O Estatuto de autonomía de Galicia atribúelle, no seu artigo 29.1º, á Comunidade Autónoma, en coherencia co artigo 149.1º.7 da C.E., competencia para a execución da lexislación do Estado en materia laboral, asumindo as facultades, funcións e servicios que neste ámbito e no nivel de execución ostenta actualmente o Estado.

Ante a elevada taxa de desemprego xuvenil existente nos países membros da Unión Europea, o Consello Europeo solicitou da comisión un libro branco sobre a estratexia a medio prazo para o crecemento, a competitividade e o emprego, co fin de nutri-la

reflexión e colaborar na toma daquelas decisións rexionais, nacionais ou comunitarias que permitan senta-las bases do desenvolvemento das economías europeas, facendo fronte á competencia internacional e creando ó mesmo tempo os postos de traballo necesarios.

Coa finalidade de intentar palia-la elevada porcentaxe de desemprego na comunidade, a política de emprego da Unión Europea, a través do Fondo Social Europeo, prevé, entre outras medidas, o cofinanciamento, xunto cos diversos poderes públicos dos estados membros, de programas tendentes á consecución do emprego.

A experiencia dos últimos tres anos de aplicación do Plan de Emprego Xuvenil demostra que o autoemprego é, hoxe en día, un instrumento eficaz para a incorporación ó mercado de traballo, polo que é necesario artellar un servicio de información, asesoramento e orientación que lle sirva ó emprendedor para coñece-la viabilidade do seu proxecto de autoemprego.

O Decreto 2/1994, do 13 de xaneiro, polo que se establece a estructura orgánica da Consellería de Familia, Muller e Xuventude, atribúelle a esta, a través da Dirección Xeral de Formación e Emprego, o exercicio das competencias e funcións, entre outras materias, no relativo á promoción de emprego e da economía social.

O Decreto 12/1997, do 23 de xaneiro, polo que se establecen as bases reguladoras do servicio da área do autoemprego, de orientación, formación e axuda ó autoemprego, recolle as accións que comprende a área do autoemprego entre as que se inclúe expresamente a información, asesoramento e orientación ós emprendedores.

Esta orde pretende concreta-los principios xerais contidos no Decreto 12/1997, do 23 de xaneiro, e regula-lo procedemento de concesión das axudas dirixidas ás entidades que participen na área do autoemprego.

O programa que se desenvolve na presente orde axustarase ó disposto nos artigos 78 e 79 da Lei 11/1992, do 7 de outubro, de réxime financeiro e presupostario de Galicia, na Lei de presupostos da Comunidade Autónoma galega para 1997, no Decreto 52/1994, do 4 de marzo, e na presente orde de convocatoria.

O devandito programa financiarase con cargo á aplicación orzamentaria 14.04.222S.479 dos orzamentos da Comunidade Autónoma para 1997, e aqueloutros que se creen como consecuencia dos créditos correspondentes ó cofinanciamento do Fondo Social Europeo.

Consecuentemente con todo o anterior, e facendo uso da autorización expresa contida na disposición derradeira primeira do Decreto 12/1997, do 23 de xaneiro, consultado o Consello Galego de Relacións Laborais e o Consello Galego de Xuventude, en exer

cicio das facultades que me confire o artigo 34 da Lei 1/1983, do 22 de febreiro, reguladora da Xunta e do seu presidente,

DISPOÑO:

Artigo 1º.-Obxecto.

1. A presente orde ten por obxecto o establecemento das bases polas que se rexerá o programa de axudas correspondentes ó servicio da área do autoemprego regulado no Decreto 12/1997, do 23 de xaneiro, que desenvolverá a Consellería de Familia, Muller e Xuventude, para o exercicio económico de 1997.

2. Co obxecto de proporcionar asesoramento gratuíto ós mozos emprendedores que pretendan crear na Comunidade Autónoma galega o seu propio posto de traballo mediante a constitución, preferentemente, de empresas de economía social, establécense, ó abeiro da presente orde, axudas para aquelas entidades que estando acreditadas conforme o procedemento establecido no Decreto 12/1997, do 23 de xaneiro, colaboren coa Consellería de Familia, Muller e Xuventude na prestación dos servicios de información, asesoramento e orientación ós emprendedores.

Artigo 2º.-Beneficiarios.

1. As entidades que se atopen inscritas no Rexistro de Entidades acreditadas conforme o procedemento regulado no capítulo II do Decreto 12/1997, do 23 de xaneiro, polo que se establecen as bases reguladoras do servicio da área do autoemprego, de orientación, formación e axuda ó autoemprego.

1.1. As entidades beneficiarias das axudas previstas na presente orde non poderán subcontrata-la prestación dos servicios de información, orientación e asesoramento.

2. Os emprendedores que precisen información, orientación e asesoramento.

Considérase emprendedor aquela persoa física que teña a vontade de crear, polo menos, o seu propio posto de traballo, mediante a posta en marcha dunha actividade económica, preferentemente, a través de fórmulas de economía social e xerenciada por el mesmo.

2.1. Os emprendedores deberán recibir persoalmente o asesoramento.

Capítulo I

Das entidades asesoras

Artigo 3º.-Selección.

As entidades que obtiveran o recoñecemento como entidade acreditada por parte da Dirección Xeral de Formación e Emprego e desexen colaborar como entidades asesoras na área do autoemprego da Consellería de Familia, Muller e Xuventude, poderán facelo sempre que sexan seleccionadas e requiridas polos emprendedores que presentando a solicitude

conforme o disposto no artigo 9º da presente orde obtivesen resolución favorable.

Artigo 4º.-Axudas.

A Consellería de Familia, Muller e Xuventude concederá ás entidades asesoras, polos servicios de asesoramento que presten ó abeiro da presente orde, unha axuda económica que poderá alcanzar ata un máximo de cinco mil pesetas por hora de asesoría e cincuenta mil pesetas por proxecto asesorado.

Artigo 5º.-Requisitos de aboamento.

Con independencia da súa contía e antes de proceder ó seu cobramento, as entidades beneficiarias das axudas previstas na presente orde, terán que acreditar:

a) Que se están ó día no pagamento nas súas obrigas tributarias e sociais, e que non teñen pendente de pagamento ningunha débeda, por ningún concepto, coa Administración pública da Comunidade Autónoma.

b) Documentación xustificativa de que os gastos para os cales se concedeu a subvención foron efectuados e os servicios prestados, respectivamente, entendéndose por documentación xustificativa os vales de asesoramento así como memoria, en modelo oficial, do asesoramento facilitado.

c) Ficha de transferencia bancaria, en modelo oficial, que será facilitada nas respectivas delegacións provinciais da Consellería de Familia, Muller e Xuventude.

d) Certificado bancario de existencia de conta.

e) Declaración expresa de que non se percibe ningún tipo de axuda da mesma natureza concedida por calquera outra Administración pública.

f) Declaración pola que se expresa a aceptación ás actuacións de comprobación da Consellería de Familia, Muller e Xuventude previstas no artigo 14.2º do Decreto 52/1994, do 4 de marzo.

Artigo 6º.-Aboamento.

O aboamento das axudas farase efectivo en forma de pagamento único, unha vez rematado o programa e unha vez recibida a documentación indicada no artigo 5º, tendo en conta que a xustificación deberá realizarse, en todo caso, antes do día 15 de novembro de 1997.

Artigo 7º.-Publicidade.

Nas accións que se leven a cabo ó abeiro da presente orde deberá figurar no lugar onde se realicen estas, de forma visible, cartel publicitario, de acordo co modelo proporcionado pola Dirección Xeral de Formación e Emprego, no que se indique que esta acción está cofinanciada pola Xunta de Galicia, Consellería de Familia, Muller e Xuventude e o Fondo Social Europeo, ámbalas dúas denominacións cos seus respectivos anagramas.

Capítulo II

Dos emprendedores

Artigo 8º.-Axudas.

Os servicios de asesoramento e información serán prestados gratuitamente ós emprendedores por parte das entidades asesoras.

Artigo 9º.-Solicitudes.

Os emprendedores que desexen obte-los servicios de información e asesoramento da área do autoemprego deberán presenta-la solicitude, segundo modelo normalizado que se publica como anexo I á presente orde. Na solicitude deberá facer constar expresamente a entidade acreditada que desexe que lle preste o asesoramento.

Artigo 10º.-Prazo.

Os emprendedores dispoñen de prazo para a presentación de solicitudes ata o 30 de setembro e poderán facer uso dos servicios de información e asesoramento ata o 31 de outubro.

Artigo 11º.-Resolución.

1. As solicitudes dos emprendedores serán resoltas polo director xeral de Formación e Emprego. A resolución seralles notificada ós interesados e xunto con ela entregaráselle un talonario de dez vales de información e outro con dez vales de asesoramento, así como un documento de opción que lle permita ó emprendedor realizar cambios de entidade asesora.

2. A resolución dos expedientes deberá realizarse no prazo dun mes contado desde o día seguinte ó de remate do prazo para a presentación das solicitudes. Transcorrido este prazo sen que recaera resolución expresa, esta entenderase desestimatoria.

Disposicións adicionais

Primeira.-Sen prexuízo das facultades inspectoras que teñan atribuídas outros órganos da Administración do Estado e da Comunidade Autónoma, do Fondo Social Europeo, ou a Unidade Administradora do Fondo Social Europeo, no Ministerio de Traballo e Asuntos Sociais, a Consellería de Familia, Muller e Xuventude poderá realiza-las comprobacións e verificacións que considere precisas para a constatación do cumprimento do disposto nesta orde e demais normativas vixentes que resulten de aplicación.

Segunda.-O incumprimento total ou parcial de calquera das condicións, así como a duplicación da axuda con cargo a outros créditos dos orzamentos xerais do Estado, da Seguridade Social, Administración institucional, autonómica ou local ou da Unión Europea, constituirán causa determinante de revogación da axuda e do reintegro desta por parte do beneficiario ou solicitante, xunto cos xuros de demora, de acordo co establecido no artigo 78.6º da Lei 11/1992.

Terceira.-A Consellería de Familia, Muller e Xuventude poderá requirir en todo momento a documentación orixinal que se considere necesaria para acreditar mellor o exacto cumprimento das condicións esixidas no programa desta orde.

Cuarta.-A Consellería de Familia, Muller e Xuventude poderá asinar convenios de colaboración con entidades públicas ou privadas para desenvolve-las accións recollidas no capítulo primeiro do Decreto 12/1997, de 23 de xaneiro, polo que se establecen as bases reguladoras do servicio da área do autoemprego, de orientación, formación e axuda ó autoemprego, así como para realizar labores de titorías daqueles proxectos empresariais presentados por emprendedores que sexan seleccionados pola Consellería de Familia, Muller e Xuventude en virtude da súa viabilidade, innovación e complexidade.

Quinta.-A concesión das axudas reguladas na presente orde terá como límite global o crédito asignado nos orzamentos xerais para 1997, da Comunidade Autónoma, para o fin que perseguen e os compromisos que se reflicten no marco comunitario de apoio procedentes do Fondo Social Europeo.

Disposicións derradeiras

Primeira.-Facúltase o director xeral de Formación e Emprego para que dicte, no ámbito das súas competencias, as resolucións e aclaracións necesarias para o desenvolvemento e cumprimento desta orde.

Segunda.-A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 18 de marzo de 1997.

Manuela López Besteiro

Conselleira de Familia, Muller e Xuventude

2351