Por Orde do 27 de agosto de 1996 (DOG nº 175, do 6 de setembro) créase o premio Elías Valiña ó esforzo revitalizador e promocional do Camiño de Santiago, co fin de recoñecer e recompensa-los méritos de todas aquelas institucións, asociacións ou entidades culturais que dediquen unha parte significativa da súa actividade á revitalización e promoción do Camiño de Santiago, contribuíndo así ó coñecemento e divulgación do significado histórico, relixioso e cultural da rota xacobea.
O artigo 4 da citada orde establece que o premio será outorgado por un xurado presidido polo conselleiro de Cultura e Comunicación Social ou persoa en quen delegue e integrado polo presidente do Comité Internacional de Expertos del Camino de Santiago, e polos presidentes das entidades inscritas no Rexistro de Entidades de Promoción do Camiño de Santiago.
De acordo co citado artigo 4, as decisións do xurado serán inapelables e daranse a coñecer mediante publicación no DOG.
Por todo isto,
RESOLVO:
Artigo único.-Ordeno publica-la decisión do xurado do premio Elías Valiña ó esforzo revitalizador e promocional do Camiño de Santiago.
O citado xurado, reunido en Santiago de Compostela os días 1 e 2 de decembro de 1996, acordou concederlle o premio Elías Valiña ó esforzo revitalizador e promocional do Camiño de Santiago, ó proxecto presentado pola Confraternity of Saint James, polo refuxio de Rabanal do Camiño.
Santiago de Compostela, 3 de decembro de 1996.
(P.D. Orde 24-6-1996)
José Mª Sánchez González
Secretario xeral da Consellería de Cultura e Comunicación Social
0451