O Pleno da Corporación municipal de Camariñas, reunido en sesión ordinaria o día 25 de marzo de 1997, acordou a cesión á Comunidade Autónoma de Galicia, dun terreo de 13.000 m, situado no lugar de Devesas, da parroquia de Ponte do Porto, municipio de Camariñas, para a construcción dun centro de educación secundaria.
Conforme os artigos 17.1º da Lei 3/1985, do 12 de abril, do patrimonio da Comunidade Autónoma galega, e 34 do seu regulamento aprobado polo Decreto 50/1989, do 9 de marzo, a adquisición pura e simple de bens a título gratuíto ou lucrativo requirirá Decreto do Consello da Xunta de Galicia, por proposta da Consellería de Economía e Facenda. Así mesmo, os artigos 23.1º da mesma lei e 38.1º do regulamento establecen que non se poderán adquirir bens ou dereitos a título lucrativo cando o valor dos gravames, cargas ou afección impostos sobre eles supere o seu valor intrínseco; se ben non se considera carga, gravame ou afección os investimentos que teña que realiza-la Comunidade Autónoma para da-lo destino de uso xeral ou servicio público da súa competencia que fixe o cedente ou doador.
Na súa virtude, de conformidade coa proposta do conselleiro de Economía e Facenda, feita nos termos nos que o Concello de Camariñas acordou a cesión e logo de deliberación do Consello da Xunta de Galicia na súa reunión do día vintenove de maio de mil novecentos noventa e sete,
DISPOÑO:
Artigo 1º
Acéptase a cesión gratuíta dun terreo de 13.000 m situado no lugar de Devesas da parroquia de Ponte do Porto, Camariñas que linda: norte, coa parcela 3 do concello de Camariñas; sur, con parede no medio de camiño público; leste con parede en medio de José Touriñán Pérez, Carmen Mouzo Rodríguez e María do Pilar Arufe Arufe; e oeste, coa parcela número dous do concello de Camariñas.
O inmoble descrito atópase inscrito nese rexistro da propiedade de Corcubión no tomo 772, folio 27 do libro 74, predio número 8.755, inscrición primeira, do concello de Camariñas.
Artigo 2º
O inmoble cedido destinarase a centro de educación secundaria en Camariñas.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público e a inscrición do ben no Rexistro da Propiedade a nome da Comunidade Autónoma.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo tódolos trámites necesarios para a efectividade do presente decreto.
Santiago de Compostela, vintenove de maio de mil novecentos noventa e sete.
Manuel Fraga Iribarne
Presidente
José Antonio Orza Fernández
Conselleiro de Economía e Facenda
4379