O Estatuto de autonomía de Galicia no seu artigo 27.23º asígnalle á Comunidade Autónoma competencias exclusivas en materia de asistencia social.

A Lei 4/1993, do 14 de abril, de servicios sociais, inclúe, no seu artigo 5.3º, como unha das súas áreas de actuación a de familia, infancia e mocidade, e nos artigos 53 ó 57 inclusive, as liñas, forma de convocatoria, condicións, requisitos e tipos de subvencións que poderán establecerse na materia.

O Decreto 2/1994, do 13 de xaneiro, atribúelle á Consellería de Familia, Muller e Xuventude as competencias neste sector, así como o exercicio das funcións que en materia de protección de menores establece o Decreto 112/1995, do 31 de marzo, sobre medidas de protección de menores e adopción.

O Decreto 258/1990, do 27 de abril, establece o réxime xeral de axudas e subvencións en materia de servicios sociais, coas modificacións introducidas pola Lei 11/1992, do 7 de outubro, de réxime financeiro e presupostario e a propia Lei de servicios sociais, normativa á que, en consecuencia, se adaptará a presente orde, tendo en conta en todo caso os principios de publicidade, obxectividade e concorrencia, e os demais requisitos esixidos no proxecto de Lei de presupostos xerais de Galicia para 1997.

A orde da Consellería de Economía e Facenda do 2 de xuño de 1986, modificada pola Orde do 18 de outubro de 1991, posibilita no seu artigo 1.1º a tramitación anticipada de expedientes de gasto imputables ós capítulos IV e VII «No exercicio orzamentario inmediatamente anterior a aquel no que se vaia materializa-la contraprestación, sempre que exista crédito adecuado e suficiente no proxecto de orzamentos xerais da comunidade que se someta á aprobación do Parlamento de Galicia, unha vez que ese proxecto estea aprobado polo Consello da Xunta de Galicia e que corresponda ó exercicio orzamentario no que se vaia materializa-la contraprestación».

A aplicación desta norma supón a posibilidade de axiliza-lo proceso de execución do orzamento, beneficiando moi especialmente os propios administrados e sen mingua da soberanía do Parlamento toda vez que o artigo 3.2º dispón que «no suposto de subvencións, a autorización do gasto e a contracción da obriga demoraranse ata a aprobación do crédito que vaia ampara-lo gasto.

No proxecto de Lei de presupostos xerais da Comunidade Autónoma para 1997, aprobado polo Consello da Xunta de Galicia de data do 11-10-1996, na aplicación 14.02.212D.780.00 existe partida orzamentaria para as axudas que se establecen na presente orde.

Na súa virtude, en uso das facultades que teño atribuídas e para a debida aplicación dos créditos orzamentarios ó fin para o que foron establecidos,

DISPOÑO:

Artigo 1º.-Obxecto.

O obxecto da presente orde é convocar axudas económicas para as entidades de iniciativa social que presten servicios de atención ós menores institucionalizados, co fin de levar a cabo os investimentos que sexan necesarios para a súa adecuación ós principios establecidos no Plan de Equipamentos para Menores en Desprotección Social, incluído no Plan Integral de Apoio á Familia. As ditas entidades deben cumpri-los requisitos establecidos no Decreto 243/1995, do 28 de xullo, da Consellería da Presidencia e Administración Pública, e na Orde do 29 de febreiro de 1996, da Consellería de Familia, Muller e Xuventude, pola que se regulan os requisitos específicos que deben reuni-los centros de menores e os centros de atención á infancia.

Os centros e servicios obxecto de subvención en virtude desta convocatoria son aqueles establecementos que serven de soporte convivencial para unha atención especializada a menores en situación de desamparo ou marxinación social, non susceptibles de acollerse a outro tipo de medidas (axudas en familia, adopcións, acollementos familiares, ...), que ofrecen transitoriamente aloxamento, asistencia integral e unha dotación de servicios e programas especialmente orientados cara á normalización, personalización e integración socio-familiar dos seus beneficiarios.

Artigo 2º.-Destinatarios.

Poderán solicitar axudas as entidades de iniciativa social que presten servicios de atención a menores na Comunidade Autónoma e estean inscritas no Rexistro de Entidades Prestadoras de Servicios Sociais desta consellería, segundo do disposto no Decreto 291/1995, do 3 de novembro, polo que se desenvolve a Lei 4/1993, do 14 de abril, no relativo ós rexistros de entidades prestadoras de servicios sociais.

