A Asociación de Talleres de Reparación de Vehículos Automóviles de Lugo solicitou á Consellería de Economía e Facenda, a través da Secretaría Xeral e do Patrimonio, a cesión do uso do inmoble coñecido como Estación de Inspección de Vehículos, sito na parroquia de Muxa (Lugo), para utilizalo como Centro para impartir cursos de capacitación profesional.
Co obxecto de posibilita-la cesión do dereito de uso do devandito inmoble á Asociación de Talleres de Reparación de Vehículos Automóviles de Lugo, cómpre, segundo o disposto no artigo 24 da Lei 3/1985, do 12 de abril, do patrimonio da Comunidade Autónoma galega, proceder á declaración da súa alleabilidade.
En virtude do anteriormente disposto,
DISPOÑO:
Artigo único.
1. Declárase alleable o inmoble coñecido como Estación de Inspección Técnica de Vehículos, sito na parroquia de Muxa (Lugo), composta na actualidade dunha nave de oficinas de 512 m e unha urbanización de 3.500 m, que se sitúan sobre unha parcela de aproximadamente 6.801 m de extensión superficial, que linda ó norte, Domingo Sánchez e outros; ó sur, herdeiros de Doel; ó leste, Jesús Fidalgo e ó oeste, estrada.
2. O inmoble descrito no parágrafo anterior atópase inscrito no Rexistro da Propiedade nº 1 de Lugo, no tomo 749, libro 336, folio 217, predio 24.708, inscrición 3ª.
Santiago de Compostela, 29 de maio de 1996.
José Antonio Orza Fernández
Conselleiro de Economía e Facenda
7159