A Comisión de Goberno en sesión do día 27-9-1996 acordou o seguinte:
1º. Aprobar inicialmente o proxecto de urbanización da vía transversal ó camiño de Espiñeiro, formulado por Pilar Álvarez Díaz e Jesús Fernández Fernández e redactado polo arquitecto Ricardo Salgado Salgado, de acordo cos informes do expediente número 3988/401 e coas seguintes condicións e/ou especificacións:
a) Os promotores da actuación deberán avalar, unha vez aprobado definitivamente este proxecto, a cantidade de 2.960.000 pesetas para responder dos custos de expropiación dos terreos necesarios para a execución da vía que se proxecta.
b) Así mismo, deberán avalar (tamén logo de aprobación definitiva), a cantidade de 12.610.329 pesetas, correspondentes ó 100% do importe das obras de urbanización.
c) O prazo de execución da totalidade das obras comprendidas no proxecto fíxase en 12 meses, contados desde a efectiva dispoñibilidade dos terreos.
d) As obras que se describen nos arredores da futura edificación entenderanse como indicativas, a resultas do que para o efecto se determine no expediente de concesión de licencia.
e) Con anterioridade á aprobación definitiva do proxecto deberá achegarse polos interesados xustificación suficiente do cumprimento da ordenanza para mellora de accesibilidade e supresión de barreiras arquitectónicas do Concello de Vigo, no que lle sexa de aplicación.
2º. Somete-lo expediente a información pública polo prazo de quince días, mediante a inserción de anuncios no DOG, BOP, un dos xornais de maior circulación da provincia e no taboleiro oficial de edictos da Casa do Concello, con notificación ós interesados (incluídos os propietarios afectados pola expropiación prevista, segundo relación contida no plano número 2 con visado do COAG do 17-7-1996).
3º. Logo da aprobación definitiva do proxecto, incoa-los correspondentes expedientes expropiatorios co fin de obte-la totalidade dos terreos precisos para a execución da vía en cuestión.
O que se fai público en cumprimento do punto 2º do acordo plenario, e signifícase que o prazo de exposición ó público entenderase aberto desde a primeira publicación ata o remate dos quince días contados desde o derradeiro anuncio.
A documentación atópase na Oficina Municipal de Información (baixo do concello).
Vigo, 28 de outubro de 1996.
Manuel Pérez Álvarez
Alcalde
