-Candidatos ás eleccións sindicais.
As empresas facilitarán o proceso electoral tal e como se menciona na normativa ó respecto. Así mesmo non poderán represaliar a ningún traballador que se presente a candidato ás eleccións, por motivo da presentación da candidatura.
Capítulo IX
Saúde laboral e condicións de traballo
Artigo 40º.-Plan de prevención.
Todo centro de traballo dotarase dun plan de prevención con vixencia anual ou plurianual así como dos servicios técnicos necesarios en función das características dos riscos laborais presentes no centro, para a realización do mesmo.
As representacións legais dos traballadores e das organizacións asinantes participarán na súa elaboración, seguimento e avaliación.
O dito plan levará consigo:
-A elaboración de mapas de risco.
-A determinación dos riscos existentes, a súa gravidade e extensión.
-A fixación de obxectos preventivos.
-A determinación de recursos humanos e económicos para levalo a cabo.
-Os prazos ou fases do seu desenvolvemento.
-A forma de intervención sindical na súa elaboración, control e avaliación.
-Un plan complementario de formación dos traballadores e os seus representantes.
No caso de centros de traballo moi pequenos, o dito plan poderase establecer para varios centros pertencentes a empresas ou sectores de actividades similares; nese caso participarán as centrais sindicais asinantes.
Artigo 41º.-Comités de saúde, seguridade e condicións de traballo.
En todo centro de traballo de máis de 50 traballadores de cadro de persoal constituirase un comité de saúde, seguridade e condicións de traballo que estará formado polos delegados de prevención e polo mesmo número de representantes do empresario, sendo a actuación deste órgano colexiada. Este será un órgano de participación e diálogo continuo para elaborar, controlar e avalia-los plans ou programas de prevención internos e externos á empresa.
Artigo 42º.-Avaliacións ambientais.
Todo posto de traballo con risco de exposición a axentes químicos ou físicos deberá ser avaliado nun prazo non superior a seis meses. Os resultados desta avaliación deben ser comunicados ó traballador ou traballadores afectados e ós delegados de prevención, así como quedar convenientemente arquivados.
Mentres non existan valores europeos ou nacionais, os valores límites a partir dos cales se deberán de aplicar medidas correctoras serán utilizados polo Instituto Nacional de Seguridade e Hixiene no Traballo e os gabinetes provinciais de seguridade e hixiene.
Artigo 43º.-Comité de seguridade e hixiene no traballo.
As empresas obrigaranse ó cumprimento inescusable das normas de seguridade e hixiene no traballo, en materia de aseos, vestiarios, dotacións sanitarias de urxencia, duchas, etc., de conformidade coa ordenanza de seguridade e hixiene no traballo vixente.
Para tal efecto designaranse vixiantes de seguridade e hixiene que estarán compostos polos seguintes membros:
-Empresas de 0 a 25 traballadores: 1 membro
-Empresas de 25 a 50 traballadores: 2 membros
-Empresas de 50 a 100 traballadores: 4 membros
-A partir de 100 traballadores constituirase un comité de seguridade e hixiene.
O comité será elixido por tódolos traballadores do cadro de persoal.
As funcións do comité de seguridade e hixiene serán asegurarse os dereitos dos traballadores en canto a cuestións relacionadas coa seguridade e hixiene no traballo fixadas pola lei ou convenio entre partes. Os membros do comité non terán dereito a horas sindicais retribuídas. Os membros do comité de seguridade e hixiene terán dereito á asistencia a cursos que sexan convocados para o efecto polo gabinete provincial na forma e efectos que por el se determinen.
Capítulo X
Disposicións varias
Artigo 44º.-Excedencias.
Poderán solicitar excedencia tódolos traballadores que leven como mínimo un ano ó servicio da empresa. A duración da excedencia poderá ser dun ano a cinco
anos. A petición de excedencia farase por escrito cun mes de antelación e resolta pola empresa afirmativamente cando non se cubrise con contrato de interinaxe. Nos demais casos rexerá o disposto no Estatuto dos traballadores.
Artigo 45º.-Seccións sindicais.
Naquelas empresas de 50 ou máis traballadores, de acordo entre empresa e os seus traballadores, poderá acordarse a constitución de seccións sindicais na modalidade que as mesmas acorden, de acordo coa Lei orgánica de liberdade sindical.
Artigo 46º.-Revisión médica.
En tódalas empresas afectadas polo presente convenio efectuarase unha revisión médica anual para tódolos traballadores. Estas revisións correrán a cargo da mutualidade correspondente ou da propia Seguridade Social.
Artigo 47º.-Liquidacións.
Todo traballador ó cesar na empresa poderá somete-lo recibo de liquidación ou documento que poña fin á relación laboral, antes de o asinar, á supervisión do comité de empresa ou delegado de persoal e no seu defecto á do sindicato ó que estea afiliado.
Artigo 48º.-Comisión mixta paritaria.
A comisión mixta paritaria estará integrada por seis representantes dos traballadores e seis representantes dos empresarios, os cales designarán entre si dous secretarios.
Cada parte poderá designar asesores permanentes ou ocasionais.
1. Funcións de intermediación:
A comisión poderá acorda-la designación dun ou máis árbitros externos para a solución dun conflicto determinado.
Tamén poderá delega-las súas funcións en comisións provinciais ou locais dentro do mesmo ámbito do convenio.
A comisión deberá mediar, conciliar ou arbitrar coñecendo e dando solución a cantas cuestións e conflictos lle sexan sometidos ás partes.