Artigo 3º.-Tipo de axuda.

A axuda destinada a estes servicios concederase en forma de subvención para investimento, entendéndose por tal os seguintes conceptos:

-Reforma, ampliación ou mellora de edificios e instalacións.

-Equipamento e mobiliario.

-Adquisición de inmobles.

-Construcción de nova planta.

Artigo 4º.-Contía das axudas.

A contía destas axudas fixarase en función das necesidades de cada centro, do proxecto presentado e do orzamento total asignado a este fin.

Artigo 5º.-Normas xerais de subvencións.

a) As subvencións de investimento poderán significa-lo financiamento total ou parcial do gasto, sen que

en ningún caso implique duplicidade, de tal forma que a suma das subvencións concedidas por todo tipo de organismos públicos, percibidas coa mesma finalidade non supere o 100% do importe total do gasto efectuado.

b) As delegacións provinciais da Consellería de Familia, Muller e Xuventude poderán efectua-las comprobacións que consideren oportunas en canto ó cumprimento dos requisitos esixidos pola Lei de servicios sociais de Galicia ás entidades de iniciativa social.

c) As axudas reguladas na presente orde poderán estar suxeitas á formalización dun convenio entre a institución beneficiaria e a Consellería de Familia, Muller e Xuventude.

Artigo 6º.-Solicitudes e documentación.

As entidades presentarán xunto coa solicitude (anexo I) a documentación que a continuación se sinala:

1.-Documentación xeral:

a) Memoria da institución segundo modelo oficial (anexo II).

b) Acreditación da personalidade e representación do solicitante.

c) Fotocopia da tarxeta de identificación fiscal.

d) Declaración das subvencións ou axudas obtidas para a mesma finalidade e procedentes de calquera Administración ou entes públicos ou privados para a mesma finalidade, ou negativa se é o caso.

Aquelas institucións que soliciten subvencións por primeira vez, ou as que aínda téndoas solicitados en anos anteriores, sufrisen variacións estatutarias, deberán presentar así mesmo fotocopia compulsada dos seus estatutos ou das variacións que houbera neles.

e) Copia compulsada do permiso para o inicio das actividades, ou da solicitude deste, de acordo cos artigos 6 e 20 do Decreto 243/1995, e co artigo 5 da orde da Consellería de Familia, Muller e Xuventude do 29 de febreiro de 1996.

2.-Documentación específica:

2.1. Para adquisición de bens inmobles.

a) Certificado do Rexistro da Propiedade no que se acredite que o inmoble obxecto da adquisición está libre de cargas, así como a titularidade deste a favor do vendedor.

b) Documento de opción de compra, no que se indicará a data de caducidade desta, así como o prezo e a forma de pagamento.

c) Informe técnico sobre o estado do inmoble.

2.2. Para subvencións de construcción, reforma e adecuación:

a) Certificado do Rexistro da Propiedade que acredite o dominio do solicitante do inmoble ou, se este é en alugamento ou cedido, certificado do propietario facendo consta-las condicións nas que se efectuou este e a súa conformidade coas obras que se pretenden realizar.

b) Certificado do concello correspondente no que se faga constar que os plans urbanísticos aprobados e as ordenanzas municipais en vigor permiten a realización da obra que se proxecta.

c) Memorias das obras que se van realizar, cun orzamento incorporado.

d) Plan de financiamento da obra.

e) Cando a subvención se solicite para a creación dun centro e no caso de que a reforma ou a adecuación supoñan unha modificación substancial do centro, segundo establece o artígo 14.2º do Decreto 243/1995, é necesario presentar copia da solicitude da oportuna autorización administrativa ou desta autorización se xa estivera concedida.

2.3. Para subvencións de equipamento:

a) Memoria do equipamento e orzamento do importe das adquisicións que se pretendan realizar, axustándose a criterios de funcionalidade e economía.

b) No caso de que no ano anterior se subvencionase a construcción do centro, acreditación de que a obra está totalmente rematada.

Artigo 7º.-Lugar e prazo de presentación das solicitudes.

A solicitude e maila documentación requirida presentaranse de conformidade cos modelos normalizados nas delegacións provinciais da Consellería de Familia, Muller e Xuventude, sendo de aplicación en todo caso o disposto no artigo 38.4º da Lei de réxime xurídico das administracións públicas e do procedemento administrativo común. Aquelas entidades de carácter supraprovincial, que tivesen equipamentos en varias provincias presentarán, de se-lo caso, unha solicitude para cada provincia competente.

