Dentro dos programas de actividades que a Academia Galega de Seguridade ten previsto realizar no ano 1997, conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración dunhas xornadas sobre policía e sociedade no ano 2000, que deberán desenvolverse conforme as seguintes bases:
Obxectivos.
As xornadas teñen por obxectivo analizar en profundidade tanto o modelo policial do futuro como a evolución que experimenta a sociedade, e as relacións policía-sociedade.
Destinatarios.
As xornadas van dirixidas ós membros dos corpos e forzas de seguridade.
Inscrición.
A inscrición dos participantes será totalmente gratuíta.
Prazas.
O número de prazas que se ofertan é de 250.
Solicitudes.
1. O persoal que desexe participar nestas xornadas deberá presentar, cuberta a máquina ou con letra moi clara, a instancia que figura no anexo.
2. O prazo para a presentación de instancias rematará o día 10 de xuño de 1997.
3. As instancias deberán enviarse á sede da Academia Galega de Seguridade: rúa de Madrid, 2-4 polígono das Fontiñas, 15703, Santiago de Compostela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Contido e duración.
As xornadas celebraranse en sesións de mañá e tarde e nelas trataranse, entre outros, os seguintes temas:
-Policía e sociedade no ano 2000.
-A profesión policial: evolución social e crise da cultura profesional.
-As organizacións policiais no limiar do ano 2000.
-Evolución da policía nunha sociedade democrática.
Datas.
As xornadas celebraranse durante os días 19 e 20 de xuño de 1997.
O horario será en xornada de mañá (9 h-14 h) e tarde (16 h-20 h) o día 19, e en sesión de mañá o día 20.
Relación de admitidos.
A relación de admitidos publicarase o día 16 de xuño de 1997 no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.
Lugar.
Salón de actos da Escola Galega de Administración Pública, sita na rúa de Madrid, 2-4, no polígono das Fontiñas, en Santiago de Compostela.
Certificado de participación.
Ó remate das xornadas entregaráselles un certificado de asistencia a aquelas persoas que acrediten a súa participación continuada a elas.
Modificacións.
A Academia Galega de Seguridade poderá modifica-lo desenvolvemento das xornadas para adaptalas ás necesidades da Administración e ás continxencias que poidan xurdir.
Santiago de Compostela, 14 de abril de 1997.
Juan José Fariñas-Ferro Rodríguez
Director xeral da Academia Galega de Seguridade
2338