O Pleno desta corporación provincial, na súa sesión do 28 de febreiro de 1997, aprobou o seguinte:
Premio Otero Pedrayo 1997.
A teor do regulamento e correspondéndolle a esta deputación, convócase o Premio Otero Pedrayo 1997, de acordo coas seguintes bases:
1. Convocatoria.
1.1. Convócase o Premio Otero Pedrayo, dotado con dous millóns (2.000.000) de pesetas, atendendo ás disposicións do regulamento correspondente.
1.2. A presente convocatoria corresponde ó ano 1997, de acordo co disposto no regulamento, no que se establece o seu ámbito rexional e o seu carácter anual, organizada cada ano por unha das deputacións provinciais da Coruña, Lugo, Ourense e Pontevedra, por esta mesma orde.
1.3. Atendendo ás razóns expostas, a tramitación e concesión do premio nesta edición atribúeselle á Deputación Provincial de Pontevedra, que consignará no seu orzamento de gastos o importe do premio (2.000.000 de pesetas), máis gastos correspondentes á súa organización, e no de ingresos, as sumas que entregarán cada unha das demais deputacións de Galicia, cotitulares do premio, na contía de 250.000 pesetas, e na de 1.000.000 de pesetas á Xunta de Galicia.
2. Obxecto do premio.
O Premio Otero Pedrayo ten por obxecto:
2.1. Perpetuar e honra-la memoria do egrexio home de letras.
2.2. Premiar un labor que constitúa unha aportación eminente á cultura galega.
2.3. Promociona-los valores propios de Galicia e as obras que leven ó esclarecemento e mellora dos seus homes e institucións.
3. Candidatos.
3.1. Poderán optar ó premio:
-As persoas naturais nacidas en Galicia ou con residencia en calquera das súas catro provincias, por tempo dabondo para determinar, a xuízo do xurado, unha cumprida raizame nelas.
-Os grupos de traballo constituídos para este fin, establecidos en Galicia.
-As personalidades ou institucións que se teñan caracterizado pola difusión e mantemento da cultura galega.
3.2. A opción ó premio determinarase por unha candidatura que poderá ser feita:
-Por calquera persoa física ou xurídica das sinaladas no apartado 3.1., respecto de si mesmas.
-Polas entidades académicas e culturais establecidas en Galicia, respecto dos seus membros.
-Por calquera dos presidentes das deputacións provinciais de Galicia, por proposta das respectivas comisións de cultura.
-Pola Xunta de Galicia, oída a consellería correspondente.
-Polo mesmo xurado, xa constituído.
4. Tramitación.
4.1. A presentación de candidatos ó premio será formulada en escrito dirixido ó presidente da Deputación Provincial de Pontevedra, achegando os seguintes documentos:
-Resumo biográfico da persoa que aspira ó premio.
-Documentos e antecedentes que se consideren de interese para o coñecemento da súa dimensión literaria ou científica.
-Cinco exemplares mecanografados a dobre espacio do traballo co que se optase ó premio, no caso de que a proposta estea baseada nunha obra ou producción singular concreta.
-No caso de personalidades e institucións, un exemplar do regulamento ou estatutos polos que se rexan e unha relación das tarefas levadas a cabo en relación co obxecto do premio.
4.2. A presentación de candidatos realizarase no prazo de tres meses a partir do día seguinte ó da publicación desta convocatoria no BOP de Pontevedra.
Tal publicación realizarase tamén nos boletíns oficiais das provincias da Coruña, Lugo e Ourense, no DOG e nos dous diarios de máis difusión na Comunidade Autónoma.
4.3. A presentación do candidato determina a aceptación íntegra das condicións desta convocatoria e das contidas no regulamento do premio.
4.4. Rematado o prazo ó que se refire a alínea 4.2, a Secretaría da Deputación de Pontevedra expedirá certificación das propostas presentadas que, xunto con elas e coa documentación correspondente, pasarán ó xurado do premio.
4.5. A cada solicitude ou proposta xuntaránselles cantos documentos sexan considerados de interese para o mellor coñecemento do candidato.
5. Xurado e actuacións.
5.1. Para adxudica-lo premio ó que se refire esta convocatoria constituirase un xurado integrado do xeito seguinte:
-Presidente: o da Xunta de Galicia.
-Vicepresidente: o presidente da deputación convocante do premio, que neste ano lle corresponde á Deputación de Pontevedra.
-Vocais:
* Os presidentes das tres deputacións restantes ou persoas nas que deleguen.
* Presidente da Comisión de Cultura da deputación convocante.
* O conselleiro de Cultura da Xunta de Galicia.
* Un representante de cada un dos seguintes organismos:
a) Universidade de Santiago de Compostela.
b) Universidade de Vigo.
c) Universidade da Coruña.
d) Real Academia Galega.
e) Instituto Padre Sarmiento de Estudios Galegos.
* Cinco persoas de recoñecida autoridade científica e literaria designadas pola Xunta de Galicia e cada unha das deputacións.
-Secretario, con voz e sen voto, o da Deputación de Pontevedra.
5.2. O xurado constituído emitirá o seu dictame no mes seguinte ó día en que remate o prazo de presentación de candidatos e a súa actuación suxeitarse ó determinado nos artigos 4.2 a 4.6 do regulamento do premio.
5.3. Da actuación do xurado e da adxudicación do premio será redactada acta detallada que, asinada polos seus membros e coa totalidade das documentacións presentadas, pasará a coñecemento do Pleno da deputación convocante na primeira sesión que se celebre.
5.4. Copia da acta e dos demais antecedentes que cumpran para o coñecemento da tramitación do premio e remitirase ás deputacións da Coruña, Lugo e Ourense.
6. Entrega do premio.
A entrega do premio realizarse no lugar e data que determine o presidente da Deputación de Pontevedra, nun acto solemne e coa asistencia dos membros da corporación provincial e do xurado, así como de personalidades das artes, letras e ciencias da Comunidade Autónoma.
Xunto co premio, o galardoado recibirá unha copia da acta da reunión do xurado.
7. Normas supletorias.
No que non estea previsto expresamente nestas bases, o xurado e a deputación convocante terán en conta as normas contidas no regulamento do premio e nos xerais de funcionamento da corporación provincial.
Pontevedra, 13 de febreiro de 1997.
Manuel Abeledo López
Presidente da Deputación Provincial de Pontevedra