As cuestións e conflictos serán formulados á comisión paritaria a través das súas organizacións empresariais e sindicais asinantes do convenio. Os conflictos colectivos, o intento de solución das diverxencias laborais a través da comisión paritaria, terá carácter preferente sobre calquera outro procedemento, constituíndo trámite preceptivo, previo e inescusable para o acceso á vía xurisdiccional nos conflictos que xurdan, directa ou indirectamente con ocasión da interpretación ou aplicación do convenio colectivo.
2. Funcións de vixilancia:
As empresas están obrigadas a facilitaren aquela información que por solicitude de polo menos o vintecinco por cento dos membros da comisión paritaria lles sexa requirida sobre os seguintes aspectos:
-Cumprimento das disposicións deste convenio nas pequenas empresas.
-Subcontratación
-Economía somerxida
Artigo 49º.-Compensación e absorción.
As melloras do presente convenio poderán ser compensadas e absorbidas con calquera outra mellora voluntaria ou por disposición legal, en cómputo anual, salvo que expresamente se pacte o contrario. Todo iso segundo o disposto na O.M. do 22-11-1973, no seu artigo 10, apartado 2º, que desenvolve o Decreto 2380/1973, sobre ordenación do salario.
-Garantía ad personam. As retribucións salariais totais que á sinatura do presente convenio teñan establecidas as empresas afectadas por el, serán respectadas na súa totalidade.
Disposicións transitorias
Primeira.
O aumento do presente convenio para 1997 será dun 3,20% en tódolos conceptos retributivos o 31-12-1996 (salario base e plus de carencia de incentivos); quedan exceptuadas as axudas de custo que xa quedaron fixadas anteriormente.
Segunda.
Os atrasos derivados do presente convenio serán aboados na nómina do mes seguinte á súa publicación.
Terceira.
O presente convenio é asinado pola Asociación Provincial de Talleres de Reparación de Vehículos de Ourense (ATAVE), a Asociación de Concesionarios de Automóviles de Ourense (ACAUTO) e a Asociación de Instaladores Eléctricos de Ourense. Por parte sindical as centrais UGT, CC.OO. e CIG, todas elas con capacidade e lexitimidade suficiente de conformidade co artigo 87 do E.T.
Cuarta.-Ascensos.
Co fin de promove-la formación dos traballadores e o ascenso de categorías, a comisión paritaria deste convenio elaborará no prazo máximo de 2 meses un plan de ascensos para o sector, baseado en anos de traballo no oficio e na superación dunhas probas-exames teórico-prácticas, que a comisión paritaria elaborará para cada subsector de siderometalurxia.
Quinta.
Ámbalas partes asinantes do presente convenio comprométense a eleborar durante a vixencia del un plan de actuación de cara á formación dos traballadores, consistente fundamentalmente en facer un estudio da realidade do sector en canto ás súas necesidades, mellora da productividade, cursos de formación, áreas que comprenderá, reciclaxe, tecnoloxía punta e todos aqueles aspectos que eleven a cualificación técnica tanto dos traballadores como das emrpesas.
Sexta.
No non previsto no presente convenio rexerá o disposto na ordenanza laboral de traballo para as industrias siderometalúrxicas e talleres de reparación de
vehículos, que ámbalas partes acordan manter como lexislación subsidiaria para o non previsto no Estatuto dos traballadores.
Sétima.
A comisión paritaria do presente convenio comprométese, a partir do 1 de setembro de 1997, a reunirse co fin de trata-lo artigo relativo ó tema da antigüidade e outros asuntos de interese para as partes.
Táboa salarial
incentivos
Salario base Plus carencia
Persoal obreiro Peón 2.946 772 Lavador-engraxador 2.946 772 Especialista 2.950 808 Oficial 3ª 2.957 837 Oficial 2ª 2.958 891 Oficial 1ª 2.960 1.023 Oficial 1ª montador 2.960 1.094 Traballador menor de 18 anos 1.761 444
Persoal subalterno Alemaceneiro 2.946 772 Probador 2.962 891 Recepcionista 2.946 772 Pesador de báscula 2.946 772 Vixilante 2.946 772 Ordenanza 2.946 772 Porteiro 2.946 772 Conserxe 2.946 772 Chofer turismo 2.958 891 Chofer camión 2.960 1.026 Dependente Aux. maior 25 anos 2.957 837 Dependente Princ. 2.957 837 Telefonista 2.957 837
Persoal técnico Mestre de taller 3.696 1.105 Xefe de taller 3.697 1.295 Contramestre 3.697 1.105 Encargado 3.697 1.105 Titulado medio 3.697 1.295 Titulado superior 3.869 1.364 Delineante proxectista 3.359 1.295 Delineante 1ª 3.352 1.019 Delineante 2ª 2.960 1.023 Calcador reproductor 2.957 837 Técnico de laboratorio 3.359 1.105 Analista 3.359 1.105
Persoal administrativo Auxiliar administrativo 2.957 837 Oficial administrativo de 1ª 2.960 1.023 Oficial administrativo 2ª 2.958 891 Xefe administración 1ª 2.960 1.094 Xefe administración 2ª 2.960 1.027 Caixeiro 2.958 891 Xefe almacén 2.960 1.026 Xefe contabilidade 2.960 1.094 Viaxante e vendedor 2.957 837 Xefe laboratorio 3.697 1.295 ATS 3.697 1.295
4620