O prazo de presentación das solicitudes será de 1 mes desde a entrada en vigor da presente orde.

Artigo 8º.-Tramitación dos expedientes.

1.-As delegacións provinciais da consellería comprobarán que os expedientes reúnen tódolos requisitos establecidos na presente orde e procederán a reclamar por escrito, ós interesados, os datos e documentos necesarios para completa-lo expediente, con apercibimento de que se non se fixera así no prazo de dez días arquivarase o expediente sen máis trámite.

2.-Revisados os expedientes e completados, se é o caso, remitiranse á comisión provincial de valoración, que terá a función de propoñe-la aprobación ou denegación das axudas, seguindo os criterios obxectivos recollidos na presente orde.

3.-A composición da comisión de valoración será a seguinte:

-Presidente: o xefe de Servicio de Familia, Infancia e Menores.

-Vocais: dous funcionarios da respectiva delegación provincial, designados polo delegado provincial; un deles actuará como secretario. Así mesmo, tamén participará un representante da intervención territorial, que actuará con voz pero sen voto.

Artigo 9º.-Criterios de valoración.

A concesión de subvencións resolverase tendo en conta a adecuación ás características e requisitos dos centros de menores regulados no Decreto 243/1995, do 28 de xullo, polo que se regula o réxime de autorización e acreditación de centros de servicios sociais e a Orde do 29 de febreiro de 1996 pola que se regulan os requisitos específicos que deben reuni-los centros de menores e os centros de atención á infancia.

Ademais, a comisión de valoración poderá ter en conta os seguintes aspectos:

1.-Tender a unha máxima flexibilización respecto ás condicións de admisión e permanencia dos menores nas institucións, para permitir acoller conxuntamente grupos de irmáns.

2.-Integra-los menores no sistema escolar ordinario e procura-la súa participación nas actividades asociativas de tempo libre do seu medio.

3.-Ofrecer unha atención especializada en réxime permanente (diurno e nocturno) durante todo o ano:

-Satisfacción das necesidades primarias.

-Servicio de titorías.

-Apoio e seguimento escolar.

-Atención sanitaria.

-Tempo libre.

-Apoio e orientación ás familias.

4.-Profesionaliza-la práctica educativa e asistencial das institucións de menores:

-Contar con educadores profesionais.

-Dispoñer dun proxecto educativo.

-Emitir periodicamente os informes e as memorias necesarios.

5.-Cooperar e traballar coas familias naturais dos menores, fomentando as visitas e os contactos familiares.

6.-Coordinarse cos diversos estamentos de servicios sociais para facer efectivo un seguimento e apoio postinstitucional que favoreza a integración sociolaboral dos menores acollidos.

7.-Cumprir cos dereitos dos usuarios de centros e equipamentos residenciais e, máis en concreto, cos seguintes:

-Acceder a eles e a recibir asistencia sen discriminación por razón de raza, sexo, relixión, ideoloxía ou calquera outra condición ou circunstancia persoal ou social.

-A consideración no trato.

-Ó segredo profesional.

-A realizar saídas ó exterior. Este dereito estará suxeito á limitación que poida establecer unha resolución xudicial.

-A manter relacións interpersoais, incluíndo o dereito a recibir visitas.

-A unha asistencia individualizada, acorde coas súas necesidades específicas.

-Á intimidade persoal en función das condicións estructurais do centro.

-A que se lle facilite o acceso á atención social, sanitaria, educacional, cultural, etc.

-A asociarse.

Artigo 10º.-Resolución.

1.-A resolución das axudas, por proposta da comisión de valoración, correspóndelles ós delegados provinciais da consellería, despois da súa fiscalización pola intervención, de conformidade co establecido no Decreto 258/1990, do 27 de abril, e no Decreto 88/1990, do 15 de febreiro, sobre desconcentración de competencias para a concesión de axudas e subvencións.

2.-As solicitudes deberán resolverse nun prazo dun mes, e aquelas non resoltas en prazo teranse por desestimadas.

3.-As resolucións recaídas seranlles notificadas ós interesados para a execución da axuda outorgada. As resolucións denegatorias deberán ser sempre motivadas.

4.-Do mesmo xeito poderán modificarse as devanditas resolucións pola alteración das circunstancias que serviron de base para o seu outorgamento.

