A Lei 3/1983, do 15 de xuño, de normalización lingüística, recollendo o que dispoñen a Constitución española e o Estatuto de autonomía de Galicia, establece que o galego é lingua oficial en Gali
cia. En consonancia con iso, recoñécelles ós cidadáns o dereito de coñecelo e de usalo. Mais non estaría garantido ese dereito se os cidadáns non tivesen a posibilidade de aumentar -ou iniciar, segundo o caso- o coñecemento e o dominio dos distintos rexistros da lingua propia de Galicia.
Entre as competencias da Consellería de Educación e Ordenación Universitaria, recollidas no Decreto 346/1996, figura a promoción e o ensino da lingua galega, competencia que exerce, entre outros medios, a través da organización de cursos do idioma propio de Galicia. A estructura e o contido destes cursos reguláraos xa a propia consellería mediante unha Orde do 1 de marzo de 1989.
Por todo isto, e facendo constar (de acordo co que establece a Orde do 2 de xuño de 1986, de tramitación anticipada de expedientes de gasto) que o gasto que se proxecta coa presente orde está condicionado á existencia de crédito adecuado e suficiente no orzamento do exercicio de 1997, neste momento en trámite parlamentario, a Consellería de Educación e Ordenación Universitaria,
DISPÓN:
Artigo 1º
Convócanse cursos de iniciación e de perfeccionamento de lingua galega, que se celebrarán nas localidades que determine a Consellería de Educación e Ordenación Universitaria a través da Dirección Xeral de Política Lingüística, segundo as solicitudes presentadas e a súa distribución xeográfica.
Artigo 2º
1. Poderán asistir a estes cursos tódalas persoas maiores de idade que o desexen, ben individualmente ou ben agrupadas por colectivos.
2. Para acceder ó curso de perfeccionamento é requisito indispensable ter aprobado ou validado o curso de iniciación.
3. O número de asistentes a cada curso será de 20 persoas como mínimo e de 35 como máximo.
Artigo 3º
1. Os cursos terán unha duración de 75 horas e neles impartiranse os contidos sinalados na Orde do 1 de marzo de 1989, pola que se regulan os cursos de iniciación e de perfeccionamento.
2. A asistencia ás clases é obrigatoria. A ausencia de cada un dos asistentes non poderá ser superior ó 10% da duración total do curso.
3. A avaliación que se efectúe nestes cursos deberá responder ós principios de formativa e continua, e terá en conta o dominio oral e escrito do idioma, aplicándose as probas necesarias. Ó remate de cada curso, ós asistentes que superaron as distintas fases da avaliación outorgaráselles un certificado coa cualificación de apto.
Artigo 4º
1. Para a presentación das solicitudes utilizarase o modelo de formulario que figura como anexo a esta orde de convocatoria.
As persoas que desexen realiza-los cursos en Santiago de Compostela presentarán a solicitude no rexistro da Consellería de Educación e Ordenación Universitaria. As demais persoas presentarana no rexistro da delegación da Consellería de Educación e Ordenación Universitaria na provincia á que pertenza a localidade onde queiran realiza-lo curso. En ámbolos dous casos é de aplicación o disposto no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común (BOE nº 285, do 27 de novembro de 1992).
2. Os solicitantes do curso de perfeccionamento deberán xuntar á instancia de solicitude, a fotocopia compulsada da certificación que acredite que teñen superado ou validado o curso de iniciación.
3. O prazo de presentación das solicitudes rematará o 20 de decembro de 1996.
Artigo 5º
1. O horario, o lugar de celebración e a data de comezo de cada curso determinaraos a Consellería de Educación e Ordenación Universitaria a través da Dirección Xeral de Política Lingüística.
2. As clases correspondentes ós cursos que se celebren en Santiago de Compostela comezarán o día 27 de xaneiro de 1997 e impartiranse na Escola Galega de Administración Pública (polígono das Fontiñas).
3. Sobre a admisión das solicitudes resolverá a correspondente delegación provincial da Consellería de Educación e Ordenación Universitaria, agás no caso daquelas que pidan asistir ós cursos da cidade de Santiago de Compostela, para as cales resolverá a Dirección Xeral de Política Lingüística.
4. As listas de admitidos faranse públicas nos taboleiros de anuncios do gabinete de normalización lingüística da delegación provincial da Consellería de Educación e Ordenación Universitaria correspondente.
Para os cursos que se celebren en Santiago de Compostela, estas listas faranse públicas na oficina de información e atención ó cidadán da Consellería de Educación e Ordenación Universitaria.
Artigo 6º
Tódalas actividades que se realicen nestes cursos faranse segundo o establecido na Lei 3/1983, do 15 de xuño, de normalización lingüística (disposición adicional) e no Decreto 173/1982, do 17 de novembro, sobre a normativización da lingua galega.
Disposicións finais
Primeira.-Autorízase o director xeral de Política Lingüística para dictar no ámbito das súas competencias as resolucións precisas para o desenvolvemento da presente orde.
Segunda.-Esta orde entrará en vigor o día seguinte ó da súa publicación no Diario Oficial de Galicia.
Santiago de Compostela, 22 de outubro de 1996.
Celso Currás Fernández
Conselleiro de Educación e Ordenación Universitaria
8126