De conformidade co disposto no artigo 14.a), do Regulamento de procedemento para a designación dos membros dos órganos de goberno da Caixa de Aforros Provincial de Ourense, faise público que, entre as 10 e as 16 horas do próximo día 3 de xuño, celebrarase no salón de sesións da entidade (Rúa do Paseo, 6, Ourense), o acto de votación para elixir a 16 conselleiros xerais, representantes dos impositores da caixa na súa asemblea xeral, segundo acordo adoptado pola Comisión Electoral.
A relación nominal de compromisarios permanecerá exposta nas oficinas da caixa, ata o día de votación.
A elección aterase ás normas do Regulamento de procedemento para a designación dos membros dos órganos de goberno da caixa.
En especial, deberán ser tidas en conta as seguintes regras:
1ª) Cada compromisario votante poderá elixir a calquera dos compromisarios incluídos na relación nominal correspondente á súa circunscrición electoral.
Nos espacios destinados para tal efecto da papeleta de votación, os votantes escribirán os nomes e apelidos dos 16 compromisarios, como máximo, ós que elixan para acceder ó cargo de conselleiro xeral.
2ª) Tanto as papeletas como os sobres que se van utilizar na votación, confeccionados segundo modelo previamente aprobado, estarán á disposición dos compromisarios no local onde se realice a votación.
3ª) A votación será persoal e secreta.
4ª) O dereito a votar nace unicamente da inscrición na relación nominativa de compromisarios.
O votante acreditará a súa personalidade exhibindo o seu DNI ou calquera outro documento que faga fe.
5ª) Consideraranse nulas as seguintes papeletas:
-As que figuren por duplicado nun mesmo sobre.
-As que estean en branco.
-As inintelixibles a xuízo da mesa. Se existiran dúbidas sobre a identificación dalgún nome, anularase o voto correspondente a este, considerándose válidos os restantes da papeleta. Igual criterio aplicarase cando figure algún nome non incluído na relación nominal de compromisarios, ou que pertenza á circunscrición distinta do votante.
6ª) Calquera compromisario, a título exclusivamente persoal, poderá, ata o momento da votación, dirixirse ós restantes compromisarios, expoñendo as súas circunstancias e programa. Para estes efectos, a entidade facilitará a difusión dos impresos subministrados polo compromisario, poñendo exemplares suficientes del á disposición dos restantes compromisarios nos locais da entidade, ata o momento en que comece a votación.
Ourense, 8 de maio de 1997.
David Ferrer Garrido
Presidente de Caixa Ourense, presidente
da Comisión Electoral
