Dentro dos programas de actividades que a Academia Galega de Seguridade ten previsto realizar no ano 1997 de forma descentralizada, e conforme as funcións atribuídas pola Lei 4/1992, do 9 de abril, de creación da Academia Galega de Seguridade, anúnciase a celebración de catro cursos básicos de informática, que deberán desenvolverse conforme as seguintes bases:
Primeira.-Obxectivos.
Os cursos teñen por obxectivo principal da-los coñecementos mínimos necesarios en materia de informática, para que os policías se familiaricen cos novos medios técnicos de traballo.
Segunda.-Destinatarios.
Os cursos van dirixidos ós membros dos corpos das policías locais de Galicia, e ós membros da unidade do CNP adscrita á Comunidade Autónoma de Galicia.
Terceira.-Inscrición.
A inscrición dos participantes será totalmente gratuíta.
Cuarta.-Prazas.
O número de prazas que se ofertarán será de 10 por curso.
Quinta.-Solicitudes.
1. O persoal que desexe participar nestes cursos deberá presentar, cuberta a máquina ou con letra moi clara, a instancia que figura no anexo.
2. O prazo para a presentación de instancias rematará ás 14 horas, nas seguintes datas:
-1º e 2º curso: o día 22 de abril.
-3º e 4º curso: o día 14 de maio.
3. As instancias deberán vir asinadas polo xefe do cadro de persoal, ou polo concelleiro de tráfico e seladas; será isto requisito indispensable para ser admitido no curso; o incumprimento deste requisito levará consigo a non admisión no devandito curso.
4. As instancias deberán enviarse á sede da Academia Galega de Seguridade: rúa de Madrid, 2-4, polígono das Fontiñas, 15703 Santiago de Compostela, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Sexta.-Contido e duración.
Os cursos celebraranse en sesións de mañá ou tarde, de luns a venres, e neles trataranse, entre outros, os seguintes temas:
a) Informmática básica.
b) MS-DOS 6.20.
c) Windows 3.11.
d) WordPerfect 6.1.
Sétima.-Datas.
Os cursos celebraranse nas datas do 5 ó 23 de maio, e do 2 ó 20 de xuño.
O horario de cada curso será o seguinte:
-1º curso:
Datas: 5 ó 23 de maio.
Horario: de 16 a 18 horas.
-2º curso:
Datas: 5 ó 23 de maio.
Horario: de 18 a 20 horas.
-3º curso:
Datas: 2 ó 20 de xuño.
Horario: de 16 a 18 horas.
-4º curso:
Datas: 2 ó 20 de xuño.
Horario: de 18 a 20 horas.
Oitava.-Relación de admitidos.
A relación de admitidos publicarase nas seguintes datas:
-1º e 2º curso: o día 28 de abril.
-3º e 4º curso: o día 21 de maio.
Esta relación publicarase no taboleiro de anuncios da Academia Galega de Seguridade, ou ben poden confirma-la súa asistencia chamando ó teléfono (981) 56 34 00.
Novena.-Lugar.
Os cursos desenvolveranse nos locais sitos na rúa Santiago de Chile, 17 bis, en Santiago de Compostela.
Décima.-Certificado de asistencia e aproveitamento.
Ó remate de cada curso entregaráselles un certificado de asistencia e aproveitamento a aquelas persoas que acrediten a súa participación continuada a este e superen unha proba de coñecementos, non podendo supera-las faltas de asistencia un 15% do total da duración de horas lectivas do curso; unha inasistencia superior ó 15%, aínda que sexa xustificada, e a non superación das correspondentes probas de coñecementos, levarán consigo a non expedición do certificado.
Undécima.-Modificacións.
A Academia Galega de Seguridade poderá modifica-lo desenvolvemento dos cursos para adaptalos ás necesidades da Administración e ás continxencias que poidan xurdir.
Santiago de Compostela, 5 de febreiro de 1997.
Juan José Fariñas-Ferro Rodríguez
Director xeral da Academia Galega de Seguridade
1181