Por Real decreto 2637/1980, do 7 de novembro (Boletín Oficial del Estado do 10 de decembro) foi declarada ben de interese cultural con categoría de monumento histórico artístico, a igrexa monástica de Santiago de Barbadelo, no concello de Sarria, provincia de Lugo.
Sendo a devandita declaración anterior á entrada en vigor da Lei 16/1985, do 25 de xuño do patrimonio histórico español (Boletín Oficial del Estado de 29 de xuño) e da 8/1995 de 30 de outubro, do patrimonio cultural de Galicia, (Diario Oficial de Galicia do 8 de novembro), cómpre na actualidade concreta-la delimitación do seu contorno de protección.
A Dirección Xeral de Patrimonio Histórico e Documental, por Resolución do 18 de setembro de 1995 (Diario Oficial de Galicia do 8 de outubro) incoou expediente para a declaración da delimitación do contorno da igrexa monástica de Santiago de Barbadelo, no concello de Sarria, provincia de Lugo.
A tramitación do expediente levouse a cabo segundo o establecido na Lei 8/1995 30 de outubro, do
patrimonio cultural de Galicia, e demais disposicións vixentes.
Tendo en conta o disposto no artigo 12 de Lei 8/1995, do 30 de outubro, por proposta do conselleiro de Cultura e Comunicación Social e logo de deliberación do Consello da Xunta de Galicia, na súa reunión do día dezasete de abril de mil novecentos noventa e sete,
DISPOÑO:
Primeiro.-Declara-la delimitación do contorno de protección da igrexa monástica de Santiago de Barbadelo, no concello de Sarria, provincia de Lugo, segundo o disposto no artigo 11 da Lei 8/1995, do 30 de outubro, do patrimonio cultural de Galicia.
Segundo.-A zona afectada pola declaración é a comprendida na delimitación do anexo I, e no plano do anexo II.
Terceiro.-O presente decreto será notificado ó Rexistro Xeral de Bens de Interese Cultural do Estado, ó Rexistro de Bens de Interese Cultural de Galicia, ó Concello e ós interesados.
Cuarto.-O presente decreto publicarase no Diario Oficial de Galicia e no Boletín Oficial del Estado.
Disposición derradeira
O presente decreto entrará en vigor ó día seguinte ó da súa publicación no Diario Oficial de Galicia.
Santiago de Compostela, dezasete de abril de mil novecentos noventa e sete.
Manuel Fraga Iribarne
Presidente
Jesús Pérez Varela
Conselleiro de Cultura e Comunicación Social
ANEXO I
«O punto l da liña da delimitación do contorno da igrexa monástica de Santiago de Barbadelo queda definido no eixe da estrada entre Vilei e Rente no seu cruzamento co vial de acceso ó lugar de Loureiro.
Este punto únese co 2, seguindo o eixe do vial antes mencionado en Loureiro.
Continúa a delimitación en dirección oeste polos lindes sur das parcelas catastrais 557-a, 557, 556, 555, 549, 548 e 547 ata chegar ó punto 3, situado no cruzamento entre o vial de acceso ó lugar de San Silvestre e a estrada de Vilei a Rente.
Seguindo o eixe desta estrada, en dirección oeste, ata o lugar de Rente, atópase o punto 4.
A liña continúa, en dirección sur, coincidindo co eixe dun camiño sen pavimentar , ata o punto 5, situado no lugar de Devesa. As edificacións que existen aquí inclúense dentro da delimitación.
Seguindo o camiño que une Devesa con Mosteiro atópase o punto 6.
A partir deste, tomando dirección sudeste, percorre o linde entre as parcelas catastrais 349-c e 349-d, o linde sur da parcela 349-c e o oeste da 349-g, continuando polo sur das 717, 928, 165, 164, 166, 167, 667, 668, 669 e 665, ata chegar ó punto 7, situado no eixe do camiño que une Mosteiro con Surriba.
Continúa en dirección leste por camiño ata o punto 8, onde cambia (seguindo o vial) de dirección cara o norte ata o punto 9.
A partir deste punto, a liña segue polo linde leste das parcelas catastrais 752,750,751,753 e ó norte da 759, ata chegar de novo á estrada de acceso a Surriba, continuando polo eixe da estrada ata pecharse no punto l.»
97-3136