5.-Cando concorran as circunstancias previstas no apartado 2.2.e) do artigo 6º desta orde, a resolución de concesión de subvención entenderase condicionada a que a entidade obteña a autorización administrativa correspondente, da que deberá remitir copia compulsada nos 5 días seguintes á súa obtención. Se non se fixera así a concesión da subvención entenderase revogada.

6.-Así mesmo, se a entidade estivera tramitando o permiso de inicio de actividades, a concesión de subvención entenderase condicionada á efectiva obtención deste permiso.

Artigo 11º.-Pagamento e xustificación das subvencións.

1.-Os beneficiarios das subvencións de contía superior a 250.000 ptas., antes de proceder ó seu cobramento, terán que acreditar que se atopan ó día das súas obrigas tributarias e sociais e que non teñen pendente de pagamento ningunha débeda por ningún concepto coa Administración pública da Comunidade Autónoma de acordo co disposto na Lei de presupostos de 1997.

2.-A subvención aboarase unha vez efectuado o gasto e será presentada ante a delegación provincial da consellería a seguinte documentación:

a) Subvención para adquisición de inmobles: o aboamento da subvención efectuarase unha vez presentada ante o órgano que a concedeu unha copia da escritura pública de compravenda, que recollerá unha cláusula na que se faga constar que o inmoble obxecto da subvención deberá de manterse polo menos durante vinte anos destinado á finalidade que serviu de fundamento á petición.

b) Subvencións para construcción, reforma e adecuación de centros:

-Certificación asinada e selada pola entidade receptora da axuda, na que se faga consta-la realización das obras e a conformidade con elas.

-Certificado ou factura orixinal expedida pola empresa ou contratista individual que realizou a obra.

-Nas subvencións para a construcción de nova planta presentarase compromiso asinado polo representante legal da entidade beneficiaria de que o inmoble se destinará, durante 20 anos, á finalidade que serviu de fundamento á petición.

-Autorización administrativa do órgano competente, se é o caso.

c) Subvencións para equipamento:

-Certificado do representante da entidade no que conste a realización da subministración e a súa conformidade con ela.

-Facturas orixinais, debidamente conformadas, de cada unha das casas subministradoras.

Nos dous apartados anteriores as facturas deberán cumpri-lo disposto no Real decreto 2402/1985, do 18 de decembro (BOE 312, do 30-12-1985).

3.-A data límite de presentación das xustificacións será o 31-12-1997.

Artigo 12º.-Outras obrigas das entidades subvencionadas.

a) Facer constar en todo tipo de publicidade e información a condición de subvencionada pola Consellería de Familia, Muller e Xuventude.

b) Remiti-los informes e demais documentación que reclamen os órganos competentes da consellería.

c) Facilita-la inspección e control dos órganos competentes da Consellería de Familia, Muller e Xuventude sobre os seus centros e actividades.

d) Acreditar ante o órgano concedente a realización da actividade e o cumprimento dos requisitos e das condicións que determine a concesión da axuda ou subvención.

Artigo 13º.-Revogación.

O incumprimento total ou parcial de calquera das condicións, así como a duplicidade de axuda con cargo a outros créditos dos orzamentos xerais do Estado, da Seguridade Social, Administración institucional, autonómica ou local, constituirá causa determinante de revogación da axuda e do seu reintegro polo beneficiario ou solicitante, xunto cos xuros de demora, segundo o previsto no artigo 78.6º da Lei 11/1992, do 7 de outubro, de réxime financeiro e presupostario de Galicia.

Disposicións adicionais

Primeira.-De acordo co disposto no artigo 3.2º da orde da Consellería de Economía e Facenda do 2 de xuño de 1986, a autorización do gasto e a contracción da obriga demoraranse ata a aprobación do crédito que vaia ampara-lo gasto.

Segunda.-A concesión de axudas reguladas nesta orde terá como límite global o crédito asignado nos orzamentos desta Comunidade Autónoma para o exercicio económico de 1997 para estes fins.

Terceira.-En todo caso, as actuacións que se van subvencionar deberán realizarse dentro do exercicio económico de 1997.

Disposicións derradeiras

Primeira.-Autorízase a directora xeral da Familia para dicta-las normas necesarias para o desenvolvemento desta orde.

Segunda.-A presente orde entrará en vigor o día seguinte ó da súa publicación no Diario Oficial de Galicia.

Santiago de Compostela, 18 de decembro de 1996.

Manuela López Besteiro

Conselleira de Familia, Muller e Xuventude

9495