O Estatuto de autonomía de Galicia establece, no seu artigo 31, que é competencia plena desta Cominidade Autónoma, o regulamento e administración do ensino en toda a súa estensión, niveis e graos, modalidades e especialidades, no ámbito das súas competencias e sen prexuízo do disposto no artigo 27 da Constitución e nas leis orgánicas que o desenvolven.
A Lei orgánica 1/1990, de ordenación xeral do sistema educativo, dispón que as administracións educativas planificarán as actividades de formación do profesorado e fomentarán a autonomía pedagóxica e organizativa dos centros, favorecendo e estimulando o traballo en equipo dos profesores.
Pola súa parte, a Consellería de Educación e Ordenación Universitaria recolle como modalidade fundamental de formación do profesorado a formación en centros. Esta modalidade responde a tres ideas básicas:
a) Dar resposta ás necesidades de formación do profesorado identificadas no propio centro e ás que se derivan da implantación do actual sistema educativo.
b) Fomenta-la colaboración entre os profesores do centro e os asesores técnicos pedagóxicos implicados nas diferentes fases da formación: planificación, desenvolvemento, avaliación.
c) Establecer liñas de traballo para a mellora do funcionamento dos centros, nos seus distintos ámbitos.
Isto supón a participación do profesorado no deseño da súa propia formación, desde unha perspectiva de equipo e en función dun proxecto conxunto. Coa finalidade de facilita-lo desenvolvemento desta formación nos propios centros docentes cómpre proceder a facer pública a oportuna convocatoria que, coa implicación das asesorías técnico-pedagóxicas desde a propia fase planificadora, contribuirá a unha maior rendibilidade do esforzo formativo emprendido polo colectivo de profesores.
En consecuencia, esta consellería,
DISPÓN:
Primeiro.-Convocar proxectos de formación e de asesoramento nos centros educativos para impulsa-los proxectos pedagóxicos baseados nun traballo común do equipo docente, xa sexan dos equipos de ciclo, de departamento, interdepartamentos ou internivelares.
Segundo.-Poderán participar nesta convocatoria os centros docentes nos que se impartan ensinanzas de educación infantil, educación primaria, educación especial, educación de adultos, educación secundaria obrigatoria, bacharelato, formación profesional, idiomas, artes aplicadas e oficios artísticos, públicos ou privados concertados, dependentes da Xunta de Galicia.
Os proxectos poderán solicitarse conxuntamente para varios centros dunha zona naqueles ámbitos de formación que pola súa especificidade impliquen a un número de profesores inferior ó mínimo estipulado no apartado quinto desta orde.
Terceiro.-A duración do proxecto de formación e asesoramento será, como máximo, durante o curso académico 1997-1998.
Cuarto.-Os proxectos de formación e asesoramento poderán trata-los seguintes aspectos:
a) Desempeño das funcións das comisións de coordinación pedagóxica.
b) Proxecto Educativo de Centro.
c) Proxecto Curricular de Centro.
d) Plano de acción titorial.
e) Selección e secuencia de contidos por ciclo, área, materia ou módulo.
f) Elaboración de adaptacións curriculares.
g) Introducción dos temas transversais nos currículos.
h) Renovación científico-didáctica relacionada co proxecto de área e coas programacións de aula.
i) Formación en centros de traballo e programas de garantía social.
Quinto.-As solicitudes e documentación complementaria serán presentadas no centro de formación continuada do profesorado (CEFOCOP) correspondente. O xefe de estudios, como coordinador da formación, deberá presentar:
a) Solicitude segundo o modelo do anexo I.
b) Relación do profesorado comprometido no proxecto, que será, como mínimo, o 60% do profesorado implicado, e nunca menos de dez persoas, agás no caso dos centros de menos de 12 profesores, nos que a comisión de selección poderá reduci-lo número mínimo de participantes considerando a porcentaxe antes citada. Un profesor non poderá participar en dous proxectos dentro desta convocatoria. Na relación farase consta-la súa aceptación (segundo o modelo do anexo II).
Non se admitirán modificacións posteriores en canto a esta relación, agás no caso de que se incorpore algún profesor ó centro ó comezo do curso.
Dentro desta relación farase consta-lo nome do coordinador ou coordinadora que, prestándolle apoio ó xefe de estudios na súa tarefa de coordinación da participación do profesorado nas actividades de perfeccionamento, será o encargado de dirixir e desenvolve-los traballos necesarios para a realización do proxecto.
Procurarase que o coordinador ou coordinadora posúa a formación correspondente ó bloque de actividade inicial do itinerario formativo marcado polo CEFOCOP. No caso de que o centro careza dun profesor-coordinador co dito perfil, o Proxecto de Formación e Asesoramento en Centros deberá desenvolverse naqueles aspectos xerais dos ámbitos curricular, pedagóxico e colexiado que impliquen á maioría do equipo de profesores.
c) Solicitude na que se desenvolvan os puntos recollidos no anexo III, que será elaborada en colaboración cun asesor técnico-pedagóxico do centro de formación continuada do profesorado ó que está adscrito o centro.
d) Certificación na que se recolla que cada claustro foi informado de que se vai solicitar esta actividade de formación.
e) Certificación na que se recolla que cada consello escolar do centro foi informado desta solicitude de formación.
Cando a solicitude implique a varios centros, xuntarase a tódolos datos deste apartado ademais do nome dun coordinador, o centro de referencia.
Sexto.-O prazo de solicitude será de corenta e cinco días contados a partir do día seguinte ó da publicación desta orde no Diario Oficial de Galicia.
Sétimo.-A selección será realizada por unha comisión integrada por:
-O director ou directora do CEFOCOP, que actuará como presidente.
-Catro asesores técnicos-pedagóxicos propostos polo director ou directora. Na proposta terase en conta que exista representatividade dos distintos niveis educativos.
-Un funcionario/a con destino no CEFOCOP, con voz e sen voto, que actuará como secretario.
A comisión, se o estima necesario, poderá recaba-lo asesoramento daquelas persoas ou organismos relacionados coa formación permanente do profesorado.
Dos resultados desta selección darase traslado á comisión técnica provincial encargada de elabora-los planos provinciais de formación.
Oitavo.-A comisión establecida no punto anterior, no prazo de vinte días naturais a partir do seguinte ó de finalización de presentación de solicitudes, estudiará estas e efectuará unha proposta de selección de acordo cos aspectos mencionados no apartado cuarto desta orde e tendo en conta os obxectivos e prioridades establecidos no Plano Provincial de Formación Permanente do Profesorado.
Noveno.-Do proceso de selección redactarase a acta correspondente, na que se recollerá:
-Título.
-Nome do coordinador ou coordinadora.
-Nome do centro de referencia.
-Asesor/a ou asesores/as responsables.
-Número de horas anuais previstas para a realización do proxecto de formación e asesoramento.
-Orzamento asignado a cada proxecto, desagregado por conceptos.
-Copias dos anexos I e II de cada solicitude, incluídos os dos denegados e dos excluídos.
Esta documentación será enviada á Dirección Xeral de Ordenación Educativa e de Formación Profesional da Consellería de Educación e Ordenación Universitaria.
Décimo.-A aprobación definitiva dos proxectos de formación e asesoramento será realizada pola Consellería de Educación e Ordenación Universitaria e farase pública en cada CEFOCOP.
No suposto de non resolverse expresamente esta convocatoria no prazo de tres meses, e sen prexuízo da súa posterior resolución, as solicitudes entenderanse desestimadas.
Décimo primeiro.-Os centros de formación continuada do profesorado, sen prexuízo da colaboración que se poida proporcionar por outras institucións ou organismos, ofrecerán apoio e asesoramento. Para tal efecto traballarán conxuntamente no deseño de formación, orientarán o desenvolvemento do traballo, organizarán e/ou impartirán módulos formativos e implicaranse no proceso de avaliación.
A avaliación de cada proxecto de formación e asesoramento levarase a cabo segundo o establecido nas instruccións correspondentes ó plano de formación para o curso 1997-1998.
O xefe de estudios e mailo coordinador do proxecto asistirán, cando cumpra, a unha actividade previa ó comezo, que organizará o CEFOCOP ó que está adscrito o centro.
Décimo segundo.-A xestión económica destes proxectos de formación e asesoramento realizaraa o asesor técnico-pedagóxico responsable de cada proxecto en cada centro de formación continuada do profesorado, con cargo ó orzamento do Plano Provincial de Formación.
O proxecto poderá xera-los seguintes gastos:
-Docencia, no caso de expertos non destinados no CEFOCOP.
-Material funxible.
-Bibliografía.
-Desprazamentos (cando sexa necesario para o desenvolvemento dalgunha actividade proposta).
Décimo terceiro.-Os centros seleccionados presentarán á comisión de selección unha memoria final ó remate do proceso axustándose ó modelo do anexo IV desta orde, e que será entregada por escrito e en soporte informático (WP).
A data límite de entrega da memoria, no CEFOCOP correspondente, será ata o 16 de xuño de 1998.
Décimo cuarto.-Corresponde á comisión de selección prevista no punto sétimo, o seguimento dos asesoramentos aprobados.
A dita comisión reunirase, polo menos, tres veces durante o curso académico para o desenvolvemento das seguintes funcións:
a) Velar por que se cumpran as condicións establecidas na aprobación definitiva.
b) Recabar dos coordinadores de cada proxecto a memoria final, os materiais elaborados e as actas de traballo co número de horas realizadas.
c) Supervisa-la xustificación de gastos presentada polo asesor correspondente.
d) Propoñer á Dirección Xeral de Ordenación Educativa e de Formación Profesional a suspensión da continuidade daqueles proxectos que durante o seguimento se deduza que non se axustan ó aprobado.
e) Informar á Consellería de Educación e Ordenación Universitaria da marcha dos diferentes proxectos mediante: informes de seguimento, se é o caso, informes finais, así como toda aquela información que se considere necesaria ou sexa requirida pola consellería.
f) Adxudica-lo número de horas que hai que certificar.
g) Propoñe-la certificación da formación dos participantes unha vez concluído o proxecto, entregada a memoria final e valorada positivamente.
Décimo quinto.-O director ou directora do centro de formación continuada do profesorado expediralles ós profesores certificado acreditativo da súa participación na actividade realizada.
No dito certificado constará o número de horas realizadas, sen rebasar en ningún caso, o número máximo de horas por curso escolar fixado no anexo III.
Décimo sexto.-Autorízaselle á Dirección Xeral de Ordenación Educativa e de Formación Profesional para dicta-las instruccións necesarias para a aplicación e desenvolvemento desta orde.
Décimo sétimo.-A presente orde entrará en vigor ó día seguinte da súa publicación no Diario Oficial de Galicia.
Santiago de Compostela, 5 de febreiro de 1997.
Celso Currás Fernández
Conselleiro de Educación e Ordenación Universitaria
ANEXO III
GUIÓN PARA A ELABORACIÓN DO PROXECTO
Título do proxecto:
1. Aspecto e modalidade que se pretende traballar, segundo o punto cuarto da orde de convocatoria.
2. Xustificación.
3. Obxectivos.
4. Programa de contidos, actividades e metodoloxía que se pretende seguir.
5. Modalidades de formación e accións formativas que se consideran prioritarias para o logro dos obxectivos. Organización de recursos humanos e materiais.
-Número de horas de asesoramento presencial do asesor técnico-pedagóxico. (En ningún caso poderá ser inferior ó 20% do total de horas estimadas).
-Número de horas de docencia con outros expertos. (En ningún caso poderá ser superior ó 30% do total de horas estimadas).
6. Temporalización. Calendario previsto e horas para a realización do proxecto (non máis de 75 por curso escolar).
7. Necesidades orzamentarias (tendo en conta o establecido no apartado décimo segundo desta orde).
8. Criterios para a avaliación.
ANEXO IV
GUIÓN PARA A MEMORIA FINAL
1. Características xerais e particulares do contexto no que se desenvolveu o proxecto de formación e asesoramento.
2. Consecución dos obxectivos:
-Propostos inicialmente.
-Acadados ó finaliza-lo proceso.
3. Participantes:
-Profesores asistentes á formación.
-Profesionais e institucións que impartiron ou coordinaron a formación.
4. Actividades realizadas. Axuste coa temporalización inicial.
5. Número de horas realizadas.
6. Modificacións, se é o caso, na proposta inicial ó longo da súa posta en marcha en canto a:
-Obxectivos.
-Contidos.
-Actividades.
-Metodoloxía.
-Recursos.
7. Síntese do proceso de avaliación empregado.
8. Conclusións: logros e incidencia no centro docente.
9. Materiais elaborados.
10. Actas das reunións de traballo e das actividades de formación para efectos de certificación e rexistro. Nas actas deben aparecer tódolos profesores que participaron, así como as incidencias máis relevantes.
1377
