O traslado de moluscos entre viveiros, tanto en fase xuvenil como adultos, vén recollido no Decreto 406/1996, do 7 de novembro, e constitúe unha práctica habitual que contribúe notablemente á mellora da producción e comercialización dos bivalvos, así como da calidade do producto obtido.
A incidencia de diversos factores medioambientales, tais como a calidade das augas, a presencia de biotoxinas, etc. aconsella que os traslados estean regulados por disposicións que permitan conxuga-los aspectos de producción e comercialización co medio ambiente.
Por todo isto, esta consellería,
DISPÓN:
Artigo 1º
Autorízase, con carácter xeral, o traslado en embarcacións de semente e desdobramento de moluscos bivalvos entre viveiros situados en augas dunha mesma ría.
Cando o polígono de orixe se atope no plan C (pechado, de acordo co disposto na Orde do 14 de novembro de 1995, DOG nº 221 do 17-11-1995) o dito traslado será comunicado (segundo modelo Anexo I), á delegación territorial correspondente, á batea de orixe, polo menos 24 horas antes de que este teña lugar.
Artigo 2º
Autorízase o traslado de individuos adultos en augas dunha mesma ría, sempre que se efectúe mediante embarcación e o polígono de orixe non se atope en plan C.
Cando o polígono de orixe se atope en plan C, unicamente se poderá realizar traslados a zonas de reparqueo. Estes traslados contarán coa autorización expresa da Consellería de Pesca, Marisqueo e Acuicultura, e realizaranse conforme a normativa establecida para o efecto.
Artigo 3º
Cando o transporte, tanto de semente, desdobramento como adultos, se realice entre distintas rías ou por vía terrestre, contarán preceptivamente coa autorización da Consellería de Pesca, Marisqueo e Acuicultura.
Artigo 4º
Nos traslados que afecten a individuos adultos terase en conta a clasificación de zona á que fai referencia a Orde do 29 de xullo de 1993, pola que se declaran e clasifican as zonas de producción de moluscos bivalvos e outros invertebrados mariños nas augas de competencia da Comunidade Autónoma, tanto do polígono de orixe como do destino.
Artigo 5º
Os titulares de viveiros que desexen realiza-lo traslado de moluscos bivalvos, naqueles casos nos que, de acordo co disposto na presente orde, precisen a preceptiva autorización da Consellería de Pesca, Marisqueo e Acuicultura, deberán presenta-la correspondente solicitude, de conformidade cos modelos que figuran nos anexos II e III.
As solicitudes irán dirixidas ó delegado territorial, se orixe e destino se atopan dentro do seu ámbito territorial ou o director xeral de Marisqueo e Acuicultura se o ámbito territorial corresponde a máis dunha delegación. En ámbolos dous casos, presentaránse no rexistro da Consellería de Pesca, Marisqueo e Acuicultura, nos das súas delegacións territoriais e comarcais ou en cualquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Disposición adicional
Para efectos do disposto na presente orde, enténdese por semente ou desdobramento, o tamaño inferior ó mínimo establecido na normativa vixente para extracción e comercialización de moluscos bivalvos.
Disposicións derradeiras
Primeira.-Facúltase o director xeral de Marisqueo e Acuicultura para dicta-las disposicións necesarias para o desenvolvemento e aplicación desta orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 14 de marzo de 1997.
Juan Caamaño Cebreiro
Conselleiro de Pesca, Marisqueo e Acuicultura
